ឯកឧត្តមអភិសន្តិបណ្ឌិតស សុខា៖ការរៀបចំឱ្យមានការប្រកួតកីឡាប៊ូលនិងប៉េតង់សន្តិភាពវ័យចាស់គឺជាការរួមចំណែកដល់ការអនុវត្តគោលនយោបាយជាតិស្តីពីមនុស្សវ័យចាស់របស់រាជរដ្ឋាភិបាល

ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានកិត្តិយសសហព័ន្ធកីឡាប៊ូល និងប៉េតង់កម្ពុជា បានគូសបញ្ជាក់ថា ការរៀបចំឱ្យមានការប្រកួតកីឡាប៊ូល និងប៉េតង់សន្តិភាពវ័យចាស់ គឺជាការរួមចំណែកដល់ការអនុវត្ត “គោលនយោបាយជាតិស្តីពីមនុស្សវ័យចាស់ ២០១៧- ២០២៣” របស់រាជរដ្ឋាភិបាល ដែលជាការគិតគូរដល់មនុស្សវ័យចាស់ តាមរយៈ ការដាក់ចេញនូវផែនការយុទ្ធសាស្ត្រ សំដៅធានា ឱ្យបាននូវសន្តិសុខ ប្រាក់ចំណូល, កាត់បន្ថយ ភាពងាយរងគ្រោះផ្នែកសេដ្ឋកិច្ចនិងហិរញ្ញវត្ថុ របស់ប្រជាជនវ័យចាស់ ព្រមទាំងលើកកម្ពស់សុ ខុមាលភាពរបស់ពួកគាត់ ប្រកបដោយសមធម៌, ពង្រឹងសាមគ្គីភាព និងភាពសុខដុមរមនានៅក្នុង សង្គមជាតិ។ ការថ្លែងបែបនេះធ្វើឡើងក្នុងឱកាសដែលឯកឧត្តមអភិសន្តិបណ្ឌិត អញ្ជើញជាអធិបតីដ៏ខ្ពង់ខ្ពស់ពិធីបើកការប្រកួតកីឡាប៊ូល និងប៉េតង់សន្តិភាពវ័យចាស់ ពានរង្វាន់ឯកឧត្តមបណ្ឌិត សោម ចិន តំណាងរាស្ត្រមណ្ឌលខេត្តកំពត អនុប្រធានគណៈកម្មការទី៨ នៃរដ្ឋសភា និងជាប្រធានក្លិបកីឡាប៊ូល និងប៉េតង់សន្តិភាព នាព្រឹកថ្ងៃទី១៧ ខែធ្នូ ឆ្នាំ២០២៣ នៅទីលានប៊ូល និងប៉េតង់ពហុកីឡដ្ឋានជាតិ។

ថ្លែងក្នុងឱកាសនោះ ឯកឧត្តមអភិសន្តិបណ្ឌិត ស សុខា បានថ្លែងអំណរគុណ និងគាំទ្រចំពោះឯកឧត្តមបណ្ឌិត សោម ចិន ដែលមានគំនិតផ្តួចផ្តើម កៀរគរជាថវិកា សម្ភារៈ និងចំណាយពេលវេលាដ៏មមាញឹក ដើម្បីរៀបចំការប្រកួតកីឡាប៊ូល និងប៉េតង់សន្តិភាពវ័យចាស់នេះឡើង ក្នុងគោលបំណងលើកកម្ពស់កីឡាប៊ូល និងប៉េតង់របស់យើង។ ឯកឧត្តមអភិសន្តិបណ្ឌិត ស សុខា ចាត់ទុកថា ការរៀបចំឱ្យមានប្រកួតកីឡាប៊ូល និងប៉េតង់សន្តិភាពវ័យចាស់ នេះឡើង គឺជាគំនិតផ្តួចផ្តើមមួយដ៏ល្អ ក្នុងការបំផុសស្មារតី ក៏ដូចជាទាក់ទាញចំណាប់អារម្មណ៍របស់អតីតកីឡាករប៊ូល និងប៉េតង់ ដែលមានវ័យចំណាស់ ឬអ្នកចូលនិវត្តន៍ ឱ្យមកចូលរួមប្រកួតកម្សាន្តសប្បាយ ក្នុងន័យលើកកម្ពស់សុខភាពផ្ទាល់ខ្លួន និងរឹតចំណងសាមគ្គីភាព ក៏ដូចជាបានចែករំលែកនូវបទពិសោធសម្រាប់យុវជន និងជាពិសេសសម្រាប់កីឡាករថ្នាលជំនាន់ក្រោយ។ថ្លែងក្នុងឱកាសនោះដែរ ឯកឧត្តមអភិសន្តិបណ្ឌិត ស សុខា បានគូសបញ្ជាក់ថាកីឡាគឺជាផ្នែកមួយយ៉ាងសំខាន់ក្នុងការបំផុសនូវស្មារតីស្នេហាជាតិ។ជាពិសេសការបង្កើតនូវស្មារតីនៃការចូលរួមពីគ្រប់តួអង្គពាក់ព័ន្ធ… នេះគឺជាប្រសាសន៍ដ៏ថ្លៃថ្លា របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលបានថ្លែងនារាត្រីថ្ងៃទី១៧ ខែវិច្ឆិកា ឆ្នាំ២០២៣ នៅពហុកីឡដ្ឋានជាតិមរតកតេជោ ក្នុងពេលសម្តេច អញ្ជើញជាអធិបតីពិធីជប់លៀង អបអរសាទរជោគជ័យ នៃការរៀបចំការប្រកួតកីឡាអាស៊ីអាគ្នេយ៍លើកទី៣២ និងអាស៊ានប៉ារ៉ាហ្គេមលើកទី១២ ឆ្នាំ២០២៣៕