Houthiបា​ញ់ទម្លាក់យន្តហោះ​ចម្បាំងអាមេរិក?

ប៉ុន្មានម៉ោងបន្ទាប់ពីនាវាចម្បាំងកងទ័ពជើងទឹកអាមេរិកបានបាញ់មីស៊ីល Tomahawkទៅកាន់ទីតាំងHouthi ចំនួន៦ក្នុងប្រទេសយេម៉ែនកងកម្លាំង Houthiបានប្រកាសថាពួកគេបានបាញ់ទម្លាក់យន្តហោះចម្បាំងF-22 Raptorរបស់អាមេរិក។ភាគីHouthiបានប្រកាសនៅលើវេទិកាបណ្តាញទំនាក់ទំនងសង្គមជាមុនសិន។ទោះ​ជា​យ៉ាង​ណា​ក៏​ដោយ នៅ​មិន​ទាន់​មាន​ភស្តុតាង​បញ្ជាក់​ថាយន្តហោះ​អាមេរិក​ត្រូវ​បាន​គេ​បាញ់​ទម្លាក់​នៅ​ឡើយ​ទេ។ទន្ទឹមនឹងនេះកងទ័ពជើងទឹកអាមេរិកកាលពីថ្ងៃទី១២ខែមករា បានព្រមានកប៉ាល់ដែលដាក់ទង់ជាតិអាមេរិកឱ្យនៅឆ្ងាយពីតំបន់ជុំវិញប្រទេសយេម៉ែនក្នុងសមុទ្រក្រហមនិងឈូងសមុទ្រAdenក្នុងរយៈពេល៧២ម៉ោងបន្ទាប់ពីសហរដ្ឋអាមេរិកនិងចក្រភពអង់គ្លេសបានធ្វើការវាយប្រហារតាមអាកាសជាច្រើនតម្រង់ទៅលើក្រុមHouthi។ការព្រមាននេះបានកើតឡើងនៅពេលដែលកងកម្លាំងHouthiនៅក្នុងប្រទេសយេម៉ែនបានប្តេជ្ញាសងសឹកយ៉ាងខ្លាំងក្លាប្រឆាំងនឹងការវាយប្រហារដែលដឹកនាំដោយសហរដ្ឋអាមេរិក ដែលបង្កើនហានិភ័យនៃជម្លោះកាន់តែទូលំទូលាយនៅក្នុងតំបន់។

យុទ្ធជនHouthiដែលត្រូវបានជ្រើសរើសថ្មីក្នុងអំឡុងពិធីបញ្ចប់ការហ្វឹកហ្វឺននៅ Sanaa - Yemen នៅថ្ងៃទី១១ខែមករា។ រូបថត៖ Reuters

