កម្ពុជានិងចិនបានសង្កត់ធ្ងន់លើការប្តេជ្ញាចិត្តក្នុងការអនុវត្តយ៉ាងពេញលេញ និងប្រកបដោយប្រសិទ្ធភាពនូវសេចក្តីថ្លែងការណ៍ស្តីពីប្រតិបត្តិនៃភាគីនានានៅសមុទ្រចិនខាងត្បូងនិងជំរុញការពិគ្រោះយោបល់លើក្រមប្រតិបត្តិនៅសមុទ្រចិនខាងត្បូងសម្រាប់ការសន្និដ្ឋានជាជំហ៊ានដំបូងក្នុងអំឡុងដំណើរទស្សនកិច្ចផ្លូវការរបស់រដ្ឋមន្រ្តីការបរទេសចិននៅកម្ពុជាពីថ្ងៃអាទិត្យដល់ថ្ងៃអង្គារ។នេះបើតាមចេញផ្សាយ Global Times។
 |
|
រដ្ឋមន្ត្រីការបរទេសចិន លោក Wang Yi បានបញ្ចប់ដំណើរទស្សនកិច្ចផ្លូវការនៅកម្ពុជារយៈពេលបីថ្ងៃ ដោយក្នុងឱកាសនោះ លោកបានចូលគាល់ព្រះករុណា ព្រះមហាក្សត្រ នរោត្តម សីហមុនី សម្តេចហ៊ុន សែន ប្រធានព្រឹទ្ធសភា សម្តេចហ៊ុន ម៉ាណែត នាយករដ្ឋមន្ត្រី លោក សុខ ចិន្តាសោភា ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងបានធ្វើជាសហប្រធានដឹកនាំកិច្ចប្រជុំលើកទី៧ នៃគណៈកម្មាធិការសម្របសម្រួលអន្តររដ្ឋាភិបាលកម្ពុជា-ចិន ជាមួយលោកស៊ុន ចាន់ថុល ឧបនាយករដ្ឋមន្ត្រី ។ភាគីទាំងពីរបានឯកភាពគ្នាថា ចិននិងកម្ពុជាជាមិត្តដែកថែបដែលតែងតែគាំទ្រគ្នា និងជួយគ្នាក្នុងគ្រាលំបាក។ ក្រោមការចង្អុលបង្ហាញជាយុទ្ធសាស្ត្ររបស់មេដឹកនៃប្រទេសទាំងពីរ ភាគីទាំងពីរបានខិតខំប្រឹងប្រែងកសាងសហគមន៍ចិន-កម្ពុជាដែលមានជោគវាសនារួមគ្នាប្រកបដោយភាពស៊ីជម្រៅ និងជាក់ស្តែង។ភាគីទាំងពីរក៏បានពង្រឹងនូវក្របខ័ណ្ឌកិច្ចសហប្រតិបត្តិការត្បូងពេជ្រ និងធ្វើឱ្យមានវឌ្ឍនភាពជាវិជ្ជមានក្នុងការកសាង “ច្រករបៀងឧស្សាហកម្ម និងបច្ចេកវិទ្យា” និង “ច្រករបៀងត្រី និងអង្ករ” ដែលនាំមកនូវផលប្រយោជន៍ជាក់ស្តែងដល់ប្រជាជាតិទាំងពីរ។ភាគីចិនបានបញ្ជាក់ជាថ្មីនូវការគាំទ្រចំពោះជម្រើសរបស់កម្ពុជាលើមាគ៌ាអភិវឌ្ឍន៍ដែលសមស្របនឹងលក្ខខណ្ឌជាតិ និងគាំទ្រដល់កិច្ចខិតខំប្រឹងប្រែងរបស់កម្ពុជាដើម្បីការពារអធិបតេយ្យភាពជាតិ សន្តិសុខ និងផលប្រយោជន៍នៃការអភិវឌ្ឍន៍។ ចិនក៏បានបញ្ជាក់ជាថ្មីពីការប្រឆាំងយ៉ាងដាច់ខាតចំពោះការជ្រៀតជ្រែកពីខាងក្រៅក្នុងកិច្ចការផ្ទៃក្នុងរបស់កម្ពុជា។ភាគីកម្ពុជាបានបញ្ជាក់ជាថ្មីពីការប្តេជ្ញាចិត្តចំពោះគោលនយោបាយចិនតែមួយ និងទទួលស្គាល់ថាសាធារណៈរដ្ឋប្រជាមានិតចិន គឺជារដ្ឋាភិបាលស្របច្បាប់តែមួយគត់តំណាងឱ្យប្រទេសចិនទាំងមូល ហើយកោះតៃវ៉ាន់គឺជាផ្នែកដែលមិនអាចកាត់ផ្តាច់បានពីប្រទេសចិន។កម្ពុជាបានបញ្ជាក់ជាថ្មីពីការប្តេជ្ញាចិត្តចំពោះគោលនយោបាយចិនតែមួយ ដោយបន្ថែមថា កម្ពុជាប្រឆាំងរាល់ការប៉ុនប៉ងប្រើប្រាស់បញ្ហានានារបស់តៃវ៉ាន់ដើម្បីជ្រៀតជ្រែកកិច្ចការផ្ទៃក្នុងរបស់ចិន