នាយ​ករដ្ឋមន្រ្តីកម្ពុជាស្វាគ​ម​ន៍បណ្ដាប្រទេ​សនិងស្ថាប័​នអន្តរជា​​តិដែ​ល​ចូលរួមសង្កេត​ការ​ណ៍​បោះឆ្នោតជ្រើសរើ​​សតំ​​ណាងរាស្ត្រនីតិ​កា​​លទី៧

 សម្ដេចហ៊ុន សែននាយករដ្ឋមន្រ្តីនៃកម្ពុជាបានសម្ដែងនូវ​ការ​ស្វាគមន៍ចំពោះបណ្ដាប្រទេសនិងស្ថាប័នអន្តរជាតិដែលចូលរួមសង្កេតការណ៍ សម្រាប់​ការបោះឆ្នោតសកលជ្រើសរើសតំណាងរាស្ត្រ នីតិកាលទី៧ នាថ្ងៃទី២៣ ខែ​កក្កដា ឆ្នាំ២០២៣ នៅព្រះរាជាណាចក្រកម្ពុជា។

សម្ដេចហ៊ុន សែននាយករដ្ឋមន្រ្តីនៃកម្ពុជា។Reuters

នៅលើបណ្ដាញតេឡេក្រាម នាព្រឹកថ្ងៃទី២០ ខែកក្កដា ឆ្នាំ២០២៣ សម្ដេចហ៊ុន សែន បានសរសេរថា៖ «ក្នុងនាមរាជរដ្ឋាភិបាល ខ្ញុំសូមស្វាគមន៍យ៉ាងកក់ក្តៅ​ចំពោះ​ឯកឧត្តម លោកជំទាវ ទាំង៣៣៣នាក់ មកពី៦៥ប្រទេស និងស្ថាបន័អន្តរជាតិដែល​បាន​និងកំពុងអញ្ជើញមកកាន់ព្រះរាជាណាចក្រកម្ពុជាដើម្បីចូលរួមសង្កេតការណ៍សម្រាប់ការ​បោះឆ្នោតសកលជ្រើសរើសតំណាងរាស្ត្រ និតិកាលទី៧ នាថ្ងៃអាទិត្យ ទី២៣ ខែកក្កដា ឆ្នាំ២០២៣ ខាងមុខនេះ»។  សម្ដេចនាយករដ្ឋមន្ត្រីក៏បានថ្លែងអំណរគុណចំពោះ ឯកឧត្ដម​ប្រធានសភា ប្រទេសម៉ាឡេស៊ី និងឯកឧត្តមនាយករដ្ឋមន្ត្រី នៃសាធារណរដ្ឋ​ហ្គីណេប៊ីស្សូ ដែលអញ្ជើញ​មកដើម្បីសង្កេតការណ៍ដោយផ្ទាល់និងថ្លែងអំណរគុណ ឯកឧត្តមអតីតប្រមុខរដ្ឋ ប្រមុខ​រដ្ឋាភិ​បាល អតីតប្រធាន អនុប្រធានរដ្ឋសភាទាំង១១រូប ដែលបានចំណាយពេលវេលាធ្វើ​ដំណើរ​មកកាន់កម្ពុជាដើម្បីធ្វើជាសាក្សីនៃដំណើរការប្រជាធិបតេយ្យនៅកម្ពុជា។ សម្ដេចលើកឡើងថា៖«យើងធ្លាប់បានបោះឆ្នោតសកលជ្រើសរើសតំណាងរាស្ត្រ ៦លើក​រួច​មកហើយ និងលើកទី៧ ឆ្នាំ២០២៣នេះ មានអ្នកសង្កេតការណ៍មកពីក្រៅប្រទេស​ច្រើន​បំផុត និងមានឥស្សរជនជាន់ខ្ពស់ច្រើនបំផុតមកចូលរួមសង្កេតការណ៍»។គួរបញ្ជាក់ដែរថា ការបោះឆ្នោតជាតិជ្រើសតាំងតំណាងរាស្រ្ត នីតិកាលទី៧  នឹង​ប្រារព្ធ​ឡើង នៅថ្ងៃអាទិត្យ ទី២៣ ខែកក្កដា ឆ្នាំ២០២៣ ខាងមុខនេះ ដោយមានគណបក្ស​ចំនួន១៨ ចូលរួមប្រកួតប្រជែង ខណៈយុទ្ធនាការឃោសនាបោះឆ្នោត គឺមានរយៈពេល២១​ថ្ងៃ ដោយចាប់ផ្តើមពីថ្ងៃទី០១ ដល់ថ្ងៃទី២១ ខែកក្កដា ឆ្នាំ២០២៣៕AKP