លោកយឹម ស៊ីណនតែងតាំងជាអនុរដ្ឋលេខាធិការខណៈលោកហ៊ុន កុសលស្ថិតនៅក្រៅឃុំ
សាលាដំបូងរាជធានីភ្នំពេញបានសម្រេចដោះលែងលោក ហ៊ុន កុសល អតីតសកម្មជនគណបក្សសង្គ្រោះជាតិឱ្យស្ថិតនៅក្រៅឃុំបណ្តោះអាសន្ន បន្ទាប់ពីលោក យឹម ស៊ីណន ត្រូវបានព្រះមហាក្សត្រ តែងតាំងជាអនុរដ្ឋលេខាធិការក្រសួងការងារនិងបណ្ដុះបណ្ដាលវិជ្ជាជីវៈ កាលពីរសៀលថ្ងៃសៅរ៍។លោក ហ៊ុន កុសល ត្រូវបានសមត្ថកិច្ចចាប់ខ្លួនជាមួយនឹងលោក យឹម ស៊ីណន កាលពីថ្ងៃទី២១ ខែមីនា ឆ្នាំ២០២៣ ហើយត្រូវបានតុលាការសម្រេចឃុំខ្លួនបណ្តោះអាសន្ននៅពន្ធនាគារព្រៃសបន្ទាប់ពីអ្នកទាំង២បានបង្ហោះសារនៅលើបណ្តាញសង្គមរបស់លោកពាក់ព័ន្ធនឹងព្រះមហាក្សត្រ ព្រះបាទ នរោត្តម សីហមុនី ព្រះរាជទានព្រះអគ្គីជ័យកីឡា ប្រកួតកីឡាអាស៊ីអាគ្នេយ៍លើកទី៣២និងអាស៊ានប៉ារ៉ាហ្គេមលើកទី១២ នៅខេត្តសៀមរាប។លោក ហ៊ុន កុសល និងលោក យឹម ស៊ីណន ត្រូវបានតុលាការចោទប្រកាន់២បទល្មើស រួមមានដូចជា បទល្មើសប្រមាថចំពោះអង្គព្រះមហាក្សត្រ និងបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម តាមមាត្រា៤៣៧(ស្ទួន) នៃច្បាប់ស្តីពីវិសោធនកម្មក្រមព្រហ្មទណ្ឌ មាត្រា៤៩៤ និងមាត្រា៤៩៥ នៃក្រមព្រហ្មទណ្ឌ។កាលពីថ្ងៃទី២៨ ខែមីនា ឆ្នាំ២០២៣ លោក យឹម ស៊ីណន ត្រូវបានតុលាការអនុញ្ញាតឱ្យនៅក្រៅឃុំវិញបន្ទាប់ពីលោកបានចេញវីដេអូ និងសរសេរលិខិតមួយច្បាប់ សូមព្រះរាជទានទោសពីព្រះមហាក្សត្រ និងសូមទោសសម្តេចនាយករដ្ឋមន្ត្រី ហ៊ុន សែន។កាលពីថ្ងៃទី២២ ខែមេសា តុលាការបានបន្តសម្រេចឱ្យលោក ហ៊ុន កុសល រស់នៅក្រៅឃុំ បន្ទាប់ពីសម្តេចនាយករដ្ឋមន្ត្រី ហ៊ុន សែន អនុញ្ញាតឱ្យលោក យឹម ស៊ីណន និងគ្រួសារ ចូលជួបនៅគេហដ្ឋាននាក្រុងតាខ្មៅ ខេត្តកណ្ដាល និងក្រោយពីព្រះមហាក្សត្រ តែងតាំងលោក យឹម ស៊ីណន ជាអនុរដ្ឋលេខាធិការនៃក្រសួងការងារ និងបណ្ដុះបណ្ដាលវិជ្ជាជីវៈ។កាលពីថ្ងៃសៅរ៍ ចៅក្រមស៊ើបសួរ នៃសាលាដំបូងរាជធានីភ្នំពេញ លោកស្រី យី សុខវួច បានបញ្ជាឱ្យប្រធានមណ្ឌលអប់រំកែប្រែទី១ នៃក្រសួងមហាផ្ទៃ ដោះលែងហ៊ុន កុសល ប្រសិនបើលោក ហ៊ុន កុសល មិនត្រូវបានឃុំខ្លួនពីបទល្មើសផ្សេងទៀតនោះទេ។លោក