CPPនឹ​ងបញ្ចូនគ​ណៈប្រតិភូរ​បស់ខ្លួនទៅចូលរួមសង្កេត​ដំណើ​រការបោះឆ្នោត​នៅ​មីយ៉ាន់ម៉ា

 គណបក្សប្រជាជនកម្ពុជា(CPP)នឹងបញ្ចូនគណៈប្រតិភូរបស់ខ្លួនទៅចូលរួមសង្កេតដំណើរការបោះឆ្នោតនៅមីយ៉ាន់ម៉ាដែលគ្រោងធ្វើនៅខែវិច្ឆិកាឆ្នាំ២០២៥ តាមសំណើរបស់គណបក្សសហភាពសាមគ្គីនិងអភិវឌ្ឍន៍ (USDP)ប្រទេសមីយ៉ាន់ម៉ា។ព័ត៌មាននេះត្រូវបានលើកឡើងនៅក្នុងជំនួបរវាងសម្តេច ហ៊ុន សែន ប្រធានគណបក្សប្រជាជនកម្ពុជា និងលោក Khin Yi ប្រធានគណបក្ស USDP នៅរាជធានីភ្នំពេញ កាលពីថ្ងៃទី២២ ខែវិច្ឆិកានៅអំឡុងមហាសន្និបាតលើកទី១២នៃបណ្តាគណបក្សនយោបាយនៅអាស៊ី (ICAPP)។សម្តេច ហ៊ុន សែន ក៏​បាន​ឯកភាព​តាម​សំណើ​សុំ​ឲ្យ​មាន​កិច្ច​ព្រមព្រៀង​រវាង​គណបក្ស​ប្រជាជន​កម្ពុជា និងគណបក្ស​ USDP ដើម្បី​ពង្រឹង​ទំនាក់​ទំនង​ទ្វេភាគី​។ចំណែក​លោក Khin Yi ក៏បានកោតសរសើរចំពោះការរៀបចំការបោះឆ្នោតនៅកម្ពុជា ដែលមានលក្ខណៈសេរី ត្រឹមត្រូវ និងយុត្តិធម៌ ប្រកបដោយតម្លាភាព និងសណ្តាប់ធ្នាប់ល្អជាទីបំផុត ដោយកន្លងមកសហការីរបស់ឯកឧត្តម បានចូលរួមសង្កេតដំណើរការបោះឆ្នោតនៅកម្ពុជាក្នុងក្របខណ្ឌ ICAPP និងទទួលបាននូវបទពិសោធន៍ល្អៗជាច្រើន។

នៅថ្ងៃដដែលនោះ សម្តេចហ៊ុន សែន ប្រធានព្រឹទ្ធសភាកម្ពុជា ក៏បានទទួលជួបលោក Zafer Sirakaya អនុប្រធានគណបក្សយុត្តិធម៌ និងអភិវឌ្ឍន៍ (AK Parti) នៃសាធារណរដ្ឋតួកគី។ភាគីទាំងពីរបានវាយតម្លៃខ្ពស់អំពីវឌ្ឍនភាពក្នុងទំនាក់ទំនងរវាងប្រទេសទាំងពីរ និងមានសុទិដ្ឋិនិយមថា ពាណិជ្ជកម្មទ្វេភាគីនឹងឈានដល់គោលដៅ១ពាន់លានដុល្លារអាមេរិក ដែលមេដឹកនាំកំពូលរបស់ប្រទេសទាំងពីរបានកំណត់ក្នុងឆ្នាំ ២០១៨។សម្តេចហ៊ុនសែនក៏បានជម្រាបពីគម្រោងដំណើរបំពេញទស្សនកិច្ចរបស់លោក​នៅ​ប្រទេសតួកគី ក្នុង​ពេល​ដ៏ខ្លីខាងមុខ ហើយលោក Zafer Sirakaya បាន​លើក​ឡើង​ពី​លទ្ធភាព​នៃ​ការ​បង្កើត​ជើងហោះហើរ​ត្រង់​រវាង​ប្រទេស​ទាំង​ពីរ ផងដែរ។ការផ្លាស់ប្តូរពាណិជ្ជកម្មរវាងកម្ពុជា និងតួកគីសម្រេចបាន២៣៧ លានដុល្លារក្នុងឆ្នាំ ២០២៣ កើនឡើងពី ១៥២ លានដុល្លារក្នុងឆ្នាំ ២០២២៕សហការី