នាយករដ្ឋមន្រ្តីលើកឡើងថាEBA២០ភាគរយរបស់សហគមន៍អឺរ៉ុបមិនប៉ះពាល់ច្រវាក់ផលិតនៅកម្ពុជានោះទេ
សម្ដេចហ៊ុន សែននាយករដ្ឋមន្រ្តីនៃកម្ពុជាបានថ្លែងប្រាប់កម្មករជាថ្មីម្ដងទៀតថាការដកប្រព័ន្ធអនុគ្រោះពន្ធអ្វីគ្រប់យ៉ាងលើកលែងតែអាវុធ (EBA)ចំនួន២០ភាគរយរបស់សហគមន៍អឺរ៉ុបមិនប៉ះពាល់ច្រវាក់ផលិតនៅកម្ពុជានោះទេ ដោយសម្ដេចគូសបញ្ជាក់ថាEBAគឺគង់តែបាត់បង់ នៅពេលកម្ពុជាក្លាយជាប្រទេសមានចំណូលខ្ពស់។ក្នុងឱកាសអញ្ជើញចុះជួបសំណេះសំណាលជាមួយកម្មករ និយោជិតសរុបជាង ១ម៉ឺន ៦ពាន់នាក់ មកពីរោងចក្រ សហគ្រាសនានា នៅស្រុកគងពិសី ខេត្តកំពង់ស្ពឺ នាព្រឹកថ្ងៃទី០៤ ខែមិថុនា ឆ្នាំ២០២៣ សម្ដេចតេជោនាយករដ្ឋមន្ត្រីមានប្រសាសន៍ថា EBA វាគង់តែបាត់ ១០០ភាគរយ ក្នុងពេលខាងមុខ អាចនឹងប៉ាន់ប្រមាណនៅឆ្នាំ២០២៦ ឬ២០២៧ ព្រោះប្រទេសរបស់យើង គឺជាប្រទេស ដែលមិនមែនជាប្រទេសអភិវឌ្ឍន៍តិចតួចទៀតឯណា បន្តិចទៀតកម្ពុជានឹងចេញផុតពីប្រទេសអភិវឌ្ឍន៍តិចតួច។ សម្ដេចតេជោថ្លែងបញ្ជាក់ថា៖ «ដូច្នេះរកស៊ីត្រូវតែបង់ពន្ធឱ្យគេ ដូចជា អង្ករក៏ដូចជាគ្នា អង្ករអ៊ីតាលី អេស្ប៉ាញ លក់មិនដាច់ ក៏នាំគ្នាដាក់ឱ្យអង្ករកម្ពុជា និងអង្ករមីយ៉ាន់ម៉ា ត្រូវតែបង់ពន្ធ ហើយយើងក៏បង់ពន្ធ។ ពេលមិនទាន់បង់ពន្ធក៏យើងនាំចេញបាន ដល់ពេលគេឱ្យបង់ពន្ធយើងក៏នាំចូលបាន គ្រាន់តែចំណេញតិចជាងមុនប៉ុណ្ណោះ។ ដូច្នេះ យើងត្រូវតែពង្រឹងភាពធន់ខ្លួនឯងចាប់ពីឥឡូវនេះទៅ»។
សម្ដេចបានគូសបញ្ជាក់បន្ថែមថាកម្ពុជាបាននិយាយរួចហើយ ជាមួយមិត្ដចិន ជប៉ុន កូរ៉េខាងត្បូង និងធនាគារអភិវឌ្ឍន៍អាស៊ីថា នៅពេលកម្ពុជាងើបចេញ ពីប្រទេសមានការអភិវឌ្ឍន៍តិចតួច សូមបន្តផ្តល់ប្រាក់កម្ចី ជាមួយអត្រាការប្រាក់អនុគ្រោះ។ សម្ដេចបានថ្លែងបន្ថែមជាថ្មីថា កម្ពុជាមិនយកអធិបតេយ្យជាតិរបស់ខ្លួន ទៅដោះដូរជាមួយជំនួយ ឬការអនុគ្រោះណាទាំងអស់។គួរបញ្ជាក់ដែរថាកម្ពុជាបច្ចុប្បន្នបានក្លាយជាប្រទេស មានចំណូលមធ្យមកម្រិតទាប នៅក្នុងឆ្នាំ២០១៦ ហើយរាជរដ្ឋាភិបាលបានកំណត់ទិសដៅ ធ្វើយ៉ាងណាប្រែក្លាយជាប្រទេសចំណូលមធ្យមកម្រិតខ្ពស់ នៅឆ្នាំ២០៣០ និងជាប្រទេសមានចំណូលខ្ពស់ នៅឆ្នាំ២០៥០។បើតាមរបាយការណ៍របស់រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានឱ្យដឹងថា មកដល់ត្រឹមឆ្នាំ២០២៣នេះ រោងចក្រ សហគ្រាស មានជាង ១ម៉ឺន៧ពាន់ ដែលប្រើប្រាស់កម្លាំងពលកម្មសរុបចំនួនប្រមាណ ១លាន៥សែននាក់ ហើយនៅឆ្នាំ២០២៣ នេះ ផ្នែករោងចក្រកាត់ដេរ បានកើនចំនួន ១ ៣២៦ និងមានកម្មករនិយោជិតចំនួនប្រមាណ ៨៤ម៉ឺននាក់ (ស្រី ៦៦ម៉ឺននាក់) ការនាំចេញមាន រហូតដល់ប្រមាណ ១៣ពាន់លានដុល្លារអាម៉េរិក ទិន្នន័យឆ្នាំ២០២២ ដែលក្នុងនោះ រាជធានីភ្នំពេញមានចំនួន ៧២៧រោងចក្រ មានកម្មករ និយោជិតប្រមាណ ៣៤ម៉ឺននាក់ (ស្រី ២៦ម៉ឺននាក់)៕AKP
/unnamed.png
Post a Comment