ប្រធានាធិបតីចិនបន្ទោសនាយករដ្ឋមន្ត្រីកាណាដាយ៉ាងខ្លាំងជុំវិញទង្វើមិនសមរម្យ
ប្រធានាធិបតីចិនលោក Xi Jinping ដែលខឹងសម្បាបានស្តីបន្ទោសលោក Justin Trudeau នាយករដ្ឋមន្ត្រីកាណាដានៅក្នុងកិច្ចប្រជុំ G20 សម្រាប់ការចោទប្រកាន់ថា បានបែកធ្លាយកិច្ចសន្ទនារបស់មេដឹកនាំទាំង២ ទៅដល់អ្នកសារព័ត៌មាន។
មេដឹកនាំទាំងពីរត្រូវបានគេថតបានដោយកាម៉េរា កំពុងពិភាក្សាគ្នាយ៉ាងក្តៅគគុកតាមរយៈអ្នកបកប្រែម្នាក់ នៅកិច្ចប្រជុំកំពូលក្នុងប្រទេសឥណ្ឌូនេស៊ី។ លោក Xi ហាក់ដូចជាមានការខកចិត្ត ខណៈលោកបាននិយាយទម្លាយទៅកាន់នាយករដ្ឋមន្ត្រីកាណាដា អំពីរបៀបនៃព័ត៌មានលម្អិតនៃជំនួបរវាងមេដឹកនាំទាំងពីរកាលពីថ្ងៃអង្គារ ដែលត្រូវបានបែកធ្លាយដល់សារព័ត៌មានដោយប្រភពរដ្ឋាភិបាលកាណាដា។ លោក Xi បានប្រាប់លោក Trudeau តាមរយៈអ្នកបកប្រែដោយញញឹមថា អ្វីគ្រប់យ៉ាងដែលយើងបានពិភាក្សាត្រូវបានបែកធ្លាយលើសារព័ត៌មាន វាមិនសមរម្យនោះទេ។
ប្រសិនបើមានភាពស្មោះត្រង់ យើងអាចប្រាស្រ័យទាក់ទងគ្នាបានយ៉ាងល្អដោយការគោរពគ្នាទៅវិញទៅមក បើមិនដូច្នេះទេលទ្ធផលនឹងពិបាកនិយាយ។ លោក Trudeau បាននិយាយកាត់មេដឹកនាំចិន ហើយបានដើរទៅរកមេដឹកនាំរូបនេះ។ លោក Trudeau បាននិយាយថា នៅក្នុងប្រទេសកាណាដា យើងជឿជាក់លើកិច្ចសន្ទនាដោយសេរី និងបើកចំហ និងស្មោះត្រង់ ហើយនោះជាអ្វីដែលយើងនឹងបន្តឲ្យមាន ហើយយើងនឹងបន្តស្វែងរកការងាររួមគ្នាប្រកបដោយការស្ថាបនា។ លោក Xi បានងាកចេញនៅពេលដែលលោក Trudeau ឆ្លើយតប៕
/unnamed.png
Post a Comment