បណ្តាខេត្ត​នៅភាគ​ពាយព្យ ៨ខេត្ត ប្រឈមនឹង​ទឹក​ជំនន់ ព្រោះឥទ្ធិពលខ្យល់ព្យុះ

 ក្រសួងធនធានទឹក និងឧតុនិយម បានចេញសេចក្តីជូនដំណឹង នៅថ្ងៃទី២៤ ខែកញ្ញានេះ​ថា ឥទ្ធិព្យុះទី១៦ ឈ្មោះ ណូរុ ដែលកើតនៅភាគខាងកើតប្រទេសហ្វីលីពីន នឹងធ្វើឱ្យ​ប្រព័ន្ធសម្ពាធ​ទាប ITCZ ដែលអូសបន្លាយលើភាគខាងជើងកម្ពុជា បានចុះថមថយឥទ្ធិពលជាលំដាប់។ ប៉ុន្តែ​តាមការព្យាករ នៅថ្ងៃទី២៧កញ្ញា ព្យុះណូរុ នឹងវិវត្តទៅជាព្យុះទីហ្វុង នៅពេលបក់ចូល​កៀកឆ្នេរភាគកណ្តាលប្រទេសវៀតណាម ។ព្យុះនេះ នៅពេលឆ្លងកាត់​ប្រទេសវៀតណាម និងអាងទន្លេ​មេគង្គប្រទេសឡាវ និងថៃ នៅថ្ងៃទី២៨-៣០​កញ្ញា បានថមថយឥទ្ធិពល​បន្តបន្ទាប់ជាព្យុះកម្រិត TS និង TD និងសម្ពាធទាប​។ ជាមួយគ្នានោះ ចាប់ពីថ្ងទី២៧ ដល់ថ្ងៃទី២៩ ខែកញ្ញា ឆ្នាំ២០២២ ខ្យល់មូសុងនិរតី នឹងបង្កើន​ល្បឿន​បក់​ក្នុងកម្រិត​ពីបង្គួរទៅខ្លាំង មកលើតំបន់មាត់សមុទ្រ​។

សេចក្តីប្រកាស បន្តថា លក្ខណៈបែបនេះ នឹងធ្វើឱ្យ​កម្ពុជាយើង ចាប់ពីថ្ងៃទី២៧-៣០ ខែ​កញ្ញា ឆ្នាំ២០២២ បណ្តាខេត្តនៅភាគពាយព្យ មានជាអាទិ៍៖ ខេត្តឧត្តរមានជ័យ ព្រះវិហារ រតនគិរី សៀមរាប បន្ទាយមានជ័យ ប៉ៃលិន បាត់ដំបង និងខេត្តពោធិ៍សាត់ នឹងអាចមានភ្លៀងធ្លាក់ក្នុង​កម្រិតពី​បង្គួរ ទៅច្រើន បូកផ្សំនឹងបរិមាណទឹកភ្លៀង ដែល​ហូរមកពីប្រទេសថៃបន្ថែមទៀត អាចបង្ក​ឱ្យ​ទីទំនាប​ជាប់ផ្លូវទឹក និងផ្លូវទឹកនៅក្នុងភូមិ​សាស្ត្រ​នៃបណ្តាខេត្តទាំងនោះ ប្រឈមនឹង​ជំនន់​ទឹកភ្លៀង និងជំនន់ដោយ​បរិមាណទឹកហួសកម្រិត​។ ចំណែក​បណ្តាខេត្តដទៃទៀត និងរាជធានីភ្នំពេញ មានភ្លៀងធ្លាក់​ក្នុងកម្រិត​ពី​តិចទៅបង្គួរ លើកលែងតែ​បណ្តាខេត្តជាប់មាត់​សមុទ្រ មានខេត្តកោះកុង និងខេត្តព្រះសីហនុ ដែលអាចមានភ្លៀងធ្លាក់ច្រើន។ នៅលើផ្ទៃសមុទ្រ ក៏នឹង​អាចមានភ្លៀង​ច្រើន ខ្យល់បោកបក់​ខ្លាំង និងរលកសមុទ្រ​ខ្ពស់​។​

ក្រសួងធនធានទឹក និងឧតុនិយម ក៏បានប្រកាសថា ភ្លៀងនឹងបន្តធ្លាក់​ច្រើន នៅតំបន់ផ្ទៃរង​ទឹកភ្លៀង​នៃ​អាងទន្លេមេគង្គ ដែលអាចធ្វើ​ឱ្យទឹកទន្លេមេគង្គ មានការងើប​កើន​ឡើងវិញ​ជាបន្តបន្ទាប់៕