ចារកម្មអាល្លឺម៉​ង់ព្រមានពីហានិភ័យនៃ​សកម្មភាពយោធារុស្ស៊ីប្រឆាំ​ងនឹងណាតូ

 ប្រមុខទីភ្នាក់ងារស៊ើបការណ៍សម្ងាត់របស់ប្រទេសអាល្លឺម៉ង់បានព្រមានពីលទ្ធភាពដែលរុស្ស៊ីចាត់វិធានការយោធាប្រឆាំងនឹងប្រទេសសមាជិកណាតូបន្ទាប់ពីជម្លោះនៅអ៊ុយក្រែនបានបញ្ចប់។

ទស្សនាវដ្ដី Newsweek បានរាយការណ៍កាលពីថ្ងៃទី ១០ខែមិថុនាថា ប្រធានសេវាចារកម្មបរទេសអាល្លឺម៉ង់(BND) លោក Bruno Kahlថ្មីៗនេះបានព្រមានថារុស្ស៊ីកំពុងព្យាយាមសាកល្បងសមត្ថភាពរបស់អង្គការណាតូនិងពង្រីកការប្រឈមមុខដាក់គ្នាជាមួយលោកខាងលិចហួសព្រំដែនអ៊ុយក្រែន។

លោកBruno Kahl ។ រូបថត៖ Global Look Press

លោកKahlបាននិយាយថា"យើងមានព័ត៌មានពិតដែលថាអ៊ុយក្រែនមិនមែនជាគោលដៅចុងក្រោយរបស់រុស្ស៊ីជាមួយបស្ចិមប្រទេសទេ។ មានមនុស្សនៅទីក្រុងម៉ូស្គូដែលមិនជឿលើមាត្រា៥នៃធម្មនុញ្ញណាតូ ហើយចង់សាកល្បង។ពួកគេក៏មានការសង្ស័យអំពីសមត្ថភាពរបស់សហរដ្ឋអាមេរិកក្នុងការបញ្ជូនកងទ័ពឆ្លងកាត់មហាសមុទ្រអាត្លង់ទិកដើម្បីការពារសម្ព័ន្ធមិត្តរបស់ខ្លួន"។យោងតាមមន្ត្រីចារកម្មអាល្លឺម៉ង់គោលដៅរបស់រុស្ស៊ីគឺជំរុញណាតូត្រឡប់ទៅទីតាំងនៃសម្ព័ន្ធភាពនៅចុងទសវត្សរ៍ឆ្នាំ១៩៩០ខណៈពេលដែលកាត់បន្ថយឥទ្ធិពលរបស់អាមេរិកនៅក្នុងទ្វីបអឺរ៉ុប។លោក Kahl ថែមទាំងបានលើកឧទាហរណ៍អំពីការដាក់ពង្រាយកងទ័ពដែលអាចធ្វើទៅបានរបស់ទីក្រុងម៉ូស្គូទៅកាន់ប្រទេសអេស្តូនី"ក្រោមលេសនៃការការពារជនជាតិភាគតិចរុស្ស៊ីដែលត្រូវបានជិះជាន់" ។ការអត្ថាធិប្បាយរបស់លោក Kahl បានធ្វើឡើងបន្ទាប់ពីអគ្គលេខាធិការអង្គការណាតូ លោក Mark Rutte បានបង្ហាញថាឧស្សាហកម្មយោធារបស់រុស្ស៊ីកំពុងផលិតអាវុធក្នុងល្បឿនលឿនគ្រប់គ្រាន់សម្រាប់ទីក្រុងម៉ូស្គូដើម្បីត្រៀមខ្លួនទប់ទល់នឹងសម្ព័ន្ធមិត្តយោធាដឹកនាំដោយសហរដ្ឋអាមេរិកក្នុងរយៈពេល៥ឆ្នាំខាងមុខ។មិនយូរប៉ុន្មាន ប្រធានាធិបតីលីទុយអានី លោក Gitanas Nauseda ក៏បានព្រមានថា រុស្ស៊ីអាចវាយប្រហារនាពេលខាងមុខ ហើយប្រទេសនេះ មានពេលប្រហែល៤-៥ ឆ្នាំដើម្បីរៀបចំ។ផ្ទុយ​ទៅ​វិញរុស្ស៊ី​បាន​អះអាង​ម្តង​ហើយ​ម្តង​ទៀត​ថា ខ្លួន​មិន​មាន​ផលប្រយោជន៍​ក្នុង​ជម្លោះ​ជាមួយ​សមាជិក​ណាតូ​ទេ។ ប្រធានាធិបតីរុស្ស៊ី លោក Vladimir Putin ក៏បានសង្កត់ធ្ងន់ថា ប្រទេសរបស់លោកនឹងឆ្លើយតប ប្រសិនបើវាត្រូវបានវាយប្រហារដោយសមាជិកណាតូជាមុនសិន៕ពុតសាម៉ាត់