គណបក្សប្រជាជនកម្ពុជាផ្លាស់ប្ដូរLogoថ្មីដោយបន្ថែមរូបសម្តេចហ៊ុន ម៉ាណែត
គណបក្សប្រជាជនកម្ពុជា(CPP)សម្រេចផ្លាស់ប្ដូរ Logoថ្មីដោយបន្ថែមរូបថតសម្តេចនាយករដ្ឋមន្ត្រី ហ៊ុន ម៉ាណែតសម្រាប់ប្រារព្ធខួប៤៥ នៃទិវាជ័យជម្នះ ៧មករានិងសម្រាប់ការឃោសនាបោះឆ្នោតទាំងថ្នាក់ជាតិ និងថ្នាក់ក្រោមជាតិខាងមុខ។ខុទ្ទការិយាល័យនៃគណៈកម្មាធិការកណ្តាលគណបក្សប្រជាជនកម្ពុជាកាលពីថ្ងៃអាទិត្យជូនដំណឹងថា គណបក្សសម្រេចផ្លាស់ប្ដូរ Logo ថ្មីដែលមានរូបថ្នាក់ដឹកនាំចំនួន៣រូបរួមមានសម្តេចហ៊ុន សែន ប្រធានគណបក្សប្រជាជនកម្ពុជា និងមានអនុប្រធានគណបក្សចំនួន២រូប គឺសម្តេចហេង សំរិន និងសម្តេច ហ៊ុន ម៉ាណែត។
 |
| រូបភាព Logo ថ្មីរបស់គណបក្សប្រជាជនសម្រាប់ថ្ងៃ ៧ មករា។រូបភាពCPP/KhmerTimes |
ខុទ្ទការិយាល័យបន្ថែមថា ការដាក់ឱ្យប្រើប្រាស់ Logo ថ្មីខាងលើនេះ សម្រាប់ប្រារព្ធខួប៤៥ នៃទិវាជ័យជម្នះ ៧មករា ឆ្នាំ២០២៤ និងប្រើប្រាស់សម្រាប់ការឃោសនាបោះឆ្នោតទាំងសាកលនិងអសកលនាពេលខាងមុខ។សូមជម្រាបជូនថាកាលសម្តេចជា ស៊ីម អតីតប្រធានគណបក្សប្រជាជនកម្ពុជានៅមានជីវិតគណបក្សកាន់អំណាចមួយនេះ បានប្រើប្រាស់ Logo ដោយមានរូបសម្តេច ហេង សំរិន សម្តេចជា ស៊ីម និងសម្តេច ហ៊ុន សែន ដើម្បីធ្វើការឃោសនាបោះឆ្នោត រម្លឹកខួបអនុស្សាវរីយ៍របស់គណបក្ស និងប្រារព្ធទិវាជ័យជម្នះ ៧មករា ជាដើម។ក្រោយពីសម្តេច ជា ស៊ីម ទទួលមរណភាពកាលពីថ្ងៃទី៨ ខែមិថុនា ឆ្នាំ២០១៥ គណបក្សប្រជាជនកម្ពុជា សម្រេចដករូបលោក ជា ស៊ីម ចេញពី Logo ដោយរក្សាត្រឹមតែរូបសម្តេចហេង សំរិន និងសម្តេច ហ៊ុន សែន ដែលឡើងពីអនុប្រធាន ទៅជាប្រធានគណបក្សកាលពីថ្ងៃទី២០ ខែមិថុនា ឆ្នាំ២០១៥។គិតចាប់ពីទី១៧ ខែធ្នូ ឆ្នាំ២០២៣ គណបក្សប្រជាជនកម្ពុជា សម្រេចប្រើប្រាស់ Logo ថ្មីដោយបន្ថែមរូបសម្តេចហ៊ុន ម៉ាណែត អនុប្រធានគណបក្សប្រជាជនកម្ពុជា និងជានាយករដ្ឋមន្ត្រី ដើម្បីរដ្ឋបាលរាជធានី ខេត្ត ក្រុង ស្រុក និងស្ថាប័នពាក់ព័ន្ធ ប្រើប្រាស់ជាផ្លូវការ។អ្នកនាំពាក្យគណបក្សប្រជាជនកម្ពុជា លោក សុខ ឥសាន ប្រាប់ខ្មែរថាមស៍ កាលពីម្សិលមិញថា ការដាក់ឱ្យប្រើប្រាស់ Logo ថ្មីដោយបន្ថែមរូបសម្តេចហ៊ុន ម៉ាណែត មិនមានការជំទាស់ផ្ទៃក្នុងរបស់គណបក្សនោះទេ ព្រោះអ្វីៗដែលគណបក្សបានធ្វើ គឺសុទ្ធតែមានការឯកភាពផ្ទៃក្នុងគណបក្សទាំងមូល។លោកបន្តថា កាលពីថ្មីៗនេះ លោក ហ៊ុន ម៉ាណែត ទើបតែត្រូវបានគណៈកម្មាធិការកណ្ដាលនៃគណបក្សសម្រេចតែងតាំងជាអនុប្រធានគណបក្ស។ដូច្នេះការផ្សព្វផ្សាយដាក់ឱ្យប្រើប្រាស់ Logo ថ្មីខាងលើនេះ គឺជាសិទ្ធិរបស់គណបក្ស ដើម្បីផ្សព្វផ្សាយឱ្យមហាជន និងប្រជាជនបានដឹង ជាពិសេសជាការសំណូមពរចាំបាច់របស់គណបក្សដែលសម្តេច ហ៊ុន ម៉ាណែត ជាមេដឹកនាំវ័យក្មេងដែលត្រូវបន្តវេន។លោក សុខ ឥសាន បន្ថែមថា មូលហេតុដែលគណបក្សមិនដាក់រូបអ្នកនយោបាយតស៊ូចាស់វស្សាឬអ្នកនយោបាយតស៊ូចេញពីរបបខ្មែរក្រហម ឬក៏អនុប្រធានគណបក្សផ្សេងទៀត ដោយសារអ្នកទាំងនោះមានវ័យចំណាស់ ដែលគណបក្សត្រូវរៀបចំឥស្សរជនវ័យក្មេងឈាមថ្មី ដើម្បីបន្តវេន។លោកបញ្ជាក់ថា៖ «យើងបានដឹងហើយថា គណបក្សប្រជាជនកម្ពុជា បានផ្លាស់ប្ដូរទាំងស្រុងពីអ្នកចាស់ ផ្លាស់មកឈាមថ្មីនៅគ្រប់ក្រសួង ស្ថាប័នរបស់រដ្ឋ អ៊ីចឹងផ្ទៃក្នុងរបស់គណបក្សក៏គេត្រៀមដែរ ដើម្បីឱ្យក្មេងជំនាន់ក្រោយត្រៀមលក្ខណៈបន្តវេនដឹកនាំគណបក្សទៅមុខទៀត […] និងស្របតាមសភាពការណ៍ថ្មី»។លោកបន្តថា ការបន្ថែមរូបសម្តេចហ៊ុន ម៉ាណែត នឹងធ្វើឱ្យគណបក្សកាន់តែមានប្រជាប្រិយភាព ព្រោះកាលបោះឆ្នោតជ្រើសតាំងតំណាងរាស្ត្រ នីតិកាលទី៧ កាលពីខែកក្កដា បានបញ្ជាក់កាន់តែច្បាស់អំពីប្រជាប្រិយភាពរបស់ថ្នាក់ដឹកនាំគណបក្ស ដែលបានជាប់ឆ្នោតយ៉ាងភ្លូកទឹកភ្លូកដី។លោក សុខ ឥសាន បន្ថែមថា ការឈ្នះឆ្នោតយ៉ាងភ្លូកទឹកភ្លូកដីបែបនេះ គឺជាការឆ្លុះបញ្ចាំងពីប្រជាប្រិយភាពរបស់ឥស្សរជនវ័យក្មេង ដូច្នេះការដាក់រូបសម្តេចហ៊ុន ម៉ាណែត បន្ថែមនៅលើ Logo ថ្មីក៏មានឥទ្ធិពលសម្រាប់ការបោះឆ្នោតអសកលនាថ្ងៃខាងមុខផងដែរ៕
/unnamed.png
Post a Comment