លោកប្រធា​នា​ធិបតីPutinបានបង្ហាញព័ត៌មា​នពិសេ​សនៅក្នុងកា​រសន្ទនាតាមទូរស័ព្ទជា​មួយលោ​​កTrump

ព្រឹត្តិការណ៍៖ស្ថានភាពសង្គ្រាមរុស្ស៊ី-អ៊ុយក្រែន

ប្រធានាធិបតីរុស្ស៊ី លោកVladimir Putin បានជូនដំណឹងដល់ប្រធានាធិបតីអាមេរិក លោកDonaldTrumpអំពីការវាយប្រហារភេរវករនៅទីក្រុងម៉ួស្គូនៅមុនថ្ងៃគម្រប់ខួបនៃជ័យជម្នះលើពួកណាស៊ីក្នុងសង្គ្រាមលោកលើកទី២(ថ្ងៃទី៩ ឧសភា) និងបានរិះគន់អ៊ុយក្រែន។យោងតាមលោក Yury Ushakov ជំនួយការប្រធានាធិបតីរុស្ស៊ី ព័ត៌មាននេះត្រូវបានបញ្ចូលនៅក្នុងការសន្ទនាតាមទូរស័ព្ទកាលពីថ្ងៃទី១៩ខែឧសភា រវាងមេដឹកនាំទាំងពីរនៃប្រទេសរុស្ស៊ីនិងសហរដ្ឋអាមេរិក។

ទីភ្នាក់ងារសារព័ត៌មាន RT បានដកស្រង់សម្តីលោក Ushakov នៅថ្ងៃទី២០ ខែឧសភា ដោយនិយាយថា លោកប្រធានាធិបតី Putin បានប្រាប់សមភាគីអាមេរិករបស់លោក Trumpថា "ការគំរាមកំហែងនៃការវាយប្រហារភេរវកម្មនៅកណ្តាលទីក្រុងម៉ូស្គូ នៅជិតវិមានក្រឹមឡាំងនិងទីលានក្រហមត្រូវបានរារាំង"មុនពេលក្បួនដង្ហែរដើម្បីអបអរសាទរខួបលើកទី៨០នៃជ័យជំនះលើពួកណាស៊ីអាល្លឺម៉ង់ក្នុងសង្គ្រាមលោកលើកទីពីរ (ថ្ងៃទី៩ឧសភា)។ទន្ទឹមនឹងនេះ លោកPutin បានចោទប្រកាន់ "ភាគីអ៊ុយក្រែនថាបានគំរាមកំហែងដោយផ្ទាល់ដល់ជនបរទេសដែលមកចូលរួមក្នុងទិវាជ័យជំនះ និងព្យាយាមរារាំងពួកគេមិនឱ្យមកទីក្រុងម៉ូស្គូ" ។

ប្រធានាធិបតី​អាមេរិក Donald Trump (ឆ្វេង)និង​ប្រធានាធិបតី​រុស្ស៊ី Vladimir Putin។ រូបថត៖ EPA

ជាក់ស្តែង នៅមុនការប្រារព្ធពិធីថ្ងៃទី ៩ ឧសភា នៅទីក្រុងមូស្គូ ប្រធានាធិបតីអ៊ុយក្រែន លោក Volodymyr Zelensky បាននិយាយថា ក្រុងគៀវ មិនអាចធានាសុវត្ថិភាពរបស់មន្ត្រីបរទេសដែលមកទស្សនារដ្ឋធានីរុស្ស៊ីនោះទេ។ ទោះយ៉ាងណាក៏ដោយមេដឹកនាំនៃប្រទេសចំនួន២៨នៅតែមានវត្តមាននៅក្នុងព្រឹត្តិការណ៍នេះ។ក្នុង​ចំណោម​ប្រទេស​ដែល​បាន​បញ្ជូន​តំណាង​ទៅ​ទីក្រុង​ម៉ូស្គូ​មាន​ប្រទេស​ចិន ប្រេស៊ីល អេហ្ស៊ីប វេណេហ្ស៊ុយអេឡា គុយបា ស៊ែប៊ី ស្លូវ៉ាគី បេឡារុស និង​ប្រទេស​អាហ្វ្រិក និង​អាស៊ី។ មេដឹកនាំវិមានក្រឹមឡាំងបានសរសើរ "ភាពក្លាហានខាងនយោបាយ" របស់អ្នកដែលចូលរួមក្នុងព្រឹត្តិការណ៍នេះ។នៅក្នុងកិច្ចសន្ទនាតាមទូរស័ព្ទជាមួយលោក Trump នៅថ្ងៃទី១៩ខែឧសភា លោក Putin បានជូនដំណឹងថា មុនពេលខួបលើកទី៩ខែឧសភា និងបទឈប់បាញ់រយៈពេល៣ ថ្ងៃដែលត្រូវបានប្រកាសដោយឯកតោភាគីដោយទីក្រុងម៉ូស្គូ កងកម្លាំងគៀវបានបាញ់បង្ហោះយន្តហោះគ្មានមនុស្សបើកអត្តឃាត (UAV) ជាង៥០០ និងកាំជ្រួច Cruise Storm Shadow ដែលផ្តល់ដោយចក្រភពអង់គ្លេស សំដៅលើតំបន់ជាច្រើននៃប្រទេសរុស្ស៊ីក៏ដូចជារដ្ឋធានីម៉ូស្គូផងដែរ។ទោះយ៉ាងណាក៏ដោយ ភាគច្រើននៃ UAV និងមីស៊ីលរបស់អ៊ុយក្រែនត្រូវបានស្ទាក់ចាប់ដោយរុស្ស៊ី។អ៊ុយក្រែន​មិន​ទាន់​ធ្វើ​អត្ថាធិប្បាយ​ជុំវិញ​ព័ត៌មាន​ខាង​លើ​នៅ​ឡើយ​ទេ៕ពុតសាម៉ាត់