លោកT​rumpនិយាយអំពីលទ្ធភាពនៃ​ការជួបដោយផ្ទាល់ជាមួយប្រធា​នាធិបតីរុស្ស៊ីលោក​Putin

ប្រធានាធិបតីអាមេរិក លោកDonald Trumpបាននិយាយថា លោកអាចជួបជាមួយប្រធានាធិបតីរុស្ស៊ី លោកVladimir Putin«ក្នុងពេលដ៏ខ្លី»បន្ទាប់ពីការធ្វើដំណើរទៅកាន់ប្រទេសអារ៉ាប៊ីសាអូឌីតកាតានិងអេមីរ៉ាតអារ៉ាប់រួមក្នុងខែឧសភា។

យោងតាមសារព័ត៌មាន Kyiv Independent កាលពីថ្ងៃទី២៣ ខែមេសា នៅពេលដែលអ្នកសារព័ត៌មានសួរថាតើលោកនឹងជួបជាមួយប្រធានាធិបតីរុស្ស៊ីលោកPutinនៅប្រទេសអារ៉ាប៊ីសាអូឌីត ក្នុងអំឡុងដំណើរទស្សនកិច្ចរបស់លោកទៅកាន់មជ្ឈិមបូព៌ាចាប់ពីថ្ងៃទី ១៣ ដល់ថ្ងៃទី ១៦ ខែឧសភា លោក Trump បានឆ្លើយតបថា “ប្រហែលជា ប៉ុន្តែទំនងជាមិនមែនទេ”។ប្រធានាធិបតី​អាមេរិក​បាន​បន្ថែម​ដោយ​មិន​បាន​ផ្តល់​ពេលវេលា​ជាក់លាក់​ថា​៖ «​ខ្ញុំ​គិត​ថា​យើង​នឹង​ជួប​គាត់​ក្នុង​ពេល​ឆាប់ៗ​នេះ»​។ទោះបីជារុស្ស៊ីនិងសហរដ្ឋអាមេរិកកំពុងចរចាបទឈប់បាញ់គ្នានៅអ៊ុយក្រែនក៏ដោយក៏លោកTrumpនិងលោកPutinមិនទាន់និយាយដោយផ្ទាល់នៅឡើយ។ 

ជំនួបរវាងប្រធានាធិបតីរុស្ស៊ី លោកVladimir Putin  និងប្រធានាធិបតីអាមេរិក លោកDonald Trump។ រូបថត៖ វិមានក្រឹមឡាំង

ប្រមុខ​រដ្ឋ​ទាំងពីរ​គ្រាន់តែ​ទំនាក់ទំនង​តាមរយៈ​មន្ត្រី​នៃ​ប្រទេស​ទាំងពីរ​ប៉ុណ្ណោះ​។ ជំនួបទល់មុខគ្នាចុងក្រោយរបស់លោក Trump ជាមួយសមភាគីរុស្ស៊ីគឺកិច្ចប្រជុំកំពូល Helsinki នៅប្រទេសហ្វាំងឡង់ក្នុងឆ្នាំ២០១៨។ទីប្រឹក្សារបស់លោក Trump និយាយថា ការសន្ទនារបស់មេដឹកនាំសេតវិមានជាមួយលោក Putin គួរតែធ្វើឡើងបន្ទាប់ពីរុស្ស៊ីយល់ព្រមលើបទឈប់បាញ់នៅអ៊ុយក្រែន។ បេសកជនពិសេសអាមេរិក Steve Witkoff គ្រោងនឹងជួបជាមួយប្រធានាធិបតីរុស្ស៊ីនៅទីក្រុងមូស្គូនៅថ្ងៃទី២៥ ខែមេសា។ថ្លែងទៅកាន់ទីភ្នាក់ងារសារព័ត៌មាន Tass ក្នុងខែមីនា អ្នកនាំពាក្យវិមានក្រឹមឡាំង លោក Dmitry Peskov បាននិយាយថា មេដឹកនាំរុស្ស៊ីនិងសហរដ្ឋអាមេរិកទាំងពីរអាចជួបគ្នានៅប្រទេសអារ៉ាប៊ីសាអូឌីត។ ប៉ុន្តែ​រហូត​មក​ដល់​ពេល​នេះ មិន​ទាន់​មាន​គម្រោង​ជាក់លាក់​ណា​មួយ​ត្រូវ​បាន​ប្រកាស​នៅ​ឡើយ​ទេ។បេសកជនពិសេសរបស់សហរដ្ឋអាមេរិក លោក Witkoff ក៏បាននិយាយនៅក្នុងបទសម្ភាសន៍ជាមួយ Bloomberg ថា កិច្ចប្រជុំកំពូលរវាងសហរដ្ឋអាមេរិកនិងរុស្ស៊ីអាចនឹងធ្វើឡើងនៅប្រទេសអារ៉ាប៊ីសាអូឌីត៕ពុតសាម៉ាត់