ប្រឆាំងគ្រប់ទម្រង់នៃ “ឯករាជ្យភាពរបស់តៃវ៉ាន់” គាំទ្រយ៉ាងមុតមាំរាល់កិច្ចខិតខំប្រឹងប្រែងរបស់ប្រទេសចិន ដើម្បីសម្រេចបាននូវការបង្រួបបង្រួមជាតិ និងមិនបង្កើតទំនាក់ទំនងផ្លូវការណាមួយជាមួយតៃវ៉ាន់នោះទេ។ភាគីទាំងពីរបានឯកភាពពង្រឹងកិច្ចសហប្រតិបត្តិការលើវិស័យការពារជាតិ បន្តធ្វើសមយុទ្ធ និងការហ្វឹកហ្វឺនរួមគ្នា ជំរុញកិច្ចសហប្រតិបត្តិការលើវិស័យដូចជា សេវាសុខាភិបាល និងភស្តុភារកម្ម ការបណ្តុះបណ្តាលបុគ្គលិក ការបោសសម្អាតមីន ព្រមទាំងរួមគ្នាប្រយុទ្ធប្រឆាំងនឹងឧក្រិដ្ឋកម្មឆ្លងដែន ដូចជាល្បែងស៊ីសងតាមប្រព័ន្ធអ៊ីនធឺណែត ការក្លែងបន្លំតាមទូរគមនាគមន៍ និងការជួញដូរគ្រឿងញៀន។ភាគីទាំងពីរក៏បានឯកភាពគ្នាក្នុងការបន្ស៊ីគំនិតផ្តួចផ្តើមខ្សែក្រវាត់ និងផ្លូវ និងយុទ្ធសាស្ត្របញ្ចកោណដំណាក់កាលទី ១អោយកាន់តែស៊ីជម្រៅ ពន្លឿនការបង្កើតផែនការសហប្រតិបត្តិការសម្រាប់ច្រករបៀងអភិវឌ្ឍន៍ឧស្សាហកម្ម ជំរុញការរៀបចំផែនការគោល និងការរៀបចំផ្លូវដែកកម្ពុជា-ចិន និងមជ្ឈមណ្ឌលធ្វើនិទស្សន៍កសិកម្មចិន និងគម្រោងប្រមូលផលដើមដៃផ្សេងទៀតនៃច្រករបៀងត្រី និងអង្ករ។ភាគីទាំងពីរនឹងធ្វើការធានាអោយបាននូវការអនុវត្តកិច្ចព្រមព្រៀងពាណិជ្ជកម្មសេរីចិន-កម្ពុជា ប្រកបដោយគុណភាពខ្ពស់ ជំរុញការនាំចេញកសិផលកម្ពុជាទៅកាន់ប្រទេសចិន និងលើកទឹកចិត្តឱ្យធុរកិច្ចចិនមកបណ្តាក់ទុននៅកម្ពុជាអោយកាន់តែច្រើន។ភាគីទាំងពីរក៏បានឯកភាពឆ្លៀតក្នុងការចាប់យកកាលានុវត្តភាពនៃឆ្នាំផ្លាស់ប្តូរប្រជាជនចិន-កម្ពុជាឆ្នាំ ២០២៤ ដើម្បីបង្កើនការផ្លាស់ប្តូរទេសចរណ៍ ជើងហោះហើរទ្វេទិស និងដាក់ចេញបន្ថែមនូវការផ្លាស់ប្តូររវាងយុវជន ប្រជាជនមូលដ្ឋាន និងក្រុមមិត្តភាព។កម្ពុជានឹងគាំទ្រដល់ការបើកដំណើរការឡើងវិញនូវមជ្ឈមណ្ឌលវប្បធម៌ចិននៅកម្ពុជា។ជាមួយគ្នានេះ ភាគីទាំងពីរបានបញ្ជាក់ជាថ្មីនូវការត្រៀមខ្លួនជាស្រេចដើម្បីធ្វើកិច្ចសហប្រតិបត្តិការក្រោមក្របខណ្ឌនៃគំនិតផ្តួចផ្តើមអភិវឌ្ឍន៍សកល គំនិតផ្តួចផ្តើមសន្តិសុខសកល និងគំនិតផ្តួចផ្តើមអារ្យធម៌សកល ព្រមទាំងបង្កើនការសម្របសម្រួល និងកិច្ចសហប្រតិបត្តិការបន្ថែមទៀតនៅក្នុងវេទិកាដូចជាកិច្ចសហប្រតិបត្តិការមេគង្គ-ឡានឆាង និងកិច្ចសហប្រតិបត្តិការចិន-អាស៊ាន។ភាគីទាំងពីរបានឯកភាពក្នុងការបម្រើផលប្រយោជន៍រួមរបស់ប្រទេសក្នុងតំបន់ដើម្បីការពារសន្តិភាព និងស្ថិរភាពដែលរកបានដោយលំបាក ហើយជំរុញការអភិវឌ្ឍន៍ និងវិបុលភាពក្នុងតំបន់៕
/unnamed.png
Post a Comment