ទស្សនាយន្ត​ហោះ​ចម្បាំងទំនើបរបស់ចិនធ្វើសមយុទ្ធយោ​ធាលើ​កដំបូងជាមួ​យអេហ្ស៊ីប

 សមយុទ្ធ​ផ្លូវអាកាស​រួមគ្នា​លើកដំបូង​រវាង​ចិន​និង​អេ​ហ្ស៊ី​ប​មានយន្តហោះ​ចម្បាំង​ទំនើបៗ​ជាច្រើននិង​យន្តហោះ​ចាក់​ប្រេង​ពីលើ​អាកាស​។ទស្សនាវដ្ដី Newsweek បានរាយការណ៍ថា សមយុទ្ធរួមគ្នាលើកដំបូងរវាងកងកម្លាំងទ័ពអាកាសចិននិងអេហ្ស៊ីប ដែលមានឈ្មោះថា"ឥន្ទ្រីនៃអរិយធម៌២០២៥" បានធ្វើឡើងចាប់ពីពាក់កណ្តាលខែមេសាដល់ដើមខែឧសភា។

ទិន្នន័យតាមដានការហោះហើរនិងប្រភពសន្តិសុខបើកចំហបាននិយាយថាកងទ័ពអាកាសចិនបានដាក់ពង្រាយយន្តហោះចម្បាំង J-10C យន្តហោះចាក់ប្រេងពីលើអាកាស YU-20 និងយន្តហោះKJ-500 ដើម្បីចូលរួមក្នុងព្រឹត្តិការណ៍នេះ។យោងតាមសារព័ត៌មាន Global Times កងទ័ពអាកាសចិនបានចល័តយន្តហោះចម្បាំង J-10C និង J-10S ខណៈដែលអេហ្ស៊ីបបានបញ្ជូនយន្តហោះចម្បាំង MiG-29 ទៅចូលរួមក្នុងសមយុទ្ធរួម។ទស្សនាវដ្ដី ការពារជាតិ Army Recognition ក៏បានរាយការណ៍ផងដែរថា យន្តហោះប្រយុទ្ធលើអាកាស KJ-500 របស់ចិនបានចូលរួមនៅក្នុងសមយុទ្ធយោធាអន្តរជាតិជាលើកដំបូង។

យោងតាមAviationWeekយន្តហោះយោធាចិនបានមកដល់អេហ្ស៊ីបតាមរយៈប្រទេសអារ៉ាប់រួម រួមទាំងយន្តហោះដឹកជញ្ជូន Y-20 យ៉ាងតិចចំនួន៥គ្រឿងនិងយន្តហោះKJ-500 ។ដោយចែករំលែកនៅលើ Facebook អ្នកនាំពាក្យយោធាអេហ្ស៊ីបបានសង្កត់ធ្ងន់ថា សមយុទ្ធនេះធ្វើឡើងក្នុងរយៈពេលជាច្រើនថ្ងៃនៅឯមូលដ្ឋានទ័ពអាកាសមួយក្នុងប្រទេស"ក្នុងគោលបំណងបង្រួបបង្រួមគំនិតប្រយុទ្ធរវាងភាគីទាំងពីរតាមរយៈការបង្រៀនទ្រឹស្តីនិងការអនុវត្តជាបន្តបន្ទាប់"។ក្រសួងការពារជាតិចិនបានបញ្ជាក់ថា“នេះគឺជាការហ្វឹកហ្វឺនរួមគ្នាលើកដំបូងរវាងយោធាចិននិងអេហ្ស៊ីប។វាមានសារសំខាន់ក្នុងការលើកកម្ពស់កិច្ចសហប្រតិបត្តិការជាក់ស្តែងនិងបង្កើនការជឿទុកចិត្តគ្នាទៅវិញទៅមក និងមិត្តភាពរវាងយោធាទាំងពីរ”។ព្រឹត្តិការណ៍នេះកើតឡើងនៅពេលដែលសហរដ្ឋអាមេរិកកំពុងបង្កើនវត្តមានយោធារបស់ខ្លួននៅមជ្ឈិមបូព៌ាដោយសារតែភាពតានតឹងកើនឡើងជាមួយអ៊ីរ៉ង់។អេហ្ស៊ីបគឺជាសម្ព័ន្ធមិត្តជិតស្និទ្ធបំផុតរបស់អាមេរិកនៅមជ្ឈិមបូព៌ា ហើយបានទទួលជំនួយផ្នែកយោធាយ៉ាងសំខាន់ពីទីក្រុងវ៉ាស៊ីនតោន ចាប់តាំងពីបានចុះហត្ថលេខាលើកិច្ចព្រមព្រៀងសន្តិភាពជាមួយអ៊ីស្រាអែលក្នុងឆ្នាំ១៩៧៩។ ជាក់ស្តែងអេហ្ស៊ីបត្រូវបានផ្តល់ជំនួយយោធាចំនួន ១.៣ពាន់លានដុល្លារដោយសហរដ្ឋអាមេរិកនៅឆ្នាំ២០២៤ ។ទោះបីជាយ៉ាងណាក៏ដោយ ទំនាក់ទំនងរវាងសហរដ្ឋអាមេរិក និងអេហ្ស៊ីបមានភាពតានតឹងចំពោះសំណើរបស់ប្រធានាធិបតី Donald Trumpក្នុងការផ្លាស់ទីលំនៅប្រជាជនប៉ាឡេស្ទីនចេញពីតំបន់ហ្គាហ្សាស្ទ្រីបនិងមានសក្តានុពលទៅកាន់ប្រទេសអេហ្ស៊ីប។ទីក្រុងគែរបាននិយាយប្រឆាំងនឹងផែនការរបស់រដ្ឋបាល Trump ។លើសពីនេះ អេហ្ស៊ីបក៏ជាអតិថិជនសក្តានុពលសម្រាប់អាវុធរបស់ចិនផងដែរ៕