ភ្លើងទៀនដកសេចក្តីថ្លែងការណ៍ចេញក្រោយការព្រមានប្តឹងពីសម្តេចហ៊ុន សែន
មួយថ្ងៃក្រោយពីការលើកឡើងរបស់សម្តេចនាយករដ្ឋមន្ត្រី ហ៊ុន សែនគណបក្សភ្លើងទៀនសម្រេចដកចេញសេចក្តីថ្លែងការណ៍របស់ខ្លួនពីលើហ្វេសប៊ុក។ជាសេចក្តីថ្លែងការណ៍ដែលបក្សកាន់អំណាចមើលឃើញថាជាការចោទប្រកាន់លើខ្លួនដោយមិនមានមូលដ្ឋាន។ជាមួយគ្នានេះ អ្នកគាំទ្រគណបក្សកាន់អំណាចនៅតាមស្ថាប័នសាធារណៈនានាបានចេញញត្តិគាំទ្រសេចក្តីថ្លែងការណ៍របស់គណបក្សប្រជាជនកម្ពុជាដែលប្រឆាំងនឹងការចោទប្រកាន់របស់គណបក្សភ្លើងទៀន។គណបក្សភ្លើងទៀនដែលជាគណបក្សប្រឆាំងលេចធ្លោមួយសម្រាប់ការត្រៀមបោះឆ្នោតសកលនៅ ខែកក្កដា ឆ្នាំ២០២៣នេះ បានសម្រេចលុបសេចក្តីថ្លែងការណ៍របស់ខ្លួនចេញពីហ្វេសប៊ុកហើយនៅថ្ងៃសុក្រនេះ ក្រោយសម្តេចនាយករដ្ឋមន្ត្រីហ៊ុនសែនប្រាប់ឲ្យមេធាវីគណបក្សប្រជាជនសិក្សាដើម្បីប្តឹងប្រសិនបើគណបក្សភ្លើងទៀនមិនព្រមដកចេញទេនោះ។សេចក្តីថ្លែងការណ៍របស់គណបក្សភ្លើងទៀនកាលពីថ្ងៃទី១៨ខែមករា ដែលមានអរិភាពនោះ គឺជាលទ្ធផលនៃកិច្ចប្រជុំគណៈកម្មាធិការអចិន្ត្រៃយ៍គណបក្ស ដែលធ្វើឡើងក្រោយពីការចាប់ខ្លួនលោក ថាច់ សេដ្ឋា អនុប្រធានគណបក្សភ្លើងទៀន។ នៅក្នុងសេចក្តីថ្លែងការណ៍មាន៣ចំណុចខ្លីៗនោះចំណុចទី១ត្រូវបានប្រតិកម្មខ្លាំងក្លាពីប្រធានគណបក្សប្រជាជនសម្តេចហ៊ុន សែន ដោយសេចក្តីថ្លែងការណ៍បានរំលេចថា«គណបក្សភ្លើងទៀន ប្រឆាំងដាច់ខាតលើការគាបសង្កត់ការគំរាមកំហែងនិងការធ្វើទុក្ខបុកម្នេញផ្នែកនយោបាយគ្រប់រូបភាពពីគណបក្សកាន់អំណាចដោយទាមទារឲ្យបញ្ឈប់សកម្មភាពនេះជាបន្ទាន់។ក៏ប៉ុន្តែមួយថ្ងៃក្រោយសេចក្តីថ្លែងការណ៍របស់គណបក្សប្រឆាំង គណៈកម្មាធិការកណ្តាលគណបក្សប្រជាជនកម្ពុជាក៏បានចេញសេចក្តីថ្លែងការណ៍តបតវិញ ដោយចាត់ទុកថាសេចក្តីថ្លែងការណ៍របស់គណបក្សភ្លើងទៀន បានធ្វើឲ្យប៉ះពាល់ធ្ងន់ធ្ងរបំផុតដល់ភាពត្រឹមត្រូវ និងសេចក្តីថ្លៃថ្នូររបស់គណបក្សប្រជាជន ដែលកំពុងកាន់អំណាចនៅកម្ពុជា។នៅក្នុងសេចក្តីថ្លែងការណ៍ ដែលមាន៤ចំណុច គណបក្សកាន់អំណាចបានបង្ហាញពីភាពស្អាតស្អំរបស់ខ្លួន តាមរយៈការគោរពច្បាប់ សេរីភាព និងលទ្ធិប្រជាធិបតេយ្យយ៉ាងម៉ឺងម៉ាត់ រួមនឹងលើកឡើងពីគុណសម្បត្តិផ្សេងៗទៀតរបស់គណបក្សហើយប្រឆាំងដាច់ខាតនូវការចោទប្រកាន់ពីសំណាក់គណបក្សភ្លើងទៀន។ សេចក្តីថ្លែងការណ៍របស់គណៈកម្មាធិការកណ្តាលគណបក្សប្រជាជននេះ ត្រូវបានតំណាងគណបក្សប្រជាជននៅតាមស្ថាប័នរដ្ឋនានាចេញញត្តិគាំទ្រយ៉ាងព្រោងព្រាធផងដែរចាប់តាំងពីថ្ងៃម្សិលមិញ។អ្នកតាមដាននយោបាយកម្ពុជានានាមើលឃើញថាអ្នកនយោបាយខ្មែរគួរមានភាពចាស់ទុំ និងមានក្រមសីលធម៌ នៅក្នុងការរិះគន់គ្នាទៅវិញទៅមកក្នុងសង្គមប្រជាធិបតេយ្យ។ សូមរំលឹកថា ភាពតានតឹងខាងនយោបាយនាដំណាក់កាលចុងក្រោយនេះគណបក្សភ្លើងទៀនក៏បានស្វះស្វែងរកកិច្ចសន្ទនាជាមួយគណបក្សកាន់អំណាចផងដែរ។ក៏ប៉ុន្តែគណបក្សកាន់អំណាចបញ្ជាក់ថាមិនមានភាពចាំបាច់៕RFI
គណបក្សប្រជាជន(ឆ្វេង)និងគណបក្សភ្លើងទៀន(ស្តាំ)។រូបភាពtroryorng
______________________________________________________________________________
សេចក្តីជូនដំណឹងP EXPRESS Logistics
👉ព័ត៌មានបន្ថែម0978593132.077313276
/unnamed.png
Post a Comment