កម្ពុជាកាត់ទោសមេបក្សប្រឆាំងឲ្យជាប់គុក២៧ឆ្នាំពីបទក្បត់ជាតិ(AFP, Reuters)
តុលាការក្រុងភ្នំពេញបានកាត់ទោសលោកកឹម សុខាសហស្ថាបនិកគណបក្សសង្គ្រោះជាតិឲ្យជាប់ពន្ធនាគាររយៈពេល២៧ឆ្នាំពីបទក្បត់ជាតិ។លោកកុយ សៅចៅក្រមបានថ្លែងក្នុងសវនាការនៅក្នុងរាជធានីភ្នំពេញថ្ងៃនេះថា៖«លោក កឹម សុខា ត្រូវបានផ្ដន្ទាទោសក្រោមការចោទប្រកាន់ពីបទឃុបឃិតជាមួយបរទេសឲ្យប្រព្រឹត្តបទឧក្រិដ្ឋនៅក្នុងប្រទេសកម្ពុជានិងកន្លែងផ្សេងទៀត។ក្រោយការកាត់ទោសលោក កឹម សុខាត្រូវបាននាំចេញពីបន្ទប់សវនាការទៅផ្ទះរបស់លោកដែលលោកនឹងត្រូវឃុំខ្លួនក្នុងផ្ទះនិងហាមមិនឲ្យជួបអ្នកណាក្រៅពីក្រុមគ្រួសាររបស់លោក។តុលាការក៏បានដកសិទ្ធិបោះឆ្នោតរបស់លោកកឹម សុខានិងហាមលោកមិនឲ្យឈរឈ្មោះធ្វើនយោបាយ។លោក អាង ឧត្តម មេធាវីរបស់លោកកឹម សុខា មានប្រសាសន៍ថាក្រុមមេធាវីរបស់លោកនឹងប្តឹងឧទ្ធរណ៍ក្នុងរយៈពេល១ខែបន្ទាប់ពីការប្រកាសសាលក្រម។លោក កឹម សុខា អាយុ៦៩ឆ្នាំ ជាសហស្ថាបនិកគណបក្សសង្គ្រោះជាតិ។ លោកត្រូវបានចាប់ខ្លួនកាលពីឆ្នាំ ២០១៧ដោយចោទប្រកាន់ពីបទឃុបឃិតជាមួយសហរដ្ឋអាមេរិកក្នុងការ«រៀបចំផែនការសម្ងាត់»ដើម្បីផ្ដួលរំលំរដ្ឋាភិបាលលោកនាយករដ្ឋមន្ត្រី ហ៊ុន សែន។ លោក កឹម សុខាបានបដិសេធម្តងហើយម្តងទៀតចំពោះការចោទប្រកាន់នេះ។គណបក្សសង្គ្រោះជាតិត្រូវបានរំលាយកាលពីឆ្នាំ២០១៧ដោយសារឃុបឃិតជាមួយបរទេសដើម្បីផ្តួលរំលំរដ្ឋាភិបាល។ លោកសម រង្ស៊ី ដែលបង្កើតគណបក្សសង្គ្រោះជាតិជាមួយលោក កឹម សុខា កំពុងនិរទេសខ្លួននៅប្រទេសបារាំង ហើយត្រូវបានតុលាការក្រុងភ្នំពេញកាត់ទោសកំបាំងមុខឲ្យជាប់ពន្ធនាគារ១០ឆ្នាំកាលពីឆ្នាំមុន ដោយចោទប្រកាន់ពីបទឃុបឃិតផ្ដួលរំលំរដ្ឋាភិបាល៕
លោកកឹម សុខានៅមុនសវនាការកាត់ទោសនៅថ្ងៃទី៣ខែមីនា។រូបថត៖ AFP។
Post a Comment