កាលពីថ្ងៃអង្គារក្រសួងការបរទេសចិនបានប្រកាសថាអ្នកការទូតកំពូលរបស់ចិនលោកWang Yiនឹងបំពេញទស្សនកិច្ចនៅប្រទេសឥណ្ឌូនេស៊ី កម្ពុជានិងប៉ាពួញូហ្គីណេចាប់ពីថ្ងៃទី១៨ ដល់ថ្ងៃទី២៣ ខែមេសា។
 |
| អ្នកការទូតកំពូលរបស់ចិនលោកWang Yi។Reuters |
លោកLin Jianអ្នកនាំពាក្យក្រសួងការបរទេសបាននិយាយថា ក្នុងអំឡុងដំណើរទស្សនកិច្ចរយៈពេល៦ថ្ងៃ លោកWangនឹងចូលរួមកិច្ចប្រជុំយន្តការកិច្ចសហប្រតិបត្តិការការសន្ទនាកម្រិតខ្ពស់ជាមួយប្រទេសឥណ្ឌូនេស៊ីនិងចូលរួមកិច្ចប្រជុំនៃគណៈកម្មាធិការសម្របសម្រួលអន្តររដ្ឋាភិបាលចិន-កម្ពុជា។លោកLin បានលើកឡើងថាប្រទេសទាំង៣ជា “មិត្តល្អនិងដៃគូល្អ” ដោយផ្អែកលើការគោរពគ្នាស្មើភាពគ្នា ផ្តល់ផលប្រយោជន៍ទៅវិញទៅមក និងការអភិវឌ្ឍន៍រួមគ្នា។ លោកក៏បានកោតសរសើរចំពោះ “សន្ទុះនៃការអភិវឌ្ឍន៍ដ៏រឹងមាំ” នៃទំនាក់ទំនងរវាងប្រទេសចិននិងប្រទេសទាំង៣។លោក Lin បាននិយាយថា ប្រទេសចិនសង្ឃឹមថាដំណើរទស្សនកិច្ចរបស់លោកWangនឹងជួយអនុវត្តកុងសង់ស៊ីស ដែលលោក Xi Jinping បានឯកភាពគ្នាជាមួយមេដឹកនាំនៃប្រទេសទាំង៣ និងអនុវត្តគម្រោងគុណភាពខ្ពស់ក្រោមគំនិតផ្តួចផ្តើមខ្សែក្រវ៉ាត់និងផ្លូវ។ដំណើរទស្សនកិច្ចរបស់លោកWang បានធ្វើឡើងខណៈដែលប្រទេសចិនបង្កើនការទូតរបស់ខ្លួនជាមួយប្រទេសអាស៊ីអាគ្នេយ៍ចំពេលមានការប្រកួតប្រជែងជាយុទ្ធសាស្ត្រដែលមានភាពតានតឹងជាមួយសហរដ្ឋអាមេរិកក្នុងតំបន់អាស៊ីប៉ាស៊ីហ្វិក។លោកPrabowo Subiantoប្រធានាធិបតីដែលទើបជាប់ឆ្នោតរបស់ប្រទេសឥណ្ឌូនេស៊ី បានបំពេញទស្សនកិច្ចទៅកាន់ប្រទេសចិនកាលពីចុងខែមីនា។ ប្រទេសចិនគឺជាដៃគូពាណិជ្ជកម្មដ៏ធំបំផុតនិងជាវិនិយោគិនបរទេសធំទីពីររបស់ប្រទេសឥណ្ឌូណេស៊ី។ ឥណ្ឌូណេស៊ី គឺជាគោលដៅវិនិយោគធំទី២របស់ចិន បន្ទាប់ពីសិង្ហបុរី និងក្នុងចំណោមសមាជិកនៃសមាគមប្រជាជាតិអាស៊ីអាគ្នេយ៍ (អាស៊ាន)។ផ្លូវរថភ្លើងល្បឿនលឿន ហ្សាកាតា-បាន់ឌុង ដែលជាខ្សែរថភ្លើងល្បឿនលឿនដំបូងគេនៅអាស៊ីអាគ្នេយ៍ ត្រូវបានសាងសង់ឡើងដោយមូលនិធិរបស់ចិន។ ទីក្រុងប៉េកាំងបានសាទរដោយលើកឡើងថា វាជាឧទាហរណ៍ដ៏ជោគជ័យបំផុតមួយនៃយុទ្ធសាស្ត្រខ្សែក្រវ៉ាត់និងផ្លូវ ដែលជាផែនការរបស់ប្រទេសចិនក្នុងការកែលម្អហេដ្ឋារចនាសម្ព័ន្ធ និងការតភ្ជាប់នៅក្នុងតំបន់។ប្រទេសចិនក៏ជាដៃគូពាណិជ្ជកម្មកំពូលរបស់កម្ពុជា និងជាប្រភពនៃការនាំចូល ក៏ដូចជាប្រភពវិនិយោគបរទេស និងជំនួយបរទេសដ៏ធំបំផុតរបស់ខ្លួន។កាលពីឆ្នាំមុន លោកXiនិងអតីតនាយករដ្ឋមន្ត្រីនៃប្រទេសកម្ពុជា សម្តេចតេជោ ហ៊ុន សែន បានប្រកាសអំពីកិច្ចសហប្រតិបត្តិការត្បូងពេជ្រ (Diamond Hexagon) នៅទីក្រុងប៉េកាំង ក្នុងគោលបំណងបង្កើនទំនាក់ទំនងទ្វេភាគីក្នុងវិស័យនយោបាយ ផលិតភាព កសិកម្ម ថាមពល សន្តិសុខ និងការផ្លាស់ប្តូរប្រជាជន។ប្រទេសចិនកំពុងព្យាយាមមិនត្រឹមតែរក្សាឋានៈរបស់ខ្លួនជាដៃគូពាណិជ្ជកម្មកំពូលជាមួយប្រទេសប៉ាពួញូហ្គីណេ ដែលជាប្រទេសដែនកោះដ៏ធំជាងគេនៅប៉ាស៊ីហ្វិកខាងត្បូងប៉ុណ្ណោះទេ។ប៉ុន្តែថែមទាំងពង្រីកទំនាក់ទំនងរបស់ពួកគេទៅកាន់វិស័យជាច្រើនទៀត។ គេបានរាយការណ៍កាលពីខែមករាថា ទីក្រុងប៉េកាំង និងប៉ាពួញូហ្គីណេកំពុងចរចាកិច្ចព្រមព្រៀងស្តីពីកិច្ចសហប្រតិបត្តិការសន្តិសុខនិងនគរបាល។យោងតាមលោកLin បានឱ្យដឹងថា ប្រទេសចិនបានបង្កើនទំនាក់ទំនងរបស់ខ្លួនជាមួយឥណ្ឌូនេស៊ី និងកម្ពុជាដល់កម្រិតនៃការកសាង “សហគមន៍នៃជោគវាសនារួម”និងជំរុញទំនាក់ទំនងជាមួយប៉ាពួញូហ្គីណេទៅជា “ភាពជាដៃគូយុទ្ធសាស្ត្រគ្រប់ជ្រុងជ្រោយ”៕ប្រភព៖South China Morning Post
/unnamed.png
Post a Comment