នាយករដ្ឋមន្ត្រីស្លូវ៉ាគីបានព្រមានថាហានិភ័យនៃជម្លោះពិភពលោកនឹងកើនឡើង។ប្រសិនបើអ៊ុយក្រែនក្លាយជាផ្នែកមួយនៃអង្គការសន្ធិសញ្ញាអាត្លង់ទិកខាងជើង(NATO)ហើយបានសន្យាថានឹងទប់ស្កាត់បញ្ហានេះ។
 |
| នាយករដ្ឋមន្រ្តីស្លូវ៉ាគីលោក Robert Fico ។ រូបថត៖Reuters |
ការចូលប្រទេសថ្មីទៅអង្គការណាតូតម្រូវឱ្យមានការយល់ព្រមពីសមាជិកបច្ចុប្បន្នទាំង៣២នៃសម្ព័ន្ធភាពយោធាដឹកនាំដោយអាមេរិក។ នាយករដ្ឋមន្ត្រីស្លូវ៉ាគីលោក Robert Fico បាននិយាយថា ប្រសិនបើអ៊ុយក្រែនត្រូវបានអញ្ជើញឱ្យចូលរួមជាមួយអង្គការណាតូ សភាស្លូវ៉ាគីនឹងមិនផ្តល់សច្ចាប័នលើសន្ធិសញ្ញាចូលជាសមាជិកនោះទេ។កាសែតអនឡាញNoviny.skបានដកស្រង់សម្តីនាយករដ្ឋមន្ត្រីស្លូវ៉ាគីកាលពីថ្ងៃទី១៦ខែមេសា ដោយពន្យល់ថា៖ «ស្លូវ៉ាគីត្រូវការអ៊ុយក្រែនអព្យាក្រឹត។ ផលប្រយោជន៍របស់យើងនឹងត្រូវរងការគំរាមកំហែងប្រសិនបើអ៊ុយក្រែនក្លាយជាសមាជិកណាតូព្រោះនោះជាមូលដ្ឋាននៃជម្លោះពិភពលោកដ៏ធំ»។ លោក Fico ក៏បានសង្កត់ធ្ងន់ថារដ្ឋាភិបាលរបស់លោកនឹងមិនចុះចាញ់នឹងសម្ពាធណាមួយពីខាងក្រៅឡើយ។យោងតាមសារព័ត៌មានRTប្រទេសស្លូវ៉ាគី រួមជាមួយនឹងប្រទេសជិតខាងហុងគ្រី បានណែនាំសហភាពអឺរ៉ុប (EU) មិនឱ្យទាញចូលទៅក្នុងជម្លោះរវាងរុស្ស៊ី និងអ៊ុយក្រែន ហើយទទូចឱ្យមានដំណោះស្រាយការទូត។បន្ទាប់ពីក្លាយជានាយករដ្ឋមន្ត្រីនៃប្រទេសស្លូវ៉ាគីក្នុងខែតុលា ឆ្នាំ២០២៣ លោក Fico បានផ្លាស់ប្តូរការសម្រេចចិត្តរបស់រដ្ឋាភិបាលមុនក្នុងការបញ្ជូនអាវុធទៅទីក្រុងគៀវ។លោកក៏បានប្រឆាំងយ៉ាងខ្លាំងចំពោះការបញ្ជូនទាហានណាតូទៅកាន់អ៊ុយក្រែន។អ៊ុយក្រែនបានដាក់ពាក្យចូលជាសមាជិកណាតូជាផ្លូវការនៅខែកញ្ញា ឆ្នាំ២០២២។ ទោះបីជារដ្ឋមន្ត្រីការបរទេសអាមេរិក លោក Antony Blinken បាននិយាយជាថ្មីក្នុងខែនេះថា អ៊ុយក្រែន "នឹងចូលរួមជាមួយអង្គការណាតូនាពេលអនាគត" ក៏ដោយ រហូតមកដល់ពេលនេះសម្ព័ន្ធភាពបានបដិសេធមិនធ្វើទៅតាមកាលវិភាគជាក់លាក់ឬផ្លូវច្បាស់លាស់សម្រាប់ការទទួលស្គាល់ប្រទេសនេះ។ប្រធានាធិបតីអាមេរិក Joe Biden និងអគ្គលេខាធិការអង្គការណាតូ លោក Jens Stoltenberg បានច្រានចោលការទទួលស្គាល់អ៊ុយក្រែន រហូតដល់ជម្លោះបញ្ចប់។រុស្ស៊ីបានបញ្ជាក់ម្តងហើយម្តងទៀតនូវទស្សនៈរបស់ខ្លួនចំពោះការបន្តពង្រីកទៅទិសខាងកើតរបស់ណាតូថាជាការគំរាមកំហែងសន្តិសុខជាតិ។ ទីក្រុងម៉ូស្គូបានលើកឡើងពីកិច្ចសហប្រតិបត្តិការយោធារបស់សម្ព័ន្ធភាពជាមួយអ៊ុយក្រែនថាជាមូលហេតុមួយក្នុងចំណោមមូលហេតុនៃជម្លោះបច្ចុប្បន្ន ហើយបានពណ៌នាអំពីការចូលរបស់អ៊ុយក្រែនទៅក្នុងអង្គការណាតូថាជា "បន្ទាត់ក្រហម"៕ពុតសាម៉ាត់
/unnamed.png
Post a Comment