ខេត្តពោធិ៍សាត់ ​រៀបចំពិធីបុណ្យអុំទូក ​៣ថ្ងៃ ចាប់ពីថ្ងៃទី១៦-១៨ ខែតុលា

 ខេត្តពោធិ៍សាត់៖ រដ្ឋបាលខេត្តពោធិ៍សាត់ បានប្រកាសពីការរៀបចំ​ព្រឹត្តិការណ៍ពិធីបុណ្យអុំទូក បណ្តែតប្រទីប​​ និងសំពះព្រះខែ អកអំបុក រយៈពេល ៣ថ្ងៃ ចាប់ពីថ្ងៃទី១៦ ដល់ថ្ងៃទី១៨ ខែតុលា ឆ្នាំ២០២២ នៅក្នុងខេត្តពោធិ៍សាត់​។

តាមសេចក្តីជូនដំណឹង ព្រឹត្តិការណ៍ពិធីបុណ្យអុំទូក បណ្តែតប្រទីប និងសំពះព្រះខែ អក​អំបុក ដែលគ្រោងរៀបចំ​ ៣ថ្ងៃនេះ មានកម្មវិធីជាអាទិ៍ ពិធីប្រណាំងទូក ពិធីបណ្តែត​ប្រទីប ពិធីអកអំបុក និងសំពះព្រះខែ ដែលជាទំនៀមទម្លាប់​ប្រពៃណីដ៏ល្អផូរផង់ តាំងពីបុរាណ​កាល ព្រមទាំង​មានពិធីមួយចំនួនទៀត ដូចជា ពិព័រណ៍សមិទ្ធផល​ភូមិមួយផលិតផល​មួយរបស់​បណ្តាក្រុង​ស្រុកមន្ទីរអង្គភាពជុំវិញខេត្ត ផ្ទាំង​ទស្សនីយភាពសិល្បៈ ការប្រគុំ​តន្ត្រីសម័យ និងការដុតកាំជ្រួច​ នាពេលរាត្រីរយៈពេល ៣ថ្ងៃពេញ​៕