ជំរុញ​សេដ្ឋកិច្ច​រវាង​កម្ពុជា​និ​ង​ម៉ាឡេស៊ី​បន្ថែម​​ទៀត​

 សម្តេចហ៊ុន​ ​សែន​ ​ប្រធាន​ព្រឹទ្ធសភា​បានស្នើ​ឱ្យ​ពង្រឹង​ទំនាក់ទំនង​សេដ្ឋកិច្ច​រវាង​កម្ពុជា​ ​និង​ម៉ាឡេស៊ី​បន្ថែម​ទៀត​ ​ខណៈ​ដែលសម្តេច​បាន​សម្តែង​ការ​ពេញចិត្ត​ចំពោះ​កំណើន​ការ​វិនិយោគ​ពី​ម៉ាឡេស៊ី​ ​និង​កំណើន​ទំហំ​ពាណិជ្ជកម្ម​ទ្វេភាគី​ជាពិសេស​ការ​ទិញ​អង្ករ​ពី​កម្ពុជា​។​សម្តេចបាន​លើកឡើង​បែប​នេះ​ ​ក្នុង​ឱកាស​ដែល​លោក​បាន​អនុញ្ញាត​ឱ្យ​លោក​ S​h​a​h​ar​u​d​din​ Onn ​ឯកអគ្គរដ្ឋទូត​ម៉ាឡេស៊ី​ប្រចាំ​កម្ពុជា​ចូល​ជួប​សម្តែង​ការគួរសម​ ​នៅ​ថ្ងៃ​ទី​១​៧​ ​ខែ​មិថុនា​ ​នៅ​វិមាន​ព្រឹទ្ធសភា​។​សម្តេចសង្ឃឹម​ថា​ ​លោក​ឯកអគ្គរដ្ឋទូត​នឹង​បន្ត​លើក​ក​ម្ពស់​ទំនាក់ទំនង​ទ្វេភាគី​កម្ពុជា​-​ម៉ាឡេស៊ី​។​សម្តេច​បាន​សរសេរ​នៅ​លើ​បណ្តាញ​សង្គម​ថា​“​ខ្ញុំ​ពេញចិត្ត​ចំពោះ​កំណើន​ការ​វិនិយោគ​ពី​ម៉ាឡេស៊ី​និង​កំណើន​ទំហំ​ពាណិជ្ជកម្ម​ទ្វេភាគី​ ​ជាពិសេស​គឺ​ការ​ទិញ​អង្ករ​ពី​កម្ពុជា​ដែល​ជួយ​ដល់​កសិករ​កម្ពុជា​ខិតខំ​ដាំ​ដុះ​បន្ថែម​ទៀត​ ​និង​ ​ដល់​សន្តិសុខ​ស្បៀង​របស់​ម៉ាឡេស៊ី​។​​ជាមួយគ្នា​នេះ​សម្តេចបាន​រិះរក​មធ្យោបាយ​ដើម្បី​កែ​លម្អ​ចលនា​ទំនិញ​រវាង​កំពង់ផែ​ក្រុង​ព្រះ​សី​ហ​នុ ​និង​កំពង់ផែ​ម៉ាឡេស៊ី​។​កាលពី​ខែ​មីនា​ឆ្នាំមុន​ ​សម្តេចហ៊ុន​ ​សែន​ ​និង​នាយករដ្ឋមន្ត្រី​ម៉ាឡេស៊ី​ ​លោក​ ​An​war​ ​I​br​a​him​ ​បាន​ពិភាក្សា​ពី​ការ​តភ្ជាប់​ខ្សែកាប​ក្រោម​បាត​សមុទ្រ​ដែល​ឆ្លងកាត់​បាត​សមុទ្រ​ម៉ាឡេស៊ី​ ​ដើម្បី​បញ្ជូន​អគ្គិសនី​ពី​កម្ពុជា​ ​ទៅ​សិង្ហ​បុរី​។​សម្តេចបាន​កត់​សម្គាល់​ថា​៖​ ​«​នេះ​នឹង​ធានា​សន្តិសុខ​ថាមពល​សម្រាប់​ទាំង​ម៉ាឡេស៊ី​ ​និង​អា​ស៊ាន​»​។​សម្តេចបាន​លើកឡើង​ទៀត​ថា​ម៉ាឡេស៊ី​ទិញ​អង្ករ​ពី​កម្ពុជា​ ​បាន​ជួយ​ដល់​សេដ្ឋកិច្ច​កម្ពុជា​ ​និង​ធានា​សន្តិសុខ​ស្បៀង​ម៉ាឡេស៊ី​ ​ហើយ​កម្ពុជា​ក៏​ទិញ​ប្រេងដូង​ពី​ម៉ាឡេស៊ី​វិញ​ ​នេះ​គឺជា​ការ​បំពេញ​ឱ្យ​គ្នា​ទៅវិញទៅមក​។​

