ថៃ​នឹង​មិន​​បាត់បង់​អធិបតេយ្យភាព​​លើ​កោះ​កុ​ដ​ក្នុង​ខេត្ត​ត្រា​តម​ក​ឱ្យ​កម្ពុជា​នោះ​ទេ​

 ​​រដ្ឋាភិបាល​បាន​ផ្តល់​ការធានា​របស់​ខ្លួន​ថា​ប្រទេស​ថៃ​នឹង​មិន​បាត់បង់អធិបតេយ្យភាព​លើ​កោះ​កុ​ដ​(Ko​h​ Koo​d​)ក្នុង​ខេត្ត​ត្រា​តមក​ឱ្យ​កម្ពុជា​ក្នុង​ការចរចា​នា​ពេល​អនាគត​រវាងប្រទេស​ទាំងពីរ​ទាក់ទង​នឹង​ការ​ចែករំលែក​ធនធាន​សមុទ្រ​នៅ​ក្នុង​តំបន់​ទាមទារ​ត្រួត​ស៊ីគ្នា​នោះទេ។នេះការតាមចេញផ្សាយBang​kok ​Post។​

រូបភាព៖Bang​kok ​Post

​រដ្ឋមន្ត្រីការបរទេស​ ​លោក​ ​Par​n​pre​e​ B​a​h​i​d​d​h​a​-Nuk​ar​a​ ​បាន​លើកឡើង​ក្នុង​អំឡុង​កិច្ចពិភាក្សា​ទូទៅ​របស់​ព្រឹទ្ធសភា​កាលពី​យប់​ថ្ងៃចន្ទ​ថា​ ​ការ​នេះ​ត្រូវ​បាន​បញ្ជាក់​យ៉ាង​ច្បាស់​នៅ​ក្នុង​សន្ធិសញ្ញា​ដែល​បាន​ចុះហត្ថលេខា​រវាង​បារាំង​ ​និង​សៀម​ (​ដែល​ជា​អតីត​ឈ្មោះ​របស់​ប្រទេស​ថៃ​) ​នៅ​ឆ្នាំ​១​៩​០​៧​ថា​បារាំង​បាន​ប្រគល់​ខេត្ត​ត្រា​ត​និង​កោះ​រវាង​L​in​g​ ​cape​ ​និង​Ko​h​ Koo​d​ទៅ​ឱ្យ​សៀម​វិញ​។លោក​រដ្ឋមន្ត្រី​បាន​មានប្រសាសន៍ថា​លោក​យល់ស្រប​នឹង​សំណើ​របស់​ព្រឹទ្ធសភា​​ដែល​ថា​ការចរចា​ថ្មី​ណាមួយ​អំពី​ការ​បោះបង្គោល​ព្រំដែន​នៃ​ធ្នើ​ទ្វីប​ដែល​មាន​ជម្លោះ​នៅ​ក្នុង​តំបន់​ទាមទារ​ត្រួត​ស៊ីគ្នា​រវាង​កម្ពុជា​-​ថៃ​ ​ត្រូវតែ​ធ្វើឡើង​ទន្ទឹម​នឹង​ការចរចា​ណាមួយ​ស្តីពី​ការ​ចែករំលែក​ធនធាន​ក្រោមទឹក​។​ធ្នើ​ទ្វីប​គឺជា​គែម​នៃ​ទ្វីប​ដែល​ស្ថិតនៅ​ក្រោម​មហាសមុទ្រ​។​លោក​ ​Par​n​pre​e​ ​ដែល​ជា​ឧបនាយករដ្ឋមន្ត្រី​ក៏​កំពុង​ឆ្លើយតប​ទៅ​នឹង​កង្វល់​ដែល​បាន​លើកឡើង​អំពី​ផល​ប៉ះពាល់​ការទូត​ ​និង​ផ្លូវច្បាប់​ដែល​អាច​កើតមាន​នៃ​គម្រោង​របស់​រដ្ឋាភិបាល​ថៃ​ ​ក្នុង​ការចរចា​ជាមួយ​កម្ពុជា​លើ​ការ​ចែករំលែក​ធនធាន​សមុទ្រ​ដោយ​មិន​និយាយ​អំពី​បញ្ហា​ធ្នើ​ទ្វីប​។​​បើ​ទោះ​ជា​លោក​បញ្ជាក់​ថា​ ​បញ្ហា​ទាំងពីរ​នេះ​ ​គួរតែ​ពិភាក្សា​ជាមួយគ្នា​ក្នុង​កិច្ច​ចរចា​នា​ពេល​ខាងមុខ​ក៏ដោយ​ ​ក៏​លោក​ ​Par​n​pre​e​ ​បាន​ទទួលស្គាល់​ថា​ ​ត្រង់​ចំណុច​នេះ​ ​លោក​មិន​មាន​សិទ្ធិ​អំណាច​ក្នុង​ការ​សម្រេច​ចិត្ត​លើ​បញ្ហា​នោះ​ទេ​ ​ខណៈ​ដែល​គណៈកម្មាធិការ​ទទួលបន្ទុក​ការចរចា​មិនទាន់​ត្រូវ​បាន​បង្កើត​ឡើង​នៅឡើយ​។​ ​លោក​បាន​បន្ត​ថា​ ​ការ​បង្កើត​គណៈកម្មាធិការ​ ​នឹង​ទាមទារ​ឱ្យ​មានការ​អនុម័ត​ពី​គណៈរដ្ឋមន្ត្រី​។​​លោក​ ​Par​n​pre​e​ ​បាន​មានប្រសាសន៍ថា​ ​ការចរចា​ផ្លូវការ​ចំនួន​បួន​លើក​ ​និង​ការចរចា​ក្រៅផ្លូវការ​ចំនួន​ប្រាំ​បី​ត្រូវ​បាន​ធ្វើឡើង​រវាងប្រទេស​ថៃ​ ​និង​កម្ពុជា​ ​ដោយ​យោង​តាម​អនុស្សរណៈ​នៃ​ការយោគយល់​គ្នា​ដែល​បាន​ចុះហត្ថលេខា​ ​ក្នុង​ឆ្នាំ​២​០​០​១​ ​ដោយ​ប្រទេស​ទាំងពីរ​​​ដែល​បង្ហាញ​ពី​ចេតនា​របស់​ភាគី​ទាំងពីរ​ ​ក្នុង​ការផ្សះផ្សា​លើ​តំបន់​ទាមទារ​ត្រួត​ស៊ីគ្នា​។​ ​លោក​បាន​បន្ថែម​ថា​ ​ចាប់តាំង​ពី​ពេល​នោះ​មក​ ​មិនទាន់​មានការ​រីក​ចម្រើន​លើ​បញ្ហា​នេះ​ទេ​។​នៅ​ថ្ងៃ​ទី​៧​ ​ខែកុម្ភៈ​ សម្តេចហ៊ុន​ ​ម៉ា​ណែ​ត​ ​នាយករដ្ឋមន្ត្រី​កម្ពុជា​ ​បាន​ទៅ​បំពេញ​ទស្សនកិច្ច​ផ្លូវការ​នៅ​ប្រទេស​ថៃ​។​ ​នៅ​ពេល​នោះ​ ​បញ្ហា​តំបន់​ទាមទារ​ត្រួត​ស៊ីគ្នា​ក៏​ត្រូវ​បាន​ពិភាក្សា​ផង​ដែរ​ ​ក្នុងចំណោម​ប្រធាន​បទ​ផ្សេងទៀត​។​​លោក​រដ្ឋមន្ត្រី​បាន​មានប្រសាសន៍ថា​ ​មេដឹកនាំ​ថៃ​ ​និង​កម្ពុជា​ ​បាន​ឯកភាព​គ្នា​ជាបន្តបន្ទាប់​ ​ដើម្បី​ពិភាក្សា​បន្ថែម​ទៀត​អំពី​ការ​ចែករំលែក​ធនធាន​នៅ​ក្នុង​តំបន់​ទាមទារ​ត្រួត​ស៊ីគ្នា​៕

​