ព្រះមហាក្សត្រ នរោត្តម សីហមុនី បានអំពាវនាវដល់សហគមន៍ជាតិ អន្តរជាតិ និងសប្បុរសជននានាជួយចូលរួមឧបត្ថម្ភគាំទ្រដល់ជនមានពិការភាពកម្ពុជាបន្ថែមទៀត ដើម្បីពួកគេបានទទួលការអប់រំ ការបណ្ដុះបណ្ដាលចំណេះវិជ្ជា មានការងារធ្វើដ៏សមរម្យ មានសិទ្ធិស្មើភាពគ្នា និងមានការរស់នៅថ្លៃថ្នូរសមរម្យនៅក្នុងសង្គម។ព្រះមហាក្សត្រ នរោត្តម សីហមុនី កាលពីថ្ងៃសៅរ៍បានយាងសួរសុខទុក្ខនិងប្រោសប្រទានព្រះរាជអំណោយដល់យោធិនពិការ គ្រួសារពលីដោយសង្រ្គាម និងយោធិនជានិវត្តជនក្រីក្រប្រមាណ៥០០គ្រួសាររស់នៅភូមិជីកដី ឃុំអណ្តូងត្របែក ស្រុករមាសហែក ខេត្តស្វាយរៀង។
 |
|
ព្រះមហាក្សត្របានមានព្រះបន្ទូលក្នុងពិធីនោះថា រដ្ឋាបាលបានបែងចែកដីធ្លី សាងសង់លំនៅឋាន កសាងហេដ្ឋារចនាសម្ពន្ធ តភ្ជាប់បណ្ដាញអគ្គិសនី និងជីកអណ្ដូងជូនដល់អតីតយុទ្ធជនចំនួន៥០០គ្រួសារនៅក្នុងភូមិជីកដី។ព្រះអង្គថា កម្ពុជាតែងតែប្រារព្ធទិវាជនមានពិការភាពជារៀងរាល់ឆ្នាំ ដើម្បីរំលឹកមហាវិនាសកម្មនៃសង្គ្រាមដែលបានបន្សល់ទុកនូវគ្រាប់មីននិងកាកសំណល់យុទ្ធភណ្ឌមិនទាន់ផ្ទុះជាច្រើនឥតគណនា ដែលជាឫសគល់ដែលកើតមានជនមានពិការភាព ស្ត្រីមេម៉ាយ និងកុមារកំព្រានៅទូទាំងប្រទេស។ បន្ថែមលើសពីនេះ ប្រជាជនកម្ពុជាក៏ប្រឈមរងគ្រោះដល់ពិការភាព ដូចជាការគ្រោះថ្នាក់ចរាចរណ៍ គ្រោះថ្នាក់ការងារ ព្រមទាំងពិការភាពខាងផ្នែកស្មារតីពីកំណើតជាដើម។ព្រះអង្គបានរំលឹកដល់វីរភាពរបស់អតីតព្រះមហាក្សត្រ នរោត្តម សីហនុ ដែលតែងតែសព្វព្រះរាជហរទ័យប្រោសប្រទានឧបត្ថម្ភគាំទ្រដល់ជនមានពិការភាព ជាពិសេសបានប្រោសប្រទានព្រះរាជអំណោយជាច្រើនលើកច្រើនគ្រា ដើម្បីជូនសម្រាលទុក្ខលំបាករបស់ជនមានពិការភាពនៅកម្ពុជាបានមួយចំនួនដែរ។ព្រះអង្គបានបន្ថែមថា រដ្ឋាភិបាលកម្ពុជាបានដាក់ចេញគោលនយោបាយលើកកម្ពស់ស្ថានភាពជនមានពិការភាពនៅកម្ពុជា ហើយក្នុងនោះក្រសួងសង្គមកិច្ច អតីតយុទ្ធជន និងយុវនីតិសម្បទា បានខិតខំអនុវត្តគោលនយោបាយនេះនិងបានរៀបចំច្បាប់ស្ដីពីកិច្ចគាំទ្រសិទ្ធិជនមានពិការភាព ដែលធ្វើឱ្យជនមានពិការភាពមានលទ្ធភាពអាចចូលរួមសកម្មភាពក្នុងនាមជាពលរដ្ឋ ដើម្បីជួយថែរក្សានិងអភិវឌ្ឍសង្គមជាតិ។ព្រះអង្គមានព្រះបន្ទូលថា តាមការខិតខំប្រឹងប្រែងរបស់រដ្ឋាភិបាល ភូមិដ្ឋានគ្រួសារយុទ្ធជនពលីនិងពិការបានកសាងឡើងនៅភូមិជីកដីខេត្តស្វាយរៀង។ព្រះអង្គមានព្រះបន្ទូលកោតសរសើរដល់សហគមន៍ជាតិនិងអាជ្ញាធរគ្រប់លំដាប់ថ្នាក់ ដែលមានសប្បុរសធម៌បានចូលរួមទាំងផ្នែកស្មារតី សម្ភារៈ និងថវិកាដ៏ច្រើន ដើម្បីសម្រាលសេចក្ដីទុក្ខលំបាករបស់ជនមានពិការភាពនៅមូលដ្ឋាននេះ។ព្រះអង្គបានមានព្រះបន្ទូលបន្តថា៖ «បងប្អូនបានបាត់បង់ផ្នែកណាមួយនៃរាងកាយពិតមែន។ប៉ុន្តែឆន្ទៈ ស្មារតីមោះមុត របស់បងប្អូននៅតែមាន។ បងប្អូនត្រូវការសិទ្ធិ សេរីភាព សេចក្ដីថ្លៃថ្នូរដូចមនុស្សទាំងឡាយនៅក្នុងសង្គមដែរ។ បងប្អូនរស់នៅក្នុងសង្គមរបស់យើងដោយភាពថ្លៃថ្នូរ ដែលជាសង្គមមិនមានឧបសគ្គ ជាទីដែលជនគ្រប់រូបត្រូវតែទទួលបាននូវការគោរពស្រឡាញ់និងមិនមានការរើសអើងឡើយ»។ព្រះអង្គបន្ថែមថា៖ «បងប្អូននៅតែមានតួនាទីសំខាន់ក្នុងការចូលរួមចំណែកថែរក្សា ការពារ អភិវឌ្ឍសង្គមជាតិ និងសន្តិភាពទៅតាមសមត្ថភាពរៀងៗខ្លួន»។ជាមួយនឹងគ្នានោះ ព្រះមហាក្សត្របានអំពាវនាវដល់សហគមន៍ជាតិ អន្តរជាតិ និងសប្បុរសធម៌នានាចូលរួមជួយឧបត្ថម្ភគាំទ្រជនពិការកម្ពុជាឱ្យបានទូលំទូលាយបន្ថែមទៀត ដើម្បីជនមានពិការភាពបានទទួលនូវការអប់រំ ការបណ្ដុះបណ្ដាលចំណេះវិជ្ជា មានការងារធ្វើដ៏សមរម្យ មានសិទ្ធិស្មើភាពក្នុងសង្គម និងមានការរស់នៅថ្លៃថ្នូរ។ព្រះអង្គមានព្រះបន្ទូលថា៖ «ខ្ញុំមានមហាកិត្តិយសនិងសេចក្ដីសោមនស្សរីករាយយ៉ាងក្រៃលែងបានជួបបងប្អូនផ្ទាល់ទាំង៥០០គ្រួសារ ដើម្បីខ្ញុំមានលទ្ធភាពជូនព្រះរាជអំណោយចំពោះបងប្អូនគ្រប់ៗរូប»៕ Khmer Times
/unnamed.png
Post a Comment