នាយករ​ដ្ឋមន្ត្រី៖រាជរដ្ឋាភិបាល​ចំណា​យថវិកាជាង៦០ម៉ឺនដុល្លារក្នុង១ឆ្នាំ​ស​ម្រាប់​ការ​​ដឹកជញ្ជូនបងប្អូនប្រ​ជាព​លរដ្ឋកម្មករ

ឯកឧត្ដមកិត្ដិទេសាភិបាលបណ្ឌិតហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រ​កម្ពុជា​បានបញ្ជាក់ថា រាជរដ្ឋាភិបាលបានចំណាយថវិកាប្រមាណជាង៦០ម៉ឺនដុល្លារក្នុង​ការ​ធានាដឹកជញ្ចូនបង​ប្រជា​ពលរដ្ឋនិងកម្មករកម្មការិនីតាមរថយន្ដក្រុងទៅស្រុកកំណើត ទាំងទៅទាំងមក សម្រាប់រដូវបុណ្យទានរបស់ជាតិក្នុងមួយឆ្នាំ។ 

ការបញ្ជាក់របស់​ឯកឧត្ដម​កិត្ដិ​ទេសាភិបាលបណ្ឌិតនាយករដ្ឋមន្រ្ដីបែបនេះ ក្នុងឱកាស​អញ្ជើញ​ចុះ​ជួប​សំណេះ​សំណាលជាមួយកម្មករ និយោជិត ចំនួន ១៨ ២៨៩ នាក់មកពី​តាម​​បណ្តា​រោងចក្រ សហគ្រាស នៅក្រុងតាខ្មៅ ខេត្តកណ្តាល។ឯកឧត្ដមកិត្ដិទេសាភិបាលបណ្ឌិត ហ៊ុន ម៉ាណែត មានប្រសាសន៍ថាការចំណាយក្នុងកា​ជួយប្រជាពលរដ្ឋគឺអត់មានច្រើននោះទេហើយការចំណាយអី្វក៏ដោយឱ្យតែដល់​ដៃប្រជា​ពលរដ្ឋគឺអត់គិតច្រើនតិចទេគឺធ្វើយ៉ាងណាដល់ដៃប្រជាពលរដ្ឋត្រូវបញ្ចេញជូនគាត់។ ឯកឧត្ដមកិត្ដិទេសាភិបាលបណ្ឌិតបានអះអាងថា នេះគឺជាគោលនយោបាយ​ដែលបាន​អនុវត្ដន៍កន្លងទៅដោយសម្ដេចតេជោ ហ៊ុន សែន ហើយគោលនយោបាយដឹកនាំថ្មី​របស់​រាជរដ្ឋាភិ​បាលថ្មី គឺនៅតែបន្ដដដែល។ ឯកឧត្តមនាយករដ្ឋមន្ត្រីបានលើកឡើងថាក្នុងការ​ដឹកជញ្ជូនបងប្អូនកម្មករកម្មការិនីនិងប្រជាពលរដ្ឋនៅថ្ងៃបុណ្យទានមួយពេលៗ​ក្នុង​មួយឆ្នាំ រដ្ឋបានចំណាយថវិកាប្រមាណជាង៦០ម៉ឺនដុល្លារអាម៉េរិក។  ឯកឧត្ដមកិត្ដិ​ទេសា​ភិ​បាលបណ្ឌិតនាយករដ្ឋ​មន្រ្ដី​ថ្លែង​បញ្ជាក់ថា៖ «យើងគ្រាន់តែគិតចំណាយក្នុង​មួយ​ពេលៗដឹក រដ្ឋគ្រាន់តែធានាថាដឹកប្រ​ជាពលរដ្ឋក្នុងមួយជើងៗ គឺចំណាយថវិកាជាង៦០ដុល្លារ ក្នុងការ​ដឹកទៅដឹកមកក្នុងមួយ​ឆ្នាំ»។ជាមួយគ្នានេះ ឯកឧត្តមនាយករដ្ឋមន្ត្រីក៏បានណែនាំឱ្យឱ្យលោកឃួង ស្រេង អភិបាលរាជធានីភ្នំពេញសូមត្រៀមរថយន្តក្រុងទៀតសម្រាប់ដឹកបងប្អូនកម្មករ កម្មការិនី​ទៅ​ស្រុកទៅលេងភ្ជុំបិណ្ឌឱ្យសប្បាយក្នុងឆ្នាំនេះ។ ឯកឧត្ដមកិត្ដិទេសាភិបាលបណ្ឌិត​បាន​បន្ថែមថា៖ «ឡានក្រុងឥឡូវសុទ្ធតែទំនើប​មានម៉ាស៊ីត្រជាក់ដូចជាថ្ងៃមុនទៅថ្ងៃបោះ​ឆ្នោត​ដឹកបងប្អូនកម្មករទាំងទៅទាំងមករាប់រយគ្រឿងឯណោះ ហើយការចំណាយសម្រាប់​បង​ប្អូនប្រជាពលរដ្ឋអត់មានច្រើនទេ»។ ឯកឧត្តកិត្ដិទេសាភិបាលបណ្ឌិតក៏បានលើកឡើងពីភាពជាក់ស្តែងកាលពីនៅក្នុងពេលជំនាន់កូវីដវាយលុកដោយគូសបញ្ជាក់ផងដែរថាសម្រាប់ថវិកាដែលរាជរដ្ឋាភិបាលសន្សំទុក​ដើម្បីធ្វើផ្លូវ ស្ពាន និងធ្វើអ្វីផ្សេងទៀតបានជាង២ ឬ៣ពាន់លានដុល្លារ តែត្រូវយកថវិកា​ទាំងនេះ មកចំណាយ​សម្រាប់ជួយជីវិតប្រជាពលរដ្ឋដោយមិនមានការសោកស្តាយ​អ្វី​ឡើយ។ក្នុងឱកាសនោះដែរ ឯកឧត្តមនាយករដ្ឋមន្ត្រីក៏បានប្រកាសឱ្យដឹងផងដែរថា ការ​ចរចា​ប្រាក់​ឈ្នួលអប្បបរមា កម្មករ និយោជិត សម្រាប់ឆ្នាំ២០២៤ នឹងដឹងលទ្ធផលនៅ​មុន​ថ្ងៃ​ភ្ជុំបិណ្ឌ​៕AKP