សហរដ្ឋ​អាមេរិកបានលក់រ​ថក្រោះចំនួន៥០គ្រឿងក្នុងតម្លៃ២.២ពាន់លា​នដុល្លារទៅឱ្យប្រទេស​អារ៉ាប់

 កាលពីថ្ងៃទី១៩ខែមីនារដ្ឋាភិបាលសហរដ្ឋអាមេរិកបានអនុម័តការលក់រថក្រោះប្រយុទ្ធកម្រិតខ្ពស់ដែលមានតម្លៃ២.២ពាន់លានដុល្លារទៅឱ្យប្រទេសបារ៉ែនដែលជាសម្ព័ន្ធមិត្តឈូងសមុទ្រអារ៉ាប់ធ្លាប់ទទួលរងការហាមឃាត់អាវុធដោយទីក្រុងវ៉ាស៊ីនតោន។

ទាហាន​អាមេរិក​ជិះ​រថក្រោះ Abrams ចូលរួម​ក្នុង​សមយុទ្ធ​ណាតូ​នៅ Korzeniowa ប្រទេស​ប៉ូឡូញ កាលពី​ថ្ងៃទី៤ ខែមីនា។ រូបថត៖ AFP

យោងតាមទីភ្នាក់ងារសារព័ត៌មានAFP ក្រសួងការបរទេសសហរដ្ឋអាមេរិកបានជូនដំណឹងដល់សភាថា ខ្លួនសុខចិត្តលក់រថក្រោះ M1A2 Abrams ចំនួន៥០គ្រឿងទៅកាន់ប្រទេសបារ៉ែន។"ការលក់ដែលបានស្នើឡើងនឹងធ្វើអោយប្រសើរឡើងនូវសមត្ថភាពរបស់ប្រទេសបារ៉ែនក្នុងការឆ្លើយតបទៅនឹងការគំរាមកំហែងនាពេលបច្ចុប្បន្ននិងនាពេលអនាគតដោយផ្តល់នូវកម្លាំងដែលអាចទុកចិត្តបានដែលអាចរារាំងសត្រូវព្រមទាំងផ្តល់នូវសមត្ថភាពក្នុងការចូលរួមក្នុងសកម្មភាពក្នុងតំបន់ជាមួយសហរដ្ឋអាមេរិកនិងបណ្តាប្រទេសដៃគូផ្សេងទៀតរបស់សហរដ្ឋអាមេរិក"ក្រសួងការបរទេស​បាន​បញ្ជាក់។យោងតាមដំណើរការនេះសភាអាមេរិកនៅតែអាចទប់ស្កាត់ការលក់នេះបាន ទោះបីជាប្រតិបត្តិការយោធាភាគច្រើនត្រូវបានអនុម័តក៏ដោយ។បារ៉ែនជាកន្លែងដែលកងនាវាទី៥របស់កងទ័ពជើងទឹកអាមេរិកឈរជើង ហើយត្រូវបានចាត់ទុកថាជាសម្ព័ន្ធមិត្តដ៏សំខាន់របស់វ៉ាស៊ីនតោននៅខាងក្រៅអង្គការណាតូ។នេះផ្តល់ឱ្យបារ៉ែននូវឯកសិទ្ធិនៃកិច្ចសហប្រតិបត្តិការការពារជាតិជាមួយសហរដ្ឋអាមេរិក។ប្រទេសកោះតូចមួយក៏មានទំនាក់ទំនងតានតឹងជាមួយប្រទេសជិតខាងអ៊ីរ៉ង់ផងដែរ។បារ៉ែន គឺជាប្រទេសអារ៉ាប់តែមួយគត់ដែលបានចូលរួមជាមួយក្រុមចម្រុះដឹកនាំដោយសហរដ្ឋអាមេរិក និងចក្រភពអង់គ្លេសដែលបានវាយប្រហារក្រុមឧទ្ទាម Houthiរបស់យេម៉ែនកាលពីឆ្នាំមុនបន្ទាប់ពីការវាយប្រហារលើការដឹកជញ្ជូននៅក្នុងតំបន់។ក្រុម​ឧទ្ទាម Houthi អះអាង​ថាការ​វាយ​ប្រហារ​របស់​ខ្លួន​មាន​គោល​បំណង​បង្ហាញ​សាមគ្គីភាព​ជាមួយ​ប៉ាឡេស្ទីន​ក្នុង​ជម្លោះ​រវាង​អ៊ីស្រាអែលនិង​ចលនា​អ៊ីស្លាម​ហាម៉ាស់។រថក្រោះ Abrams ដែលជារថក្រោះធ្ងន់បំផុតមួយក្នុងពិភពលោកគឺជារថក្រោះសំខាន់របស់យោធាអាមេរិក។ រថក្រោះ M1A2 Abrams ជារឿយៗត្រូវបានប្រើសម្រាប់ការប្រយុទ្ធលើដី។កាលពីឆ្នាំមុន ប្រធានាធិបតីអាមេរិក Joe Biden បានយល់ព្រមបញ្ជូនរថក្រោះ Abrams ទៅកាន់ប្រទេសអ៊ុយក្រែនដើម្បីជួយប្រទេសក្នុងសង្គ្រាមរបស់ខ្លួនជាមួយរុស្ស៊ី។ក្រសួងការបរទេសសហរដ្ឋអាមេរិកបាននិយាយថាអ្នកម៉ៅការរបស់សហរដ្ឋអាមេរិកប្រហែល៣០នាក់និងមន្ត្រីរដ្ឋាភិបាលម្នាក់នឹងត្រូវបញ្ជូនទៅប្រទេសបារ៉ែនរយៈពេលរហូតដល់៥ ឆ្នាំ ដើម្បីផ្តល់ការបណ្តុះបណ្តាល។ក្នុងឆ្នាំ២០១១បារ៉ែនត្រូវបានរិះគន់ចំពោះការបង្ក្រាបការបះបោរដែលដឹកនាំដោយសហគមន៍ស៊ីអ៊ីត បន្ទាប់ពីទទួលបានការគាំទ្រពីអារ៉ាប៊ីសាអូឌីត។ប្រធានាធិបតី​អាមេរិក​នៅ​ពេល​នោះ លោកBarack Obamaបាន​ដាក់​ទណ្ឌកម្ម​អាវុធ​រយៈពេល៤ ឆ្នាំ​លើ​ប្រទេស​បារ៉ែន។ប្រទេសបារ៉ែនត្រូវបានបន្ធូរបន្ថយការហាមឃាត់ក្រោមការដឹកនាំរបស់អតីតប្រធានាធិបតីDonaldTrumpដែលបានសរសើរការទទួលស្គាល់របស់បារ៉ែនចំពោះអ៊ីស្រាអែល។កាលពីឆ្នាំមុន រដ្ឋបាល Biden បានចុះហត្ថលេខាលើកិច្ចព្រមព្រៀងថ្មីមួយជាមួយប្រទេសបារ៉ែន ដើម្បីពង្រឹងទំនាក់ទំនងផ្នែកការពារជាតិនិងសេដ្ឋកិច្ចរួមទាំងការចែករំលែកព័ត៌មានសម្ងាត់កាន់តែច្រើន៕ពុតសាម៉ាត់