សម្តេចនាយករដ្ឋមន្ត្រី ហ៊ុន ម៉ាណែត បានជូនពរដល់ប្រជាជនចិន និងប្រជាជនកម្ពុជាជាប់ខ្សែស្រឡាយចិន ខណៈដែលពួកគេត្រៀមរៀបចំពិធីបុណ្យចូលឆ្នាំថ្មីប្រពៃណីចិន។ក្នុងសារផ្ញើជូនលោក ពុង ឃាវសែ ប្រធានសហព័ន្ធខ្មែរចិននៅកម្ពុជា សម្តេចធិបតីហ៊ុន ម៉ាណែត បានថ្លែងថា ប្រជាជនកម្ពុជា និងចិន តែងតែនៅជាមួយគ្នាគ្រប់កាលៈទេសៈ តាំងពីសម័យបុរាណកាលមក។សម្តេចធិបតីបានមានប្រសាសន៍ថា “ក្នុងឱកាសបុណ្យចូលឆ្នាំថ្មីប្រពៃណីជាតិចិន ឆ្នាំនាគ នាពេលខាងមុខ ក្នុងនាមរដ្ឋាភិបាលនៃព្រះរាជាណាចក្រកម្ពុជាខ្ញុំសូមចូលរួមអបអរសាទរ និងចូលរួមសប្បាយរីករាយជាមួយប្រជាជនចិន និងប្រជាជនខ្មែរជាប់ខ្សែស្រឡាយចិនទាំងអស់ ដែលតែងតែរួមសុខទុក្ខជាមួយគ្នាតាំងពីសម័យបុរាណមក។
 |
|
សម្តេចបានបន្ថែមថា “ខ្ញុំសូមថ្លែងអំណរគុណយ៉ាងជ្រាលជ្រៅចំពោះសហព័ន្ធខ្មែរចិននៅកម្ពុជា ប្រជាជនចិន និងប្រជាជនខ្មែរជាប់ខ្សែស្រឡាយចិនទាំងអស់ នៅជុំវិញពិភពលោក ដែលបានចូលរួមចំណែកយ៉ាងសកម្មក្នុងការអភិវឌ្ឍន៍និងការរីកចម្រើនរបស់ប្រទេសកម្ពុជា”។មេដឹកនាំកម្ពុជាក៏បានលើកទឹកចិត្តពួកគេឱ្យបន្តគាំទ្រគោលនយោបាយអភិវឌ្ឍន៍របស់កម្ពុជា និងរួមចំណែកបន្ថែមទៀតក្នុងការជំរុញកំណើនសេដ្ឋកិច្ចរបស់ព្រះរាជាណាចក្រ។ទោះបីជាវាមិនមែនជាថ្ងៃឈប់សម្រាកបុណ្យជាតិ នៅកម្ពុជាក៏ដោយ ក៏ពិធីបុណ្យចូលឆ្នាំចិន ត្រូវបានប្រារព្ធយ៉ាងទូលំទូលាយ ដោយសារតែសាលារៀន ក្រុមហ៊ុន និងស្ថាប័នមួយចំនួនត្រូវបានបិទក្នុងឱកាសនេះ។លោក គី សេរីវឌ្ឍន៍ អគ្គនាយកវិទ្យាស្ថានសិក្សាចិន នៃរាជបណ្ឌិត្យសភាកម្ពុជា បានមានប្រសាសន៍កាលពីថ្ងៃព្រហស្បតិ៍ថា ពិធីបុណ្យចូលឆ្នាំចិន មានការពេញនិយមយ៉ាងខ្លាំងនៅក្នុងប្រទេសកម្ពុជា ដោយសារទំនាក់ទំនងជិតស្និទ្ធរវាងប្រទេស និងប្រជាជនទាំងពីរ។លោកបានប្រាប់សារព័ត៌មានXinhuaថា “ប្រជាជនកម្ពុជាភាគច្រើន ជាពិសេសអ្នករស់នៅក្នុងទីក្រុងរីករាយក្នុងការប្រារព្ធពិធីបុណ្យចូលឆ្នាំចិន ពីព្រោះពួកគេជឿថាការប្រារព្ធពិធីនេះនឹងនាំមកនូវសំណាងល្អ និងមានលាភមានជ័យដល់ពួកគេពេញមួយឆ្នាំ” ។លោកបន្តថា៖ «ការប្រារព្ធពិធីដ៏ទូលំទូលាយនៅកម្ពុជាពិតជាឆ្លុះបញ្ចាំងពីមិត្តភាពជាបងប្អូនរវាងប្រជាជននៃប្រទេសទាំងពីរ»។«វាក៏បង្ហាញថា កម្ពុជាគោរពភាពចម្រុះនៃវប្បធម៌និងសេរីភាពជំនឿ»។លោក សិរីវឌ្ឍន៍ ដែលជាពលរដ្ឋខ្មែរកាត់ចិន បានមានប្រសាសន៍ថា ពិធីបុណ្យចូលឆ្នាំចិន គឺជាឱកាសពិសេសសម្រាប់ពលរដ្ឋខ្មែរកាត់ចិន ដើម្បីឧទ្ទិសដល់បុព្វការីជន និងរីករាយជួបជុំជាមួយក្រុមគ្រួសារ។ប៉ុន្មានថ្ងៃមុនពិធីបុណ្យចូលឆ្នាំ ហាងលក់សម្ភារៈតុបតែងដូចជា ក្រដាសពណ៌ក្រហម ផ្កា គោមក្រហម និងគំនូរអក្សរជូនពរចិន បានទាក់ទាញអតិថិជនយ៉ាងច្រើនកុះករ។គីម ស្រី អាយុ៣៨ឆ្នាំ អ្នកលក់ផ្កា នៅជិតពហុកីឡដ្ឋានជាតិអូឡាំពិក រាជធានីភ្នំពេញ បានប្រាប់សារព័ត៌មានXinhuaកាលពីថ្ងៃព្រហស្បតិ៍ថា ៖ «ការលក់ដូរគឺដាច់ខ្លាំងមុនចូលឆ្នាំដោយសារមនុស្សជាច្រើនបានមកទិញផ្កា ជាពិសេសដើមផ្កាអង្គារសិល្ប៍ សម្រាប់ការតុបតែងឆ្នាំថ្មីរបស់ពួកគេ»។គាត់គិតថាការកើនឡើងនៃការលក់ នឹងរួមចំណែកដល់កំណើនសេដ្ឋកិច្ចដ៏ល្អប្រសើររបស់ប្រទេសកម្ពុជា នៅក្នុងយុគសម័យក្រោយជំងឺរាតត្បាតកូវីដ-១៩។គាត់បានបន្ថែមថា “យើងសង្ឃឹមថាសេដ្ឋកិច្ចនឹងកើនឡើងខ្ពស់នៅឆ្នាំនេះ ដូច្នេះប្រជាជននឹងចំណាយកាន់តែច្រើនសម្រាប់ការប្រារព្ធពិធីចូលឆ្នាំថ្មី នៅឆ្នាំក្រោយ របស់ពួកគេ” ។យោងតាមការព្យាករណ៍របស់រដ្ឋាភិបាល សេដ្ឋកិច្ចរបស់ប្រទេសកម្ពុជាត្រូវបានគេរំពឹងថានឹងកើនឡើង ៦,៦ %នៅឆ្នាំ២០២៤ កើនឡើងពី ៥,៦%នៅឆ្នាំ២០២៣៕
/unnamed.png
Post a Comment