គណៈរដ្ឋមន្ត្រីកម្ពុជាសម្រាប់អាណត្តិទី៧នៃរដ្ឋសភាដែលដឹកនាំដោយឯកឧត្តមនាយករដ្ឋមន្ត្រី ហ៊ុន ម៉ាណែតបានបើកកិច្ចប្រជុំជាលើកដំបូងនៅថ្ងៃព្រហស្បតិ៍នេះ នៅវិមានសន្តិភាព ដោយមានការចូលរួមពីសមាជិករបស់ខ្លួនរួមមានឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រី និងរដ្ឋមន្ត្រីប្រតិភូអមនាយករដ្ឋមន្ត្រីផងដែរ។
 |
|
តាមទីស្តីការគណៈរដ្ឋមន្ត្រី កិច្ចប្រជុំនេះផ្តោតទៅលើរបៀបវារៈសំខាន់ស្តីពីការប្រកាសឲ្យអនុវត្តនូវយុទ្ធសាស្ត្របញ្ចកោណដំណាក់កាលទី១ និងរបៀបវារៈចាំបាច់មួយចំនួនទៀត។ក្រៅពីនាយករដ្ឋមន្ត្រី ហ៊ុន ម៉ាណែត អានបទឧទ្ទេសនាមដោយសង្ខេបស្តីពី«យុទ្ធសាស្ត្របញ្ចកោណដំណាក់កាលទី១» និង«វិធានការគន្លឹះរបស់រាជរដ្ឋាភិបាលនីតិកាលទី៧ នៃរដ្ឋសភា»ដែលមាន២២ទំព័រ របៀបវារៈមួយចំនួនទៀតក៏ត្រូវបានដាក់ឲ្យមានការពិភាក្សានិងឆ្លងកិច្ចប្រជុំផងដែរ។ចំណុចសំខាន់ៗទាំងនោះរួមមានការពិនិត្យ និងសម្រេចលើសេចក្តីព្រាងច្បាប់ស្តីពីការកែសម្រួលឈ្មោះក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច ទៅជា«ក្រសួងអធិការកិច្ច»។ ក្រៅពីនេះក៏មានផងដែរនូវការពិនិត្យ និងសម្រេចលើសេចក្តីព្រាងច្បាប់ស្តីពីការបង្កើត រដ្ឋលេខាធិការដ្ឋានកិច្ចការព្រំដែន ការណែនាំរបស់នាយករដ្ឋមន្ត្រីអំពីរបៀបរបបការងារ និងកិច្ចដំណើរការនៃគណៈរដ្ឋមន្ត្រី រួមនឹងបញ្ហាផ្សេងៗទៀត។ទាក់ទងទៅនឹងយុទ្ធសាស្ត្របញ្ចកោណដំណាក់កាលទី១ និងវិធានការគន្លឹះរបស់រដ្ឋាភិបាលអាណត្តិទី៧ នៃរដ្ឋសភា ឯកឧត្តមនាយករដ្ឋមន្ត្រី ហ៊ុន ម៉ាណែត បានអានដោយផ្ទាល់នូវចំណុចសំខាន់ៗជាច្រើន ដែលក្នុងនោះរួមមានសវតា និងការរំលឹកឡើងវិញនូវយុទ្ធសាស្ត្រនយោបាយត្រីកោណ និងចតុកោណទាំង៤ដំណាក់កាលកន្លងមកភាពចាំបាច់នៃយុទ្ធសាស្ត្របញ្ចកោណ បេសកកម្មនៃយុទ្ធសាស្ត្រ និងអភិក្រមក្នុងការអនុវត្តន៍ បាវចនា គោលដៅយុទ្ធសាស្ត្រ និងអាទិភាពគន្លឹះនៃយុទ្ធសាស្ត្រ រចនាសម្ព័ន្ធនិងខ្លឹមសារសង្ខេបនៃយុទ្ធសាស្ត្រ។លើសពីនេះ ក៏មានកម្មវិធីគោលនយោបាយអាទិភាពទាំង៦ សម្រាប់ចាប់ផ្តើមអនុវត្តភ្លាមក្នុងឆ្នាំ២០២៣ និងចំណុចសំខាន់ចុងក្រោយគឺយន្តការសម្របសម្រួល តាមដាន ត្រួតពិនិត្យ និងវាយតម្លៃការអនុវត្តន៍។ ឯកឧត្តមនាយករដ្ឋមន្ត្រី ហ៊ុន ម៉ាណេត នៅទីបញ្ចប់ក៏បានអំពាវនាវដល់មន្ត្រីរាជការ កងកម្លាំងប្រដាប់អាវុធ ប្រជាពលរដ្ឋ អង្គការក្រៅរដ្ឋាភិបាលចូលរួម និងគាំទ្រដល់ការអនុវត្តន៍គោលនយោបាយរបស់រដ្ឋាភិបាលក្នុងក្របខណ្ឌនៃយុទ្ធសាស្ត្របញ្ចកោណដំណាក់កាលទី១ ក៏ដូចជាវិធានការគន្លឹះដែលបានដាក់ចេញផងដែរ៕RFI
/unnamed.png
Post a Comment