កម្ពុជានិងម៉ាឡេស៊ីបានឯកភាពគ្នាលើវិស័យមួយចំនួនដើម្បីជំរុញបន្ថែមនូវទំនាក់ទំនងនិងកិច្ចសហប្រតិបត្តិការទ្វេភាគីរវាងប្រទេសទាំងពីរ។
 |
|
ការឯកភាពនេះធ្វើឡើងក្នុងជំនួបទ្វេភាគីរវាងសម្តេចធិបតីហ៊ុន ម៉ាណែត នាយករដ្ឋមន្ត្រីនៃកម្ពុជា និងសមភាគីម៉ាឡេស៊ី ឯកឧត្តម ដាតុ ស៊េរី អាន់វ៉ា អ៊ីប្រាហ៊ីម (Dato’ Seri Anwar Ibrahim) នៅទីក្រុងគូឡាឡាំពួប្រទេសម៉ាឡេស៊ី កាលពីម្សិលមិញ។ក្នុងឱកាសនោះ មេដឹកនាំទាំងពីរបានវាយតម្លៃខ្ពស់ចំពោះលទ្ធផលនៃកិច្ចសហប្រតិបត្តិការទ្វេភាគីនាពេលកន្លងមក ព្រមទាំងបានផ្លាស់ប្តូរទស្សនៈ លើការពង្រឹងនិងពង្រីកកិច្ចសហប្រតិបត្តិការលើវិស័យផ្សេងៗ រួមមាន នយោបាយ ការពារជាតិ សន្តិសុខ ពាណិជ្ជកម្ម និងវិនិយោគ ទេសចរណ៍ ឧស្សាហកម្ម អាហារហាឡាល់ ទូរគមនាគមន៍ និងព័ត៌មានវិទ្យា បច្ចេកវិទ្យាឌីជីថល និងសន្តិសុខថាមពល។មេដឹកនាំទាំងពីរក៏បានពិភាក្សាគ្នាអំពីលទ្ធភាពនៃការពង្រីកជើងហោះហើរត្រង់ពីម៉ាឡេស៊ីទៅកាន់គោលដៅទេសចរណ៍សំខាន់ៗរបស់កម្ពុជា ដូចជាខេត្តសៀមរាបជាដើម។ក្នុងក្របខ័ណ្ឌនៃវិស័យការពារជាតិ និងសន្តិសុខ ភាគីទាំងពីរបានឯកភាពបន្តជំរុញកិច្ចសហប្រតិបត្តិការ រួមមានការបណ្តុះបណ្តាលធនធានមនុស្ស ការកសាងសមត្ថភាព ការផ្លាស់ប្តូរព័ត៌មាន និងលំហាត់សមយុទ្ធរួមគ្នា ចំណែកវិស័យសន្តិសុខថាមពល ភាគីទាំងពីរបានឯកភាពគាំទ្រ និងសម្របសម្រួលគម្រោងបញ្ជូនថាមពលក្រោមបាតសមុទ្រ ( ឡាវ-កម្ពុជា-សិង្ហបុរី) ដោយឆ្លងកាត់ដែនសមុទ្រម៉ាឡេស៊ី។ក្រៅពីនេះ សមភាគីទាំងពីរបានឯកភាពគ្នាក្នុងការពិនិត្យលទ្ធភាពនៃការរៀបចំកិច្ចប្រជុំគណៈកម្មការចម្រុះសម្រាប់កិច្ចសហប្រតិបត្តិការទ្វេភាគី (JCBC) ដែលដឹកនាំដោយរដ្ឋមន្ត្រីការបរទេសទាំងពីរ។នាយករដ្ឋមន្ត្រីទាំងពីរបានសម្តែងសុទិដ្ឋិនិយមថាទំនាក់ទំនងរវាងកម្ពុជា និងម៉ាឡេស៊ីនឹងកាន់តែរឹងមាំ និងអាចឈានដល់កម្រិតកាន់តែខ្ពស់។បន្ទាប់ពីកិច្ចពិភាក្សាទ្វេភាគីរួចមក សម្តេច ហ៊ុន ម៉ាណែត និងឯកឧត្តម អាន់វ៉ា អ៊ីប្រាហ៊ីម បានអញ្ជើញជាអធិបតីក្នុងពិធីចុះហត្ថលេខាលើអនុស្សរណៈយោគយល់គ្នារវាងធនាគារជាតិនៃកម្ពុជា និងធនាគារជាតិម៉ាឡេស៊ី (Negara Malaysia) ស្តីពីកិច្ចសហប្រតិបត្តិការលើវិស័យនវានុវត្តន៍ហិរញ្ញវត្ថុ និងប្រព័ន្ធទូទាត់។គណៈប្រតិភូជាន់ខ្ពស់កម្ពុជា ដឹកនាំដោយសម្តេចធិបតីហ៊ុន ម៉ាណែត បានទៅដល់ទីក្រុងគូឡាឡាំពួ កាលពីម្សិលមិញ ដើម្បីបំពេញទស្សនកិច្ចផ្លូវការរយៈពេលមួយថ្ងៃ៕
/unnamed.png
Post a Comment