មូលហេ​តុ​ដែល​បេឡារុស​មិន​បាន​ចូល​រួម​ផ្ទាល់​ក្នុង​ជម្លោះ​អ៊ុយ​ក្រែនខ្លាចរងគ្រោះគ្រាប់​មីន​តាមព្រំដែន

 ប្រធានាធិបតីបេឡារុស្សAlexanderLukashenkoបានពន្យល់ពីមូលហេតុដែលប្រទេសរបស់លោកមិនបញ្ជូនកងកម្លាំងទៅចូលរួមដោយផ្ទាល់នៅក្នុងយុទ្ធនាការយោធាពិសេសរបស់រុស្ស៊ីនៅអ៊ុយក្រែន។

ទាហានរុស្ស៊ីធ្វើប្រតិបត្តិការប្រព័ន្ធមីស៊ីលប្រឆាំងរថក្រោះKornet នៅអ៊ុយក្រែន។ រូបថត៖ Sputnik

យោងតាមកាសែត Pravdaរបស់ប្រទេសអ៊ុយក្រែននៅក្នុងការថតវីដេអូនៃការសន្ទនាដែលបានបង្ហោះនៅលើបណ្តាញ Telegram កាលពីថ្ងៃទី១១ខែមេសា លោក Lukashenkoបាននិយាយថា“ប្រសិនបើយើងនឹងចូលរួមជម្លោះប្រឆាំងនឹងអ៊ុយក្រែនវានឹងមិនអាចជួយបានទេ។ដោយសារតែពួកគេ (អ៊ុយក្រែន) បានពង្រឹងព្រំដែនជាមួយបេឡារុស្សយើងមិនអាចទៅទីនោះបានទេ”។ប្រធានាធិបតី​បេឡារុស​បាន​បន្ថែម​ថាអ៊ុយក្រែន​បាន​ដាក់គ្រាប់​មីននិង​ចាក់​បេតុង​របង​ព្រំដែន​រវាង​ប្រទេស​ទាំង​ពីរ។លោក​ប៉ាន់​ប្រមាណ​ថា ក្រុង​គៀវ​កំពុង​រក្សា​ទាហាន​ប្រហែល១២ ម៉ឺន​នាក់​ជា​អចិន្ត្រៃយ៍​ក្នុង​តំបន់​ព្រំដែន។

រុស្ស៊ី​បាន​វាយ​ប្រហារ​រោងចក្រ​ថាមពល​អ៊ុយក្រែន​ជា​បន្តបន្ទាប់

ទីភ្នាក់ងារសារព័ត៌មានSputnikបានដកស្រង់សេចក្តីប្រកាសនៅថ្ងៃនេះ (១២មេសា)ពីក្រសួងការពារជាតិរុស្ស៊ីដែលបាននិយាយថាទាហានម៉ូស្គូបានធ្វើការវាយប្រហារចំនួន៤៨លើកប្រឆាំងនឹងរោងចក្រថាមពលនិងយោធារបស់អ៊ុយក្រែនជាបន្តបន្ទាប់ក្នុងសប្តាហ៍មុន។"ចាប់ពីថ្ងៃទី៦ដល់ថ្ងៃទី១២ខែមេសាកងកម្លាំងប្រដាប់អាវុធរុស្ស៊ីបានធ្វើការវាយប្រហារទ្រង់ទ្រាយធំមួយ និងការវាយឆ្មក់ជាក្រុមចំនួន៤៧លើកដោយប្រើអាវុធច្បាស់លាស់នៅលើអាកាស សមុទ្រ និងនៅលើដី ... ផ្តោតលើប្រព័ន្ធស្តុកឥន្ធនៈ ថាមពល និងកន្លែងយោធារបស់អ៊ុយក្រែន។ចំណាត់ការនេះគឺដើម្បីឆ្លើយតបទៅនឹងកិច្ចខិតខំប្រឹងប្រែងរបស់រដ្ឋាភិបាលក្រុងគៀវក្នុងការធ្វើឱ្យខូចខាតដល់ឧស្សាហកម្មប្រេង និងឧស្ម័ន និងហេដ្ឋារចនាសម្ព័ន្ធថាមពលរបស់រុស្ស៊ី" ដកស្រង់សេចក្តីថ្លែងការណ៍របស់អាជ្ញាធររុស្ស៊ី។នៅថ្ងៃដដែល CNN បានរាយការណ៍ថាកងទ័ពរុស្ស៊ីបានបំផ្លាញរោងចក្រថាមពលកំដៅ Trypilskaដែលជាកន្លែងផ្គត់ផ្គង់អគ្គិសនីដ៏ធំបំផុតនៅក្នុងតំបន់គៀវក្នុងការវាយប្រហារតាមអាកាសទ្រង់ទ្រាយធំកាលពីថ្ងៃទី១១ខែមេសា។កងទ័ពអាកាសអ៊ុយក្រែនបានរាយការណ៍ថាខ្លួនបានបាញ់ទម្លាក់យន្តហោះគ្មានមនុស្សបើកចំនួន៣៩គ្រឿងនិងកាំជ្រួចចំនួន១៨គ្រឿងដោយជោគជ័យហើយ UAV និងមីស៊ីលសរុបចំនួន៨២គ្រឿងត្រូវបានប្រើប្រាស់ដោយកងកម្លាំងទីក្រុងម៉ូស្គូក្នុងការវាយប្រហារនេះ។ទោះបីជាយ៉ាងណាក៏ដោយអាជ្ញាធរអ៊ុយក្រែនក៏បានទទួលស្គាល់ថា ក្នុងចំណោមអាវុធរុស្ស៊ីខាងលើ មានកាំជ្រួច Kinzhal ដែលមានល្បឿនលឿនជាងសំឡេងចំនួន៦គ្រាប់ដែល«គ្មានប្រព័ន្ធការពារដែនអាកាសអ៊ុយក្រែនណាអាចបាញ់និងរារាំងបានឡើយ»។យោងតាមប្រតិបត្តិករថាមពលរបស់អ៊ុយក្រែនUkrenergoតំបន់ជាច្រើននៅក្នុងប្រទេសរួមមាន Dnipropetrovsk, Donetsk, Sumy, Kharkiv និង Kherson បានបាត់បង់ថាមពលដោយសារតែការវាយប្រហារខាងលើ។Ukrenergo បានអំពាវនាវឱ្យប្រជាជនកំណត់ការប្រើប្រាស់ឧបករណ៍អគ្គិសនីពីម៉ោង៧យប់ដល់ម៉ោង៩យប់ក្នុងពេលថ្ងៃដើម្បីកាត់បន្ថយបន្ទុកលើបណ្តាញអគ្គិសនីខណៈអាជ្ញាធររកវិធីដោះស្រាយបញ្ហា៕ពុតសាម៉ាត់