ប្រមុខរដ្ឋាភិបាលកម្ពុជាបានផ្ញើសារលិខិតអបអរសាទរវេទិកានិពន្ធនាយកសារព័ត៌កម្ពុជាមានលើកទី២០ក្រោមប្រធានបទ «ក្រមសីលធម៌និងវិជ្ជាជីវសារព័ត៌មាន» ដែលរៀបចំធ្វើដោយក្លិបអ្នកកាសែតកម្ពុជានៅថ្ងៃព្រហស្បតិ៍នេះព្រមទាំងអំពាវនាវដល់និពន្ធនាយកសារព័ត៌មានជួយរដ្ឋាភិបាតាមរយៈការផ្ដល់ព័ត៌មានពិតដល់សារព័ត៌មានជនជាតិអន្តរជាតិអំពីស្ថានការណ៍ពិតនៅកម្ពុជានិងជួយផ្សព្វផ្សាយគោលនយោបាយរបស់រដ្ឋាភិបាលទៅកាន់ប្រជាពលរដ្ឋនិងនាំព័ត៌មានពីពលរដ្ឋមកកាន់រដ្ឋាភិបាល ដើម្បីដោះស្រាយបញ្ហាទាន់ពេលវេលានិងប្រសិទ្ធភាពខ្ពស់។
 |
|
វេទិកានិពន្ធនាយកសារព័ត៌មានកម្ពុជាលើកទី២០រៀបចំឡើង ដើម្បីផ្ដល់ឱកាសដល់ថ្នាក់ដឹកនាំស្ថាប័នសារព័ត៌មាន ក៏ដូចជានិពន្ធនាយកមកពីអង្គភាពសារព័ត៌មាននានាបានជួបជុំពិភាក្សាផ្លាស់ប្តូរយោបល់ ចែករំលែកបទពិសោធ និងដោះស្រាយបញ្ហាប្រឈមនាពេលកន្លងមក ព្រមទាំងដាក់ចេញទិសដៅសម្រាប់ការអនុវត្តនៅពេលខាងមុខពាក់ព័ន្ធនឹងការលើកកម្ពស់ការអនុវត្តក្រមសីលធម៌វិជ្ជាជីវៈសារព័ត៌មាន។នៅក្នុងសារលិខិតដែលបានផ្សព្វផ្សាយពីម្សិលមិញ សម្តេចនាយករដ្ឋាមន្ត្រី ហ៊ុន ម៉ាណែត បានថ្លែងកោតសរសើរដល់ស្ថាប័នព័ត៌មាននិងអ្នកសារព័ត៌មានដែលបានគាំទ្រគោលនយោបាយរដ្ឋាភិបាល។ជាពិសេសគោលនយោបាយរដ្ឋាភិបាលនីតិកាលទី៧។សម្តេចបានលើកឡើងថា នេះជាកម្លាំងចលករដែលបានចូលរួមចំណែកថែរក្សាសុខសន្តិភាពនិងការកសាងប្រទេសមានការរីកចម្រើនប្រកបដោយចីរភាពដោយសម្លឹងឆ្ពោះទៅបង្គោលចរណ៍ «ចក្ខុវិស័យកម្ពុជាឆ្នាំ២០៥០»។សម្តេចបានកត់ស្គាល់ថាកន្លងមកអ្នកសារព័ត៌មានបានខិតខំចុះយកព័ត៌មានមកផ្សព្វផ្សាយបានទាន់សភាពការណ៍និងទូលំទូលាយក្នុងក្របខណ្ឌជាតិនិងអន្តរជាតិ។ជាពិសេសព្រឹត្តិការណ៍ធំៗជាប្រវត្តិសាស្ត្រដូចជាកិច្ចប្រជុំកំពូលអាស៊ាន ព្រឹត្តិការណ៍បោះឆ្នោត ព្រឹត្តិការណ៍ស៊ីហ្គេម និងព្រឹត្តិការណ៍ព្រះរាជពិធីបុណ្យអុំទូកជាដើម។ សមិទ្ធផលដ៏ធំធេងនេះ គឺមានការចូលរួមយ៉ាងសកម្មពីស្ថាប័នសារព័ត៌មាននិងអ្នកសារព័ត៌មាន។សម្តេចហ៊ុន ម៉ាណែត បាននិយាយថា៖ «នេះបង្ហាញពីភាពជាដៃគូដែលមិនអាចខ្វះបានរវាងរាជរដ្ឋាភិបាលជាមួយស្ថាប័នព័ត៌មាន។ រាជរដ្ឋាភិបាលតែងតែយកចិត្តទុកដាក់លើកកម្ពស់សេរីភាពនៃការបញ្ចេញមតិ សេរីភាពសារព័ត៌មាន និងជំរុញឱ្យមានការបណ្ដុះបណ្ដាលផ្នែកសារព័ត៌មាន»។សម្តេចបានលើកឡើងថា រដ្ឋាភិបាលថ្មីបានបន្តការលើកលែងពន្ធប៉ាតង់សម្រាប់អ្នកសារព័ត៌មានអនឡាញប្រភេទធុនតូចរយៈពេល៥ឆ្នាំ (២០២៣-២០២៨) និងកាត់បន្ថយកម្រៃអាជ្ញាបណ្ណស្នើសុំបង្កើតអង្គភាពសារព័ត៌មានថ្មីនៅក្រសួងព័ត៌មានចំនួន៥០ភាគរយ ដើម្បីសម្រួលបន្ទុករបស់អ្នកសារព័ត៌មានដែលកំពុងរងផលប៉ះពាល់ពីវិបត្តិជំងឺកូវីដ-១៩ និងវិបត្តិសេដ្ឋកិច្ចសកល។សម្តេចនាយករដ្ឋមន្ត្រី ហ៊ុន ម៉ាណែត បានស្នើដល់វេទិកានិពន្ធនាយកសារព័ត៌មានកម្ពុជាចូលរួមជំរុញការអភិវឌ្ឍប្រព័ន្ធផ្សព្វផ្សាយនៅកម្ពុជាកាន់តែរីកចម្រើនមួយកម្រិតទៀត ។ជាពិសេសថ្នាក់ដឹកនាំស្ថាប័នសារព័ត៌មាននិងនាយកនិពន្ធសារព័ត៌មានរួមគ្នាដោះស្រាយបញ្ហាដោះស្រាយបញ្ហាប្រឈមពាក់ព័ន្ធក្រមសីលធម៌វិជ្ជាជីវៈការផ្សព្វផ្សាយព័ត៌មានក្លែងក្លាយ បំភ្លៃការពិត មានចរិតបំពុលសង្គម ជេរប្រមាថ ញុះញង់ និងលុបបំបាត់ជនឱកាសនិយមដែលជ្រកក្រោមស្លាកសារព័ត៌មាន។សម្តេចបានបញ្ជាក់ថា ការលើកកម្ពស់ការអនុវត្តក្រមសីលធម៌វិជ្ជាជីវៈសារព័ត៌មានជារឿងចាំបាច់ ដើម្បីរក្សាសណ្ដាប់ធ្នាប់វិស័យព័ត៌មាន សន្តិសុខព័ត៌មាន និងសេរីភាពខាងសារព័ត៌មាននៅកម្ពុជា ខណៈការអនុវត្តក្រមសីលធម៌វិជ្ជាជីវៈរបស់អ្នកសារព័ត៌មានមួយចំនួននៅមានកម្រិត ជាពិសេសអ្នកសារព័ត៌មានតាមប្រព័ន្ធអនឡាញ។សម្តេចបន្តថា បញ្ហានេះទាមទារការយកចិត្តទុកដាក់ពង្រឹងការអនុវត្តក្រមសីលធម៌វិជ្ជាជីវៈនិងការបណ្តុះបណ្តាលជំនាញ ដើម្បីបង្កើនសមត្ថភាពរបស់អ្នកសារព័ត៌មាននិងបង្កើនទំនុកចិត្តដល់សាធារណជន។សម្តេចបន្ថែមថា អ្នកសារព័ត៌មានធ្វើជាកញ្ចក់ឆ្លុះបញ្ចាំងអំពីភាពពិតជាក់ស្តែងនិងភាពអសកម្មនៅក្នុងសង្គម