រុស្ស៊ី​បដិសេ​ធ​​ការ​ពន្យារ​កិច្ច​ចរចាអ៊ុយក្រែន​​​វាយ​ប្រហារUAVក្បែរ​ក្រុង​​ម៉ូស្គូ

ព្រឹត្តិការណ៍៖ស្ថានភាពសង្គ្រាមរុស្ស៊ី-អ៊ុយក្រែន

វិមានក្រឹមឡាំងបានបដិសេធការចោទប្រកាន់ថារុស្ស៊ីមានចេតនាបញ្ឈប់ការចរចាសន្តិភាព។កងកម្លាំងការពារដែនអាកាសរុស្ស៊ីបានបាញ់ទម្លាក់យន្តហោះគ្មានមនុស្សបើករបស់អ៊ុយក្រែន (UAV) ចំនួន៣គ្រឿង នៅជិតទីក្រុងម៉ូស្គូ។

អ្នកនាំពាក្យវិមានក្រឹមឡាំង លោក Dmitry Peskov ។ រូបថត៖ TASS

យោងតាម ​​TASS អ្នកនាំពាក្យវិមានក្រឹមឡាំងលោក Dmitry Peskov នៅថ្ងៃនេះ (ថ្ងៃទី ២១ឧសភា)បានបដិសេធការចោទប្រកាន់ពីអ៊ុយក្រែននិងអឺរ៉ុបដែលថារុស្ស៊ីមានចេតនាអូសបន្លាយការចរចាសន្តិភាព។លោក Peskov បាននិយាយថា "យើងមិនចង់ពន្យារពេលដំណើរការចរចាទេ។គណៈប្រតិភូរុស្ស៊ីកំពុងធ្វើការយ៉ាងសកម្ម ព័ត៌មានចុងក្រោយបំផុតទាំងអស់នឹងត្រូវបានធ្វើបច្ចុប្បន្នភាពយ៉ាងឆាប់រហ័ស។ ទោះជាយ៉ាងណាក៏ដោយនេះគឺជាប្រធានបទដែលត្រូវពិភាក្សាដោយសម្ងាត់ ហើយយើងមិនគួរបង្ហាញច្រើនពេកទេ" ។អ្នកនាំពាក្យវិមានក្រឹមឡាំងបានសង្កត់ធ្ងន់ថា រុស្ស៊ីកោតសរសើរចំពោះកិច្ចខិតខំប្រឹងប្រែងរបស់ភាគីទាំងអស់ដែលចង់រួមចំណែកក្នុងដំណើរការសន្តិភាពហើយនឹងបង្ហាញ"បញ្ជីលក្ខខណ្ឌសម្រាប់កិច្ចព្រមព្រៀងបទឈប់បាញ់" នាពេលឆាប់ៗនេះ។លោកPeskovបានកត់សម្គាល់ថាលក្ខខណ្ឌទាំងនេះត្រូវបានយល់ព្រមក្នុងអំឡុងពេលការចរចានៅទីក្រុងអ៊ីស្តង់ប៊ុល។ទាក់ទិននឹងទីតាំងនៃកិច្ចពិភាក្សាបន្ទាប់ លោក Peskov បាននិយាយថា រុស្ស៊ីមិនទាន់ធ្វើការសម្រេចចិត្តជាផ្លូវការទេហើយទីក្រុងម៉ូស្គូមិនបានទទួលសំណើណាមួយពីបុរីវ៉ាទីកង់ទេ។

អ៊ុយក្រែនបើកការវាយប្រហារ UAV នៅជិតទីក្រុងម៉ូស្គូ

យោងតាមសារព័ត៌មាន RT អភិបាលក្រុងម៉ូស្គូ លោក Sergei Sobyanin បានបញ្ជាក់កាលពីថ្ងៃទី ២១ ឧសភាថា កងកម្លាំងការពារដែនអាកាសរុស្ស៊ី បានបាញ់ទម្លាក់ UAV អ៊ុយក្រែនចំនួន៣ គ្រឿងនៅក្នុងតំបន់នេះ។ទោះបីជាលោក Sobyaninមិនបានបញ្ជាក់ពីទីតាំងណាដែលត្រូវបានវាយប្រហារក៏ដោយ មន្ត្រីក្នុងតំបន់បាននិយាយថា ស្រុក Domodedovo នៅភាគខាងត្បូងទីក្រុងម៉ូស្គូ គឺជាកន្លែងដែលប្រព័ន្ធការពារដែនអាកាសត្រូវបានដាក់ពង្រាយ។នៅលើបណ្តាញសង្គម ប្រជាជននៅជិតទីក្រុងម៉ូស្គូក៏បានចែករំលែកវីដេអូដែលថតUAVអ៊ុយក្រែនដែលកំពុងហោះហើរនៅលើមេឃផងដែរ។យោងតាមប្រព័ន្ធផ្សព្វផ្សាយរុស្ស៊ី យន្តហោះ UAV ពីរគ្រឿងរបស់គៀវត្រូវបានបាញ់ទម្លាក់នៅក្នុងស្រុក Domodedovo ខណៈមួយគ្រឿងទៀតត្រូវបានបាញ់ទម្លាក់នៅក្នុងស្រុក Orekhovo-Zuevo ។ មិន​ទាន់​មាន​របាយការណ៍​ពី​មនុស្ស​ស្លាប់ឬ​ខូចខាត​ទ្រព្យសម្បត្តិ​នៅឡើយ​ទេ​។ក្នុងរយៈពេល២៤ម៉ោងកន្លងមកនេះ អង្គភាពការពារដែនអាកាសរុស្ស៊ីបានបាញ់ទម្លាក់ UAV អ៊ុយក្រែនសរុបចំនួន១៥៩គ្រឿងនៅទីតាំងជាច្រើននៅទូទាំងប្រទេស៕ពុតសាម៉ាត់