យឹម ស៊ីណន អតីតសកម្មជនគណបក្សសង្គ្រោះជាតិ បានសរសេរនៅលើបណ្ដាញសង្គមកាលពីថ្ងៃសៅ ដោយបានថ្លែងអំណរអរគុណដល់សម្តេចនាយករដ្ឋមន្ត្រី ហ៊ុន សែន ដែលបានផ្តល់នូវការអនុគ្រោះនិងសម្របសម្រួលដល់រូបលោកឱ្យបាននៅក្រៅឃុំបណ្តោះអាសន្ន។លោកបានបន្តអរគុណដល់នាយករដ្ឋមន្ត្រី ដែលបានផ្តល់កិត្តិយសដល់លោក និងគ្រួសារបានចូលជួបសម្តែងការគួរសម ដោយមិនរើសអើងផ្នែកនយោបាយព្រមទាំងទទួលយករូបលោកចូលជាសមាជិកគណបក្សប្រជាជនកម្ពុជា។ លោកបញ្ជាក់ថា៖ «[,,,] នាមជាអ្នកនយោបាយ គឺជាអ្នកធ្វើការដោយស្ម័គ្រចិត្តបម្រើដល់ពលរដ្ឋ និងសង្គមជាតិទាំងមូល។ ដូច្នេះការផ្លាស់ប្តូរនិន្នាការឬគណបក្សនយោបាយណាមួយ វាមិនមែនជាវីធីកាត់ផ្តាច់ផ្លូវឬជារនាំងរាំងខ្ទប់នូវឧត្តគតិនិងឆន្ទៈជាអ្នកនយោបាយបម្រើសង្គមជាតិនោះទេ»។លោកបន្តថា៖ «ក្នុងន័យនេះ ខ្ញុំមិនមានភាពចាំបាច់ឬមិនមានពេលសោះឡើយសម្រាប់ពន្យល់ដល់អ្នកមិនយល់ អ្វីដែលខ្ញុំកំពុងគិតនិងបារម្ភខ្លាំងជាងគេនោះគឺ តើខ្ញុំអាចមានលទ្ធភាព និងសមត្ថភាពប៉ុណ្ណា សម្រាប់ជួយដល់បក្សនិងសង្គមជាតិ»។ជុំវិញបញ្ហានេះ លោក ហ៊ុន កុសល បាននិយាយថា៖ «គិតត្រឹមថ្ងៃទី២២ ខែមេសា ឆ្នាំ២០២៣ ខ្ញុំត្រូវបានឃុំខ្លួនចំនួន៣១ថ្ងៃគត់។ ក្នុងថ្ងៃនេះដដែល ខ្ញុំត្រូវបានតុលាការដោះលែងឱ្យនៅក្រៅឃុំជាបណ្តោះអាសន្ន។ឱកាសដែលខ្ញុំអាចនៅក្រៅឃុំបណ្តោះអាសន្ននេះ ដោយសារមានការសម្របសម្រួលដ៏សំខាន់ពីសម្តេចហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា»។លោកក៏បានស្នើដល់សម្តេចនាយករដ្ឋមន្ត្រី ហ៊ុន សែន ផ្ដល់ការអនុគ្រោះជួយសម្របសម្រួលចំពោះសកម្មជននយោបាយអតីតគណបក្សសង្រ្គោះជាតិផ្សេងទៀត ដែលកំពុងជាប់ឃុំក្នុងពន្ធនាគារ និងសកម្មជននយោបាយព្រមទាំងសកម្មជនសង្គមទាំងអស់ ដើម្បីឱ្យពួកគេបាននៅក្រៅឃុំ អាចជួបជុំឪពុកម្តាយ ស្វាមី ភរិយា សាច់ញាតិ និងគ្រួសារដូចដើមវិញ។កាលពីម្សិលមិញ សម្តេចហ៊ុន សែនបានប្រកាសស្វាគមន៍ លោក ហ៊ុន កុសល ដែលស្នើសូមចុះចូលជាមួយគណបក្សប្រជាជនកម្ពុជា។ សម្តេចនាយករដ្ឋមន្ត្រីបញ្ជាក់ថា៖ «ក្នុងនាមគណបក្សប្រជាជនកម្ពុជា