ជាមួយគ្នា​នេះ​ ​លោក​ S​h​a​h​ar​u​d​din​ Onn ​ឯកអគ្គរដ្ឋទូត​ម៉ាឡេស៊ី​ដែល​ទើប​តែងតាំង​ថ្មី​ប្រចាំ​កម្ពុជា​ ​បាន​អប​អរសាទរ​ចំពោះ​ ​សម្តេច​ ​ហ៊ុន​ ​សែន​ ​ដែល​ត្រូវ​បាន​ជ្រើសតាំង​ជា​ប្រធាន​ព្រឹទ្ធសភា​។​លោក​ឯកអគ្គរដ្ឋទូត​បាន​រំលឹក​ពី​ស្នាដៃ​ដ៏​ធំធេង​របស់​សម្តេច​ហ៊ុន​ ​សែន​ ​រួម​ទាំង​ការ​នាំមក​នូវ​សន្តិភាព​នៅ​កម្ពុជា​។​ ​លោក​បាន​កត់​សម្គាល់​ថា​៖​ ​«​សម្តេច​ហ៊ុន​ ​សែន​ ​បាន​ប្រែក្លាយ​កម្ពុជា​ពី​ប្រទេស​ក្រីក្រ​ទៅជា​ប្រទេស​ដែល​មានការ​អភិវឌ្ឍ​រីក​ចម្រើន​ជាបន្តបន្ទាប់​។​លោក​ឯកអគ្គរដ្ឋទូត​ក៏បាន​កោតសរសើរ​ចំពោះ​ទំនាក់ទំនង​រវាង​រដ្ឋាភិបាល​ ​និង​រដ្ឋាភិបាល​ ​ក៏ដូចជា​ទំនាក់ទំនង​រវាង​ប្រជាជន​ ​និង​ប្រជាជន​រវាងប្រទេស​ទាំងពីរ​។​​ប្រធាន​ព្រឹទ្ធសភា​ ​និង​ឯកអគ្គរដ្ឋទូត​ម៉ាឡេស៊ី​ក៏បាន​ពិភាក្សា​អំពី​ការ​ពង្រឹង​ឧស្សាហកម្ម​ម្ហូបអាហារ​ហា​ឡា​ល​ផង​ដែរ​ ​ដោយ​សម្តេច​ហ៊ុន​ ​សែន​ ​ចង់​ឃើញ​ឧស្សាហកម្ម​ហា​ឡា​ល​ជោគជ័យ​នៅ​កម្ពុជា​។​ក្នុង​ឱកាស​នោះ​ ​លោក​ឯកអគ្គរដ្ឋទូត​បាន​អញ្ជើញ​សម្តេចហ៊ុន​ ​សែន​ ​ទៅ​បំពេញ​ទស្សនកិច្ច​នៅ​ប្រទេស​ម៉ាឡេស៊ី​ ​ដោយ​សម្តេចទទួលយក​ការ​អញ្ជើញ​ ​នឹង​រក​ពេលវេលា​សមស្រប​ណាមួយ​នៅ​ពេល​ខាងមុខ​ដើម្បី​ទៅ​បំពេញ​ទស្សនកិច្ច​នៅ​ម៉ាឡេស៊ី​ ​។​​ក្នុង​ដំណើរ​ទស្សនកិច្ច​របស់​សម្តេច​នាយករដ្ឋមន្ត្រី​ ​ហ៊ុន​ ​ម៉ា​ណែ​ត​ ​តប​តាម​ការ​អញ្ជើញ​របស់​នាយករដ្ឋមន្ត្រី​ម៉ាឡេស៊ី​ ​លោក​ ​An​war​ ​កាលពី​ខែកុម្ភៈ​ ​សម្តេច​ហ៊ុន​ ​ម៉ា​ណែ​ត​ ​និង​សម​ភាគី​ម៉ាឡេស៊ី​បាន​ព្រមព្រៀងគ្នា​ក្នុង​ការ​ជំរុញ​កិច្ច​សហប្រតិបត្តិការ​សេដ្ឋកិច្ច​បន្ថែម​ទៀត​ ​និង​បាន​ពិចារណា​លើ​លទ្ធភាព​នៃ​ការ​បង្កើត​គណៈកម្មាធិការ​ពាណិជ្ជកម្ម​រួម​មួយ​។​​ក្នុង​អំឡុង​ពេល​នោះ​ ​លោកនាយក​រដ្ឋ​ម​ន្រ្តី ​An​war​ ​បាន​លើកឡើង​ថា​ “​សម្រាប់​វិ​ស័​យ​សេដ្ឋកិច្ច​ ​និង​ពាណិជ្ជកម្ម​ទ្វេភាគី​របស់យើង​បង្ហាញ​ពី​និន្នាការ​កើន​ឡើង។​ប៉ុន្តែ​យើង​នៅតែ​មាន​សក្ដានុពល​ជាច្រើន​ទៀត​ក្នុង​ការ​ពង្រឹង​ភាពជា​ដៃគូ​បន្ថែម​។​ ​យើង​នឹង​លើកទឹកចិត្ត​ដល់​វិ​ស័​យ​ឯកជន​នៃ​ប្រទេស​ទាំងពីរ​ដើម្បី​ជំរុញ​កិច្ច​សហប្រតិបត្តិការ​»​។​​របាយការណ៍​របស់​អគ្គនាយកដ្ឋាន​គយ​ ​និង​រដ្ឋាករ​បាន​បង្ហាញ​ថា​ ​ទំហំ​ពាណិជ្ជកម្ម​ទ្វេភាគី​រវាងប្រទេស​ទាំងពីរ​មាន​ចំនួន​ ​៦​៣​២​ ​លាន​ដុល្លារ​ក្នុង​ឆ្នាំ​ ​២​០​២​៣​៕KhmerTimes