ព្រះករុណាព្រះ​ម​ហាក្សត្រស្ដេចយា​ងចូលរួមនៃព្រះរាជពិ​ធីបុណ្យអុំទូក​បណ្ដែតប្រទីប​និងសំពះព្រះខែ​អកអំ​បុក

ព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ឆ្នាំ២០២៣ដែលប្រារព្ធធ្វើឡើងនៅរាជធានីភ្នំពេញនិងបានប្រព្រឹត្តទៅក្រោមបរិយាកាសសប្បាយរីករាយក្រៃលែងនិងទឹកចិត្តត្រេកអររបស់ប្រជាពលរដ្ឋខ្មែរទាំងទេសចរណ៍បរទេសដែលមកចូលរួមយ៉ាងច្រើនកុះករ។ នៅឯព្រះពន្លាជ័យខាងមុខព្រះបរមរាជវាំងនារសៀល ថ្ងៃទី២៦ ខែវិច្ឆិកា ឆ្នាំ២០២៣ក្រោមព្រះរាជាអធិតីភាពដ៏ខ្ពង់ខ្ពស់របស់ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជានិងមានការអញ្ជើញចូលរួមរបស់ សម្ដេចវិបុលសេនាភក្ដី សាយ ឈុំ ប្រធានព្រឹទ្ធសភា សម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភា សម្ដេចមហាបវរធិបតីហ៊ុនម៉ាណែតនាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវសម្ដេចអគ្គមហាពញាចក្រីហេងសំរិនប្រធានកិត្តិយសនៃឧត្ដមប្រឹក្សាផ្ទាល់ព្រះមហាក្សត្រ សម្ដេចអគ្គមហាសេនាបតីតេជោ ហ៊ុន សែន ប្រធានក្រុមឧត្ដមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា ព្រមទាំង សម្ដេច ឯកឧត្ដម លោកជំទាវ ជាសមាជិកសមាជិកា ឧត្ដមប្រឹក្សាផ្ទាល់ព្រះមហាក្សត្រ សមាជិក សមាជិកា ព្រឹទ្ធសភា រដ្ឋសភា រាជរដ្ឋាភិបាល មន្ត្រីរាជការ នាម៉ឺនសព្វមុខមន្ត្រី រាជវង្សានុវង្ស អង្គទូតនៃបណ្ដាប្រទេស ជាមិត្តប្រចាំនៅកម្ពុជា ភ្ញៀវជាតិ-អន្តរជាតិ និងប្រជាពលរដ្ឋមកពីបណ្ដាខេត្តនិងរាជធានីជាច្រើន។

ក្នុងឆ្នាំនេះ ព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក រយៈពេល៣ថ្ងៃ ចាប់ពីថ្ងៃទី ២៦ ដល់ថ្ងៃទី២៨ ខែវិច្ឆិកា ឆ្នាំ២០២៣ ដែលមានទូកមកពីបណ្ដារាជធានី ខេត្ត ចូលរួមសរុប ៣៣៨ទូក ក្នុងនោះ មានផ្នែកទូកអុំ នារីខ្នាតអន្តរជាតិ ទូកអុំបុរសខ្នាតអន្តរជាតិ ទូកអុំបុរស ទូកអុំបុរសគូពិសេស និងផ្នែកទូកចែវ។ ចំពោះចំនួនកីឡាករ កីឡាការិនី ចូលរួមសរុប២០៤១៧ នាក់ ដែលក្នុងចំនួននេះ គឺមានទូកអុំបុរស១៥៨ទូក ចែវបុរស ៤២ទូក ទូកខ្នាតអន្តរជាតិបុរស ១៣៤ទូក (ទូកខ្នាតអន្តរជាតិនារី ២ទូក) កម្លាំងអុំបុរស ១៦ ៤៨៧ នាក់ (កម្លាំងអុំនារី ៨៧នាក់) កម្លាំងត្រៀមបុរស ២៧៦៥នាក់ និងកម្លាំងត្រៀម នារី ៧៨នាក់។គួររំលឹកឲ្យដឹងដែរថាពិធីបុណ្យអុំ​ទូក​អកអំបុកនិងសំពះព្រះខែ គឺជាពិធីបុណ្យជាតិធំមួយក្នុងចំណោមពិធីបុណ្យជាតិជាច្រើនផ្សេងទៀត។ ប្រទេសកម្ពុជាតែងតែប្រារព្ធធ្វើពិធីបុណ្យនេះឡើងជារៀងរាល់ឆ្នាំនៃខែវិច្ឆិកា ដែលជាខែចេញវស្សានៃរដូវរកត្រី។ពិធីបុណ្យអុំទូកត្រូវបានគេជឿថា មានការប្រារព្ធ​ធ្វើ​តាំង​ពី​សម័យ​បុរាណកាលមកដែលអាចជានៅក្នុងឆ្នាំ១១៨១នៃគសករាជ​ស្ថិតក្នុងរជ្ជកាល​ព្រះ​បាទ ជ័យវរ្ម័នទី៧។តែបើយោងតាមឯកសារខ្លះៗរបស់បារាំង ប្រវត្តិនៃពិធីបុណ្យអុំទូក បណ្ដែតប្រទីប អកអំបុក និង សំពះព្រះខែកើតមានដំបូងក្នុងរាជព្រះបាទ ស៊ីសុវត្ថ ក្នុងឆ្នាំ ១៩១៤ ។ក៏ប៉ុន្តែពិធីបុណ្យនេះចាប់មានភាពល្បីល្បាញខ្លាំងនៅក្នុងឆ្នាំ១៩៤៥ នៃរាជព្រះព្រះបាទនរោត្តម សីហនុ៕