មន្ត្រីយោធាអាមេរិក និងសេតវិមានបានព្យាករណ៍ថា កងកម្លាំង Houthi នឹងព្យាយាមវាយបក។យោងតាមទីភ្នាក់ងារព័ត៌មានReuters មន្ទីរបញ្ចកោណកាលពីថ្ងៃទី១២ខែមករាមានសុទិដ្ឋិនិយមដោយប្រយ័ត្នប្រយែងថាកងកម្លាំងHouthiគាំទ្រដោយអ៊ីរ៉ង់។ នាយកប្រតិបត្តិនៃអគ្គសេនាធិការចម្រុះអាមេរិក លោក Douglas Sims បាននិយាយថាទីតាំងHouthiចំនួន២៨ត្រូវបានវាយប្រហារជាមួយនឹងគ្រាប់រំសេវជាង១៥០ប្រភេទ។លោកSimsបាននិយាយថា"សហរដ្ឋអាមេរិកបានបន្ទាបបន្ថោកសមត្ថភាពរបស់ពួកគេ។ខ្ញុំមិនជឿថាពួកគេអាចធ្វើដូចដែលពួកគេបានធ្វើកាលពីថ្ងៃមុននោះទេ។ប៉ុន្តែយើងនឹងមើលពួកគេ" ។លោកSimsបន្ថែមថា អាមេរិករំពឹងថាក្រុមHouthiនឹងព្យាយាមសងសឹក ហើយក្រុមនេះបានបាញ់មីស៊ីលផ្លោងប្រឆាំងនាវាចូលទៅក្នុងសមុទ្រក្រហមកាលពីថ្ងៃទី១២ខែមករា។ប៉ុន្តែមីស៊ីលនេះមិនបានបាញ់ដល់នាវាណាមួយឡើយ។យោងតាមទូរទស្សន៍ CNN លោក Mohammed Ali al-Houthi ប្រធានគណៈកម្មាធិការបដិវត្តន៍ជាន់ខ្ពស់នៃក្រុម Houthis កាលពីថ្ងៃទី ១២ ខែមករាបានអំពាវនាវឱ្យសហរដ្ឋអាមេរិក និងចក្រភពអង់គ្លេស ត្រឡប់ទៅប្រទេសវិញហើយផ្តោតលើការដោះស្រាយបញ្ហានៃការរើសអើងជាតិសាសន៍ជាជាងការពារកប៉ាល់អ៊ីស្រាអែល។លោកក៏បានអំពាវនាវឱ្យប្រទេសទាំងនេះគោរពតាមការព្រមានរបស់មេដឹកនាំ Houthi លោក Abdul-Malik al-Houthi នាពេលថ្មីៗនេះថាការវាយប្រហារណាមួយលើយេម៉ែន នឹងត្រូវបានឆ្លើយតបយ៉ាងខ្លាំងក្លា។ក្រុមហាម៉ាស់ក៏បានថ្កោលទោសការវាយប្រហារដោយនិយាយថាសហរដ្ឋអាមេរិកនិងចក្រភពអង់គ្លេសនឹងទទួលខុសត្រូវចំពោះផលប៉ះពាល់នៃការវាយប្រហារទៅលើសន្តិសុខក្នុងតំបន់។ឆ្លើយតបនឹងការវាយប្រហារទៅលើក្រុមHouthiអ្នកនាំពាក្យរបស់ណាតូកាលពីថ្ងៃទី១២ខែមករាបានអះអាងថាការវាយប្រហារដោយទាហានអាមេរិក និងអង់គ្លេសប្រឆាំងនឹងកងកម្លាំង Houthi ដែលគាំទ្រដោយអ៊ីរ៉ង់នៅយេម៉ែន គឺជាការការពារសេរីភាពដោយសារតែការធ្វើនាវាចរណ៍នៅក្នុងផ្នែកមួយដ៏សំខាន់បំផុតផ្លូវទឹករបស់ពិភពលោក។ទន្ទឹមនឹងនោះ ប្រធានាធិបតីតួកគី Tayyip Erdogan បានរិះគន់ការវាយប្រហាររបស់សហរដ្ឋអាមេរិក និងចក្រភពអង់គ្លេសលើគោលដៅHouthiក្នុងប្រទេសយេម៉ែនថាជាការប្រើប្រាស់កម្លាំងមិនសមហេតុផលហើយបានចោទប្រកាន់ប្រទេសទាំង២ថាព្យាយាមប្រែក្លាយសមុទ្រក្រហមទៅជា"សមុទ្រឈាម"។ប្រតិកម្មយ៉ាងម៉ឺងម៉ាត់ ក្រសួងការបរទេសអ៊ីរ៉ង់បាននិយាយថាការវាយប្រហាររបស់សហរដ្ឋអាមេរិក និងចក្រភពអង់គ្លេសបានរំលោភយ៉ាងច្បាស់លាស់អធិបតេយ្យភាព និងបូរណភាពទឹកដីរបស់ប្រទេសយេម៉ែនព្រមទាំងបានបំពានច្បាប់អន្តរជាតិផងដែរ។ ទន្ទឹមនឹងនេះ ក្រសួងការបរទេសអារ៉ាប៊ីសាអូឌីត បានអំពាវនាវឱ្យមានការអត់ធ្មត់និងជៀសវាងការកើនឡើងនៃភាពតានតឹង ហើយបាននិយាយថាខ្លួនកំពុងតាមដានស្ថានការណ៍ដោយការព្រួយបារម្ភយ៉ាងខ្លាំង។អគ្គលេខាធិការអង្គការសហប្រជាជាតិ លោក Antonio Guterresក៏បានអំពាវនាវដល់ភាគីទាំងអស់កុំធ្វើឱ្យស្ថានការណ៍អស្ថិរភាពនៅសមុទ្រក្រហមកើនឡើង៕ពុតសាម៉ាត់