ប្រទេស​ថៃ​​បាន​​​ពន្យារពេល​កា​រ​​សម្រេច​កាត់ទោ​ស​លោក​Thaksinពី​​បទ​ប្រមាថ​រាជវង្ស

 ក្រសួងយុត្តិធម៌ថៃនឹងពន្យារពេលសវនាការពាក់ព័ន្ធនឹងការចោទប្រកាន់របស់អតីតនាយករដ្ឋមន្ត្រីThaksinពីបទប្រមាថព្រះរាជវង្សានុវង្សរហូតដល់ខែឧសភា។

អតីតនាយករដ្ឋមន្ត្រីThaksin Shinawatra ។Reuters

យោងតាមសារព័ត៌មាន Strait Times កាលពីថ្ងៃទី១០ ខែមេសា លោក Prayuth Pecharakun អ្នកនាំពាក្យរដ្ឋមន្ត្រីក្រសួងយុត្តិធម៌ថៃ បានប្រកាសថារដ្ឋាភិបាលនៃប្រទេសនេះកំពុងពន្យារពេលការសម្រេចចិត្តថាតើត្រូវកាត់ទោសអតីតនាយករដ្ឋមន្ត្រីThaksin Shinawatra ពីបទប្រមាថព្រះមហាក្សត្រ។លោកPrayuthបាននិយាយថា "ការសម្រេចចិត្តត្រូវបានពន្យារពេលដោយសារតែព្រះរាជអាជ្ញាមិនបានបញ្ជូនឯកសារគ្រប់គ្រាន់។ការស៊ើបអង្កេតនឹងបន្តហើយលោកThaksin នឹងត្រូវបានកោះហៅឱ្យស្តាប់ការប្រកាសនៅថ្ងៃទី២៩ខែឧសភា" ។បើ​តាម​មន្ត្រី​ថៃ លោកThaksin នៅ​តែ​អាច​សុំ​នៅ​ក្រៅ​ឃុំ​ក្នុង​ករណី​អគ្គ​មេធាវី​សម្រេច​កាត់​ទោស។កាលពីខែកុម្ភៈឆ្នាំនេះ លោកThaksin បានបង្ហាញខ្លួនទៅកាន់ការិយាល័យរបស់ព្រះរាជអាជ្ញា ដើម្បីសម្របសម្រួលការស៊ើបអង្កេតលើការចោទប្រកាន់ពីបទប្រមាថព្រះរាជវង្សានុវង្សទាក់ទងនឹងបទសម្ភាសន៍កាលពីឆ្នាំ២០១៥។ក្រោយ​លេច​មុខ អតីត​នាយក​រដ្ឋមន្ត្រី​បាន​ចាកចេញ​ដោយ​មាន​កិច្ច​សន្យា​ធានា​តម្លៃ៥០ម៉ឺន​បាត(ជិត១៤០០០ដុល្លារ)។ ការចោទប្រកាន់ថាប្រមាថព្រះរាជវង្សានុវង្សប្រឆាំងនឹងលោកThaksin គឺទាក់ទងទៅនឹងខ្លឹមសារនៃបទសម្ភាសន៍នៅប្រទេសកូរ៉េកាលពីឆ្នាំ២០១៥។រដ្ឋាភិបាលយោធាថៃនៅពេលនោះបានពឹងផ្អែកលើការអត្ថាធិប្បាយនេះដើម្បីចោទប្រកាន់លោកThaksinថាបានប្រមាថព្រះរាជវង្សានុវង្ស។ការ​ប្រមាថ​គ្រួសារ​រាជវង្ស​ជា​ឧក្រិដ្ឋកម្ម​ធ្ងន់ធ្ងរ​នៅ​ប្រទេស​ថៃ។ ទោសអតិបរមាសម្រាប់ទង្វើនេះអាចជាប់ពន្ធនាគាររហូតដល់១៥ឆ្នាំ៕ពុតសាម៉ាត់