ដើម្បីរដ្ឋាភិបាលដោះស្រាយបញ្ហាចំគោលដៅមានប្រសិទ្ធភាពស្របតាមកម្មវិធីកំណែទម្រង់របស់រដ្ឋាភិបាល និងដើម្បីផ្សព្វផ្សាយអប់រំដល់សាធារណជនអំពីវិធានការបង្ការគ្រោះថ្នាក់ចរាចរណ៍ គ្រោះថ្នាក់នៃការប្រើប្រាស់ គ្រឿងញៀន ការជួញដូរមនុស្ស គោលនយោបាយភូមិឃុំមានសុវត្ថិភាព។ កិច្ចការទាំងនេះ ដើម្បីកាត់បន្ថយគ្រោះថ្នាក់ចរាចរណ៍ ការប្រើប្រាស់គ្រឿងញៀន និងរក្សាសុវត្ថិភាពសង្គម។សម្តេចបានសង្កត់ធ្ងន់ថា៖ «ប្រកាន់ខ្ជាប់ក្រមសីលធម៌វិជ្ជាជីវៈ ផ្សាយព័ត៌មានពិត មានតុល្យភាព គ្រប់ជ្រុងជ្រោយ ហើយចៀសវាងការផ្សព្វផ្សាយព័ត៌មានដែលធ្វើឱ្យខូចផលប្រយោជន៍ជាតិនិងបាត់បង់ទំនុកចិត្តពីសាធារណជន»។លោក ណុប វី នាយកប្រតិបត្តិសមាគមសម្ព័ន្ធអ្នកសារព័ត៌មានកម្ពុជា(ខេមបូចា)ប្រាប់KhmerTimesថាលោកមិនមានយោបល់លើរឿងវេទិកានិពន្ធនាយកទេ។ ប៉ុន្តែលោកកត់សម្គាល់ឃើញថា អ្នកសារព័ត៌មានដែលអនុវត្តវិជ្ជាជីវៈ គឺមានកម្រិតមិនដូចគ្នាទេ។ មួយចំនួនធ្វើបានល្អហើយ តែមួយចំនួនទៀតក៏ត្រូវការការបណ្តុះបណ្តាលសមត្ថភាពបន្ថែម។លោកបញ្ជាក់ថា៖ «ខ្ញុំមិនទាន់មានអ្វីកត់សម្គាល់ពាក់ព័ន្ធនឹងសារព័ត៌មានក្នុងអាណតិថ្មីនេះទេ តែខ្ញុំសង្ឃឹមថាលំហរការងារសម្រាប់អ្នកសារព័ត៌មានទាំងអស់នឹងត្រូវបានគិតគូរច្រើនជាងកន្លងមក ហើយរដ្ឋាភិបាលនឹងយកចិត្តទុកដាក់ច្រើនជាងកន្លងមកនៅក្នុងការផ្តល់ការការពារនិងឆ្លើយតបនូវសំណើរបស់អ្នកសារព័ត៌មាន ក៏ដូចជាឈានទៅលុបបំបាត់និទណ្ឌភាពលើបទឧក្រិដ្ឋប្រឆាំងអ្នកសារព័ត៌មាន»។ចំណែកលោកម៉ូរ៉ាផាត់ប្រធានសមាគមអ្នកសារព័ត៌មានអង្កតការពិតនៅកម្ពុជាបានលើកឡើងថាក្នុងអាណត្តិរដ្ឋាភិបាលថ្មីនេះបងប្អូនអ្នកសារព័ត៌មានមួយចំនួនយល់ដឹងពីក្រមសីលធម៌ និងវិជ្ជាជីវៈ សារព័ត៌មានបានច្រើននៅតែបុគ្គលមួយចំនួនតូចប៉ុណ្ណោះកំពុងឡាយជេរបាតណាបាតណីប្រាសច្រាកនឹងក្រមសីលធម៌ និងវិជ្ជាជីវៈ សារព័ត៌មាន៕
/unnamed.png
Post a Comment