អ៊ុយក្រែនចង់បា​នការចរចាបីផ្លូវZelensk​y -Putin -​Trump

 ព្រឹត្តិការណ៍៖ស្ថានភាពសង្គ្រាមរុស្ស៊ី-អ៊ុយក្រែន

រដ្ឋមន្ត្រីការបរទេសអ៊ុយក្រែនលោក Andrii Sybiha បាននិយាយថា ក្រុងគៀវចង់ឱ្យប្រធានាធិបតីអាមេរិក Donald Trump មានវត្តមាននៅក្នុងកិច្ចប្រជុំដ៏មានសក្តានុពលរវាងប្រធានាធិបតីអ៊ុយក្រែន Volodymyr Zelenskyនិងសមភាគីរុស្ស៊ីលោក Vladimir Putin ។"យើងកំពុងរៀបចំសម្រាប់កិច្ចប្រជុំរវាងប្រធានាធិបតីអ៊ុយក្រែននិងរុស្ស៊ី។ កិច្ចប្រជុំនេះអាចត្រូវបានពង្រីកយើងចង់ឱ្យប្រធានាធិបតីអាមេរិក Trump ចូលរួម" Sybiha ត្រូវបានដកស្រង់សម្តីដោយUkrinform ។

(ពីឆ្វេងទៅស្តាំ)ប្រធានាធិបតីអ៊ុយក្រែន Volodymyr Zelensky ប្រធានាធិបតីអាមេរិក Donald Trump និងប្រធានាធិបតីរុស្ស៊ី Vladimir Putin។ រូបថត៖ EPA, Shutterstock

រដ្ឋមន្ត្រី​ការ​បរទេស​អ៊ុយក្រែន​បាន​កត់​សម្គាល់​ថាការ​បន្ត​ការ​ចរចា​សន្តិភាព​ត្រូវ​តែ​«គ្មាន​លក្ខខណ្ឌ»។មន្ត្រីរូបនេះបានបន្ថែមថា"យើងកំពុងរង់ចាំឱ្យរុស្ស៊ីបង្ហាញចក្ខុវិស័យ គំនិតនិងសំណើរបស់ខ្លួនលើប៉ារ៉ាម៉ែត្រនៃបទឈប់បាញ់ដោយគ្មានលក្ខខណ្ឌនាពេលអនាគត"។នៅថ្ងៃទី២៣ខែឧសភា អ៊ុយក្រែន និងរុស្ស៊ីបានធ្វើការផ្លាស់ប្តូរអ្នកទោសដែលបានព្រមព្រៀងគ្នាពីមុនមក ដែលជាការផ្លាស់ប្តូរអ្នកទោសដ៏ធំបំផុតចាប់តាំងពីឆ្នាំ២០១៤។រដ្ឋមន្ត្រីការបរទេសរុស្ស៊ីលោក Sergey Lavrov បាននិយាយថា ទីក្រុងម៉ូស្គូនឹងបង្ហាញតែសេចក្តីព្រាងនៃសំណើសន្តិភាពដល់ទីក្រុងគៀវប៉ុណ្ណោះ បន្ទាប់ពីការផ្លាស់ប្តូរអ្នកទោសចុងក្រោយត្រូវបានបញ្ចប់។យោងតាមរដ្ឋមន្ត្រីការបរទេសអ៊ុយក្រែនទីក្រុងគៀវក៏កំពុងបង្កើតសំណើសន្តិភាពផ្ទាល់ខ្លួន ដើម្បីចែករំលែកជាមួយទីក្រុងម៉ូស្គូ។មន្ត្រីរូបនេះបានកត់សម្គាល់ថាអ៊ុយក្រែនតែងតែសង្កត់ធ្ងន់ថាអឺរ៉ុបត្រូវតែមានវត្តមាននៅក្នុងការចរចានាពេលអនាគតណាមួយ។ការរៀបចំ និងការបង្ហាញសេចក្តីព្រាងសំណើសន្តិភាព គឺជាព្រឹតិ្តការណ៍ដ៏សំខាន់មួយក្នុងចំណោមព្រឹត្តិការណ៍សំខាន់ៗចំនួនពីរ ដែលទីក្រុងម៉ូស្គូនិងក្រុងគៀវសម្រេចបានក្នុងអំឡុងពេលកិច្ចសន្ទនាផ្ទាល់របស់ពួកគេក្នុងរយៈពេលប៣ឆ្នាំចុងក្រោយនេះ នៅទីក្រុងអ៊ីស្តង់ប៊ុល ប្រទេសតួកគី។ ព្រឹត្ដិការណ៍ដែលនៅសេសសល់គឺការដោះដូរអ្នកទោសទ្រង់ទ្រាយធំ ដោយមានទាហានប្រហែល១.០០០នាក់នៅសងខាងដោយចាប់ផ្តើមពីថ្ងៃទី២៣ឧសភា។ ទីក្រុងម៉ូស្គូនិងក្រុងគៀវសង្ឃឹមថាកិច្ចចរចានឹងបន្តនៅចុងសប្តាហ៍។ប្រធានាធិបតីអ៊ុយក្រែន លោក Zelensky បានអញ្ជើញសមភាគីរុស្ស៊ី លោក Putinឱ្យជួបទល់មុខគ្នាក្នុងកិច្ចពិភាក្សានៅទីក្រុងអ៊ីស្តង់ប៊ុល។ទោះជាយ៉ាងណាក៏ដោយលោកPutinបានបដិសេធហើយជំនួសមកវិញបានបញ្ជូនគណៈប្រតិភូដែលដឹកនាំដោយលោក Vladimir Medinsky ដែលជាជំនួយការរបស់លោក៕ពុតសាម៉ាត់