ខេត្តកណ្តាល នឹងរៀប​ចំ​​ពិធីប្រណាំងទូក នៅមាត់ទន្លេបាសាក់ ក្រុងតាខ្មៅ នៅថ្ងៃទី២២-២៣ ខែតុលា

 រដ្ឋបាលខេត្តកណ្តាល បានប្រកាសថា ក្នុងស្មារតីថែរក្សាទំនៀមទម្លាប់ប្រពៃណីដ៏ល្អ និងដើម្បីបង្កបរិយាកាសរីករាយជូនសាធារណជន ប្រជាពលរដ្ឋ បានកម្សាន្តសប្បាយរីករាយ​ក្រោមម្លប់ដ៏ត្រជាក់នៃសន្តិភាព ​រដ្ឋបាលខេត្តកណ្តាល បានសម្រេចរៀបចំពិធីប្រណាំងទូក​ នៅមាត់ទន្លេបាសាក់ ក្រុងតាខ្មៅ ខេត្តកណ្តាល រយៈពេលចំនួន ០២ថ្ងៃ គឺនៅថ្ងៃទី២២-២៣ ខែតុលា ឆ្នាំ២០២២។

សេចក្តីជូនដំណឹងរបស់រដ្ឋបាលខេត្តកណ្តាល បញ្ជាក់ថា ក្នុងរយៈពេល ២ថ្ងៃ នៃ​ពិធីបុណ្យអុំទូក​នេះ ក៏មានការប្រគំតន្ត្រីរបស់សមាគមសិល្បករខ្មែរ និងការដាក់តាំងពិព័រណ៍លក់ផលិតផលក្នុង​ស្រុក​ជាច្រើន ព្រមទាំងមានការបាញ់កាំជ្រួច នៅល្ងាចថ្ងៃទី២៣ ខែតុលា ឆ្នាំ២០២២ ផងដែរ។

សូមរម្លឹកថា ក្នុងកិច្ចប្រជុំ​ពេញអង្គគណៈរដ្ឋមន្ត្រី នៅថ្ងៃសុក្រ ទី៩ ខែកញ្ញា ឆ្នាំ២០២២ នេះ សម្តេចតេជោ ហ៊ុន សែន បានប្រកាសថា រាជរដ្ឋាភិបាល បានសម្រេចផ្អាក​ មិនរៀបចំ​ព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ នៅថ្នាក់ជាតិ នាមុខព្រះបរមរាជវាំង ក្នុងរាជធានីភ្នំពេញឡើយ។ ប៉ុន្តែ​នៅតាមបណ្តាខេត្តរាជធានី អាចរៀបចំពិធីបុណ្យអុំទូក តាមលទ្ធភាពជាក់ស្តែង​។

ក្នុងសេចក្តីប្រកាស រាជរដ្ឋាភិបាល មិនបានបញ្ជាក់ពីមូលហេតុ ដែលនាំដល់​ការសម្រេច​ផ្អាក​ព្រះរាជពិធីបុណ្យអុំទូក នៅឆ្នាំនេះ ដែលត្រូវធ្វើនាថ្ងទី៧-៩ ខែវិច្ឆិកា ឆ្នាំ២០២២ ឡើយ។ ប៉ុន្តែ​តាមកម្មវិធីដែលបានគ្រោងទុក រាជរដ្ឋាភិបាល​កម្ពុជា ក្នុងនាមជាប្រធានអាស៊ាន ត្រូវរៀបចំ​កិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ ៣ថ្ងៃ នៅថ្ងៃទី១០-១៣ ខែ​វិច្ឆិកា ឆ្នាំ២០២២​៕