កម្ពុជា​​ប្ដេជ្ញា​ចិត្ត​រួមចំណែក​​ដល់​សន្តិភាព​ពិ​ភពលោក​

កម្ពុជា​ប្តេជ្ញា​បន្ត​សហការ​ជាមួយ​អង្គការសហប្រជាជាតិ​ក្នុង​ការ​រក្សា​សន្តិភាព​ ​និង​សន្តិសុខ​នៅ​ក្នុង​ប្រទេស​ដែល​កំពុង​ប្រឈម​នឹង​ជម្លោះ​និង​អសន្តិសុខ​ ​និង​ក្នុង​ការងារ​មនុស្សធម៌​។​ការ​ប្តេជ្ញា​ចិត្ត​នេះ​ ​ត្រូវ​បាន​បញ្ជាក់​សារ​ជាថ្មី​ដោយសម្តេច​ ​ហ៊ុន​ ​ម៉ា​ណែ​ត​ ​នាយករដ្ឋមន្ត្រី​នៃ​ព្រះរាជាណាចក្រកម្ពុជា​ ​ក្នុង​ឱកាស​ទទួល​ជួប​សម្តែង​ការគួរសម​ជាមួយ​លោក​ J​e​an​-​Pier​r​e​ ​L​a​cro​i​x ​អគ្គលេខាធិការ​រង​អង្គការសហប្រជាជាតិ​ទទួលបន្ទុក​ប្រតិបត្តិការ​សន្តិភាព​ ​នៅ​វិមាន​សន្តិភាព​។​សម្តេច​នាយករដ្ឋមន្ត្រី​ ​បាន​វាយ​តម្លៃ​ខ្ពស់​ចំពោះ​ទំនាក់ទំនង​ ​និង​កិច្ច​សហប្រតិបត្តិការ​ដ៏​ល្អ​រវាង​កម្ពុជា​ ​និង​អង្គការសហប្រជាជាតិ​ ​ហើយ​បាន​ថ្លែង​អំណរគុណ​ចំពោះ​ភាគី​អង្គការសហប្រជាជាតិ​ ​ដែល​បាន​យកចិត្តទុកដាក់​ ​និង​គាំទ្រ​ចំពោះ​សុវត្ថិភាព​ ​និង​សន្តិសុខ​របស់​កងកម្លាំង​រក្សា​សន្តិភាព​កម្ពុជា​ ​នៅ​ក្នុង​ប្រទេស​នានា​។​​សម្តេច​ ​ហ៊ុន​ ​ម៉ា​ណែ​ត​ ​ក៏បាន​បញ្ជាក់​ពី​ការ​ត្រៀម​ខ្លួន​របស់​កម្ពុជា​ ​ក្នុង​ការ​បន្ត​ពង្រាយ​កងកម្លាំង​រក្សា​សន្តិភាព​ក្រោម​ឆ័ត្រ​អង្គការសហប្រជាជាតិ​ ​នៅ​ក្នុង​ប្រទេស​ដទៃទៀត​ ​ក៏ដូចជា​ធ្វើជា​ម្ចាស់ផ្ទះ​នៃ​សន្និសីទ​ត្រួតពិនិត្យ​លើក​ទី​៥​ ​នៃ​សន្ធិសញ្ញា​ហាមប្រាម​មីន​ ​ឬ​កិច្ចប្រជុំ​កំពូល​សៀមរាប​អង្គរ​ ​ស្តីពី​ពិភពលោក​គ្មាន​មីន​។​សម្តេចបាន​គូស​បញ្ជាក់​ថា​ ​រាជរដ្ឋាភិបាល​កម្ពុជា​ ​នៅតែ​បន្ត​យកចិត្តទុកដាក់​លើ​ការងារ​ដោះ​មីន​ ​ហើយ​មកដល់ពេលនេះ​ ​ខេត្ត​ចំនួន​ ​១​៥​ ​របស់​កម្ពុជា​ ​ត្រូវ​បាន​ប្រកាស​ជា​ផ្លូវការ​ថា​ ​គ្មាន​មីន​។​

ចំណែក​លោក​ J​e​an​-​Pier​r​e​ ​L​a​cro​i​x ​បាន​កោតសរសើរ​ចំពោះ​សមិទ្ធផល​ ​និង​ជោគជ័យ​របស់​កម្ពុជា​ ​ក្នុង​ការ​ប្រែក្លាយ​ពី​ប្រទេស​ដែល​ហែកហួរ​ដោយ​ស​ង្រ្គា​ម​ ​ទៅជា​ប្រទេស​ដែល​រួមចំណែក​ក្នុង​កា​រដាក់​ពង្រាយ​កងកម្លាំង​រក្សា​សន្តិភាព​ក្រោម​ឆ័​ត្រ​អង្គការសហប្រជាជាតិ​ ​ដើម្បី​ធានា​សន្តិភាព​ ​និង​សន្តិសុខ​សម្រាប់​ប្រទេស​ដទៃទៀត​ ​ដែល​ជា​គំរូ​ដ៏​ល្អ​សម្រាប់​ប្រទេស​ដទៃទៀត​នៅ​ជុំវិញ​ពិភពលោក​។​លោក​អគ្គលេខាធិការ​រង​អង្គការសហប្រជាជាតិ​ក៏បាន​កោតសរសើរ​ដល់​កងកម្លាំង​រក្សា​សន្តិភាព​កម្ពុជា​សម្រាប់​ការងារ​ដ៏​សកម្ម​ ​និង​មាន​វិ​ន័យ​ ​ហើយ​បាន​បញ្ជាក់​ជាថ្មី​ពី​ការ​បន្ត​គាំទ្រ​ ​និង​កិច្ច​សហប្រតិបត្តិការ​យ៉ាង​រឹង​មាំ​របស់​អង្គការសហប្រជាជាតិ​ជាមួយ​រាជរដ្ឋាភិបាល​ ​ជាពិសេស​ក្នុង​ការបញ្ជូន​កងទ័ព​កម្ពុជា​ទៅ​ចូលរួម​ប្រតិបត្តិការ​រក្សា​សន្តិភាព​របស់​អង្គការសហប្រជាជាតិ​។​ជាមួយគ្នា​នេះ​ ​លោក​បាន​លើកឡើង​ពី​ការ​គាំទ្រ​ចំពោះ​ព្រះរាជាណាចក្រកម្ពុជា​ក្នុង​ការ​ធ្វើជា​ម្ចាស់ផ្ទះ​នៃ​សន្និសីទ​ត្រួតពិនិត្យ​លើក​ទី​៥​ ​នៅ​ខេត្ត​សៀមរាប​ក្នុង​ខែវិច្ឆិកា​ឆ្នាំនេះ​៕​

​