ខ្ញុំសូមស្វាគមន៍ទទួលយកលោក ហ៊ុន កុសល ដើម្បីចូលរួមជីវភាពនយោបាយជាមួយគណបក្សប្រជាជនកម្ពុជា»។កាលពីម្សិលមិញ លោក ហ៊ុន កុសល បានស្នើសម្តេចហ៊ុន សែន ចូលរួមរស់ជីវភាពនយោបាយជាមួយគណបក្សប្រជាជនកម្ពុជា។តាមរយៈ Videoខ្លីមួយលោកបានប្ដេជ្ញាចិត្តចូលរួមជាមួយរដ្ឋាភិបាលក្នុងការកសាងប្រទេសជាតិឱ្យកាន់តែរីកចម្រើន។លោកហ៊ុន កុសលបញ្ជាក់ថា៖«កូនសូមប្តេជ្ញានិងបង្ហាញចិត្តស្មោះត្រង់ ចំពោះសម្ដេចពុកនិងចូលរួមជាមួយគណបក្សប្រជាជនកម្ពុជា ក្រោមការដឹកនាំដ៏ត្រជាក់ត្រជុំរបស់សម្ដេច»។លោកបន្ថែមថា៖ «គុណដ៏ធំធេងរបស់សម្ដេចពុកគឺជាគុណដែលកូនមិនអាចបំភ្លេចបានពេញមួយជីវិតនេះ។ ដើម្បីជាការតបស្នងសងគុណចំពោះសម្ដេចពុកកូនសូមប្តេជ្ញាចិត្ត ភក្តីភាព ស្មោះត្រង់ ជាមួយសម្ដេច ដើម្បីចូលរួមកសាងនិងស្ថាបនា របស់ប្រទេសយើង ក្រោមការដឹកនាំដ៏ឈ្លាសវៃរបស់សម្ដេចពុក ដែលនាំនាវាកម្ពុជាពីភ្លើងសង្គ្រាមមកសន្តិភាព»។កាលពីថ្ងៃទី២១មីនា លោក យឹម ស៊ីណន បានបង្ហោះសារនៅលើហ្វេសប៊ុករបស់លោកថា បើតាមសំឡេងពលរដ្ឋតាមហាងកាហ្វេ ថ្ងៃនេះយើងអាចឃើញច្បាស់ថា នរណាជាស្តេចផែនដីពិតប្រាកដ។ចំណែកលោក ហ៊ុន កុសល ក៏បានសរសេរដែរថាឃើញពួគេធ្វើបាបព្រះទ័យនឹងបន្ទាបព្រះចេស្តាព្រះមហាក្សត្រខ្មែរគ្រប់ ច្រកបែបនេះ។ ទូលបង្គំជាអ្នកនយោបាយជំនាន់ក្រោយប្តេជ្ញានឹងប្រើសមត្ថភាពដែលមានទាំងប៉ុន្មានចូលរួមពូនផ្តុំជាមួយលោកប្រធាន កឹម សុខាការពារព្រះចេស្ដាក្សត្រនិងព្រះរាជបល្ល័ង្កដែលប្រជារាស្ត្រខ្មែរមិនអាចខ្វះបាន។សម្តេចនាយករដ្ឋមន្ត្រី ហ៊ុន សែន បានចាត់ទុកសាររបស់លោក យឹម ស៊ីណន និងលោក ហ៊ុន កុសល ដែលលើកឡើងខាងលើនេះថា ជារឿងបំភ្លៃខុសពីការពិត។សម្តេចបញ្ជាក់ថា មានតែព្រះមហាក្សត្រទេដែលព្រះអង្គដឹងច្បាស់។សម្តេចនាយករដ្ឋមន្ត្រីបន្ថែមថា បើគ្មានទោសទើបចម្លែក ព្រោះនេះមិនមែនជារបៀបបញ្ចេញមតិទេ តែជាការបំភ្លៃការពិតមួយដោយចេតនា។ ទោះជាយ៉ាងណា លោកចាត់ទុករឿងទាំង២ខាងលើនេះ ទៅស្ថាប័នតុលាការ ដើម្បីជាអ្នកកាត់ក្តី៕Khmer Times
លោកយឹម ស៊ីណន ចូលជួបសម្តេចនាយករដ្ឋមន្ត្រី ហ៊ុន សែន កាលពីថ្មីៗកន្លងទៅនេះ។
